ارجو المساعدة ضروري في عمرة بيجو 504

**medo_mosta** · 21-03-2011 08:32 PM

انا من القاهرة وعايز اعرف تكلفة العمرة كاملة او نص عمرة لموتور504 شامل القطع والمصنعية ، اصل الميكانيكي وانا بغير البوجيهات وطقم الكهرباء قاللي ان الموتور خفيف ومحتاج يفك علشان يعرف هاتحتاج عمرة والا نص عمرة
وياريت اعرف لو معملتش العمرة النتيجة هاتكون ايه على الموتور ياريت اجابة سريعة علشان احتمال ابدا يوم الجمعة لو فيها عمرة
انا طلبت مساعدة اعضاء قسم البيجو ولم اجد رد ياريت حد يرد عليا

**cafe** · 21-03-2011 10:51 PM

اولا البوجيهات بتعرق زيت ؟؟ يعني كل شوية العربية بتلُت ؟؟ بمعنى ااخر هل البوجيهات بتفصل في فترات قريبة ؟؟ هل الزيت بينقص او المكنة بتدخن من الشكمان ؟؟؟

أذا كانت الاجابة نعم يباى حتعمل شمبر او عمرة حسب ما تحلاقي اما تفك

أذا كانت لأ يباى مش محتاج حاجة

المهم دلوأتي ان فية صنايعية كتير أوي أوي مابيعرفوش فرق الزيت على البوجية اما بيقطع من البنزين الزيادة !! كارثة طبعا

تعرفها ازاي ...لو ماكنتش عارف بنفسك حاجة زي دي حتشوف ميكانيكي تاني شاطر أوي وبيفهم تاخد رأية وبعد كدة تتأكد من بتاع كاربيراتيرات

بالنسبة للشمبر ولا العمرة لما تفك دة لو كنت حتفك اساسا ..........

لو الشمايز معتبة أوي حتعمر
لو البستم تعبان او منقر او مكسور مثلا ودة مش واضح من كلامك او البنوز مبوشة حتعمر
لو فية تبويشات كتير في المكنة من جوة زي السبايك وخلافة حتعمر

لو في حالة الموضوع بسيط مش حتعمر
زي تعتيبة خفيفة في الشمايز والبساتم كويسة والحالة العامة كويسة

تكاليف العمرة اعلى من الشمبر تقريبا بالتلت

العمرة حتجيب كرتونة بيجو فرنساوي أصلي وفية فرنساوي أورجينال ودي أغلى التلت من الفرنساوي بس ودة لو لقيت الاورجينال
حتخرط الكرنك
و تجيب الاتي
طقم سبايك (تركب على الكرنك بعد الخرط
طبعا الكرتونة (بساتم وشمايز و شنابر)
طقم جوانات كامل
علبتين غرا احمر
طقم دبرياج في الغالب وأادي عندك بتاع 450 جنية زيادة في التكلفة على العمرة ( عشان حتسمع الكلمة دي فخليك جاهز لها عشان ماتتخضش)
علبة رودية
كاتينة جديدة وممكن ماتغيرش الكاتينة على اعتبار انها جنزير وصعب تبوظ بردو بس في العمرة حيث انك بتعمل عمرة صح ليك تغيرها
وشوية حاجات بسيطة جمب الي قولتة زي خراطيم وكلام من دة
دة طبعا جمب تكلفة المخرطة نفسها وأجرة الصنايعي

عمل طقم الشمبر شيل من دة الكرتونة تقريبا

تقريبا تقريبا مش بالظبط تكلفة العمرة حتخلها معاك في حدود تلاتة ونص

الشمبر قول الف ونص كدة

**lovely_love** · 22-03-2011 08:33 PM

السلام عليكم اولا فى حاجة احب اضيفها ان فى ميكانيكى معرفة متخصصة بيجو فقط لو حبيت ممكن تاخد عنوانه وتروح تساله لانه فعلا بنى ادم محترم ومفيهوش جشع ولا نصب زى اغلب الصنايعة لو حبيت راسلنى على الخاص وانا اساعدك فى الى تؤمر بيه لانى معايا 504

**saadelden** · 22-03-2011 08:59 PM

ايه الارقام دي ؟؟!!

1500 طقم شمبر !!
3500 عمره كامله ؟!!

علي كدا تجيب ماتور جديد في الحالتين

**MASERATI** · 22-03-2011 09:40 PM

السلام عليكم و رحمة الله و بركاته

آه صحيح, هو المواتير الاستيراد بتاع البيجو ال505 الطيارة و البيجو ال504 تعمل كام دلوقتى؟؟؟؟

**medo_mosta** · 26-03-2011 02:08 PM

شكرا للسادة الاعضاء على ردهم

**medo_mosta** · 26-03-2011 02:10 PM

المشاركة الأصلية كتبت بواسطة lovely_love

السلام عليكم اولا فى حاجة احب اضيفها ان فى ميكانيكى معرفة متخصصة بيجو فقط لو حبيت ممكن تاخد عنوانه وتروح تساله لانه فعلا بنى ادم محترم ومفيهوش جشع ولا نصب زى اغلب الصنايعة لو حبيت راسلنى على الخاص وانا اساعدك فى الى تؤمر بيه لانى معايا 504

شكرا على اهتمامك ولو فعلا تعرف ميكانيكي بيجو كويس ياريت تقولى عنوانه واسمه . معليش مش عارف ابعتلك على الخاص