امبارح كنت في الكلية وعندي كورس بعدها في تريامف
خلصت كلية وطلعت انا وصحابي بالعربيات مع بعض
كنا 3 عربيات
خدنا صلاح سالم ووصلنا لدار الدفاع
كنت انا في النص بين العربيتين التانيين
ببص في العداد بتاع الحرارة .. لقيته وصل وعدي التلتين وبيتحرك !!!!!
أديت انتظار صاحبي اللي ورايا فهم
كان معايا صحابي في عربيتي نزلو وقفوا اليمين عشان أركن في الحتة اللي تحت الكوبري
العربية اللي قدامي كانت طلعت الكوبري والطريق زحمة جدااااااااا مايعرفش ينزل أبدا
اللي ورايا ركن وجه يشوف في أيه !
فتحت الكبوت وبشوف في أيه !
لقيت دخنة جامدة من الكربراتير .. بخار ميه
أستنيت لما بردت العربية وشفت في أيه !
طول الفترة ده تليفونات صحابي اللي في العربية اللي مشيت بيتصلوا
فين وفين علي ما بردت وحطيت أيدي لقيت مصيبة فعلا
الخرطوم اللي داخل للكربراتير عشان التكييف السخن مفكوك من مكانه .. قلت بسيطة هركبه و أملا ميه
لقيت ان البوز اللي خارج من الكربراتير وواصل في الخرطوم .. مقطوم جوة الخرطوم !!
وطبعا بيخرج بخار ميه من المكان ده
فتحت الرادياتير لقيته فااااضي
صاحبي اللي معايا عمال أتحايل عليه يمشي وياخد اللي معايا معاه ويروحوا الكورس
وهو أبداااااا
حاولت أسد المكان بتاع الكربراتير و أسد الخرطوم
بس معرفتش خاااااااالص
أتصلت بواحد صاحبي
قالي انه في مشوار مع أهله .. مجرد قلتله اني في مشكلة وواقف مش عارف أتصرف .. لقيته بيقولي ربع ساعة أكون عندك !!!!!!
قلتله مفيش داعي عشان أهله وكدة
لقيته جه ومعاه أخواته ومامته وجايبلي عدته كاملة وجركن ميه و العجينة العجيبة ( اللي بتتحول لحديد )
خليته يمشي عشان مامته وأخواته
وأتحايلت علي أصحابي التانيين يروحوا الكورس الحمد لله رضيوا
انا قعدت بقي أعافر مع العملية ده
سديت الخرم بالعاااااااااافية
والخرطوم لقيتله مسمار عجل كبير حطيته فيه وسده الحمد لله
مليت الرادياتير وتقريبا كان فاضي خااااالص مفيهوش نقطة
بصيت علي مكان العجينة .. لقيته بينزنز بسيط قوي
بصيت علي مروحة الرادياتير .. مفيش مش عايزة تدور !
ناقصاكي هي !
شغلت التكييف عشان مروحته تشتغل بقي
انا كنت بنص كم
كنت هموت من التلج وامبارح كان برررررررررررررد .. بس لو قفلته العربية هتسخن
وصلت البيت بعد عذااااااب
نازل من العربية بعطس
طول الطريق باصص علي عداد الحرارة
الموضوع خد أكتر من 6 ساعات
رحت النهارده لخراط عشان يعملي واحد بدل اللي أتقطم
فكيت الكربراتير ووديتهوله .. عمله ب 20 جنيه

كنت هغرم في الموضوع ده علي الأقل عمرة موتور
بس الحمد لله ربنا خلاني ألحقه في الوقت المناسب
ورزقني بأصحاب رجااااااااااااااااااالة
دايما الرجالة بيبانوا وقت الشدة
ربنا يخليهوملي ياااااااااااااا رب

دلوقتي انا عيان وعندي برد وجسمي كله واجعني