متابع جدا
عرض للطباعة
متابع جدا
السلام عليكم
فى مصر هنا فى عربيات تتركب وممتازه ومالهاشى سوق فى مصر زى الفورد الفوكس والمازدا والسى فور وعربيات متتركبشى وليها حظ وسوق فى مصر زى اللانوس والفيرنا والشاهين وغيرهم و
وسيارات أخرى ليها سوق جامد فى مصر وفى نفس الوقت ركوبة معقولة جدا زى اللانسر البومة والكورولا القديمة وسيارات ممتازة جدا وماشية كويس فى سوق مصر لكن سعرها غالى وقطع غيارها غالية زى السكودا الأوكتافيا والرينو الميجان
انت بقى عايز ايه من السيارة - خلينا فى أرض الواقع سيبك من التفاصيل الفنية دلوقتى خليها بعدين:-
جاوب على الأسئلة دى الأول وانا هقولك تشترى ايه:-
1- عاوزها عائلية واسعة والا مش مهم ؟
2- عاوزها قطع غيارها رخيصة والا معقولة والا مش مهم تكون غالية فى مقابل رفاهية؟
3- عاوزها تكون زيرو والا ممكن كسر زيرو والا ممكن تكون مستعملة؟
4- عاوز التوكيل يكون جنبك والا مش مهم ترزعله مشوار كل 10000 كيلو علشان الصيانة؟
5- عاوزها تكون اقتصادية فى البنزين والا مش مهم؟
6- عاوزها عالية عن الأرض والا مش مهم طريقك غالبا مفيهوش مطبات عالية ومبتحملشى ورا كتير؟
7- اغلب مشاويرك طوالى والا جوه البلد وكتير والا قليل (متوسط عدد الكيلو متر فى السنة كام)؟
8- ايه الحد الأدنى من الكماليات الى انت عاوزها هل مثلا محتاج فيها مثبت سرعة مثلا والا لو كان فيها ميخسرشى ولو مكانشى يبقى مش مهم. اسأل نفسك على كل كماليه بالطريقة دى وقولى الحد الأدنى أيه؟
9- هل تخط للاحتفاظ بها مدة طويلة (خمس سنين فأكثر)ام محتمل انك تغير بعد سنه او اتنين؟
10- هل الشكل الخارجى يهمك قوى يعنى هام جدا أم هام فقط؟
11-أقصى سرعة ممكن تمشى بيها كام يعنى أنت من هواة السرعة والحرق والا سواقتك هادية ومعقولة.؟
12- هل انت من النوع اللى يحب يبقى متميز وعندك حاجة مش منتشرة والا تحب أنك تكون زى أغلب الناس؟ و دى مسألة تتعلق بشخصيتك انت فقط.
جاوبنى على واحد واحد وبالترتيب وانا اقولك اختيارك هينحصر فى اى سيارة وشكرا
م/طارق منصور
ممكن أدخل فى الحوار لأانى محتاج رأيكم فى اختيار عربية
واتمنى انك تساعدنى و دى اجابتى على الاسئلة
1 - تكون عائلية واسعة
2 - قطع غيارها رخيصة ومعقولة
3- زيرو و ممكن كسر زيرو
4- مش مهم التوكيل يكون جنبى
5- تكون اقتصادية فى البنزين
6- عاوزها عالية عن الأرض
7- اغلب مشاويرى طوالى لإنى بسافر كتير
8 - باخطط للاحتفاظ بها مدة طويلة (خمس سنين فأكثر)
9 - الشكل الخارجى مهم قوى
10 -أقصى سرعة ممكن أمشى بيها 150 - 160يعنى من هواة السرعة والحرق
11- من النوع اللى باحب أبقى متميز وعندى حاجة مش منتشرة
و شكرا
السلام عليكم
أزاى عاوز تبقى راكب حاجه متفرده وفى نفس الوقت قطع الغيار تكون رخيصة ؟؟؟؟؟
دايما بتكون حاجة على حساب حاجة. خليك عقلانى فى طلباتك محدش بيأخد كل حاجه
السلام عليكم
اكيد مش كل حاجة الواحد عايزة بياخدها بس أكيد برضو انه بيحاول يوصل لأقرب حاجة من اللى هو عايزه
و شكراااا لذوقك و اهتمامك
لو عن نفسي هاشتري كورولا ..... رغم إن الفانتازيا أجمل
هو فيه أختيار جميل قوى مناسب لكل الأشتراطات دى وكمان قطع الغيار معقولة - مش هقول رخيصة لكن معقولة
فورد فوكس
شكل جميل و متانة وثبات وعالية وفى الطوالى محترمة وكمان كسر الزيرو منها رخيص
ايه رأيك؟؟؟
شرط رقم 2 ميمشيش مع شرط رقم 11، الحاجة اللى قطع غيارها رخيصة ومعقول كل الناس بتشتريها وبتبقى منتشرة
شرط رقم 1 ميمشيش مع شرط رقم 10، إما عائلية واما رياضية
شرط رقم 5 ميمشيش مع شرط رقم 10، إما اقتصادية واما رياضية
عموما انت شروطك نظرا لأنها متركبش مع بعض وحيث انك محددتش ميزانية ف90% من العربيات اللى بتتباع فى مصر تحقق 8 شروط من شروطك ال11، وحيث ان مش هينفع تحقق اكتر من 8 منهم مع بعض فاشترى أول عربية تقابلك هتلاقيها محققة 8 شروط من ال11 ومش هتلاقى عربية محققة اكتر من كدة
اكيد الكورولا افضل وانعم وقطع غيار رخيصة وعربية بسيطة لكن شكل وحش وتبيعها اسهل
المازدا شكلها جميل بس عربية تقيلة جدا وقطع غيارها نار ومش ماشية