رأيك ايه احسن بنك للقسط......؟؟؟

**ابو سيف** · 13-04-2008 03:59 PM

المشاركة الأصلية كتبت بواسطة أبو عبدالله

رايي ولا بنك من دول للحرمانية

اعتقد يا ابو عبد الله ان كونتاكت بتشتري العربيه و تبيعها للعميل بسعرها الجديد بالتقسيط و لكن تبقا نقطه الاجبار على التأمين لديهم و على ما اذكر ان العلماء اباحوا انك تأمن لو اللى بيقسطلك بيجبرلك على ذلك و مكنش فيه مقسط تاني لا يجبر على التأمين و لكن دون الاستفادة من التأمين او الاستفادة من القيمه المدفوعه فقط
و يا ريت لو في اختلاف توضح اكتر

**sandy** · 13-04-2008 04:14 PM

contact is the best

**M_HaFeZ** · 13-04-2008 04:49 PM

المشاركة الأصلية كتبت بواسطة خالد

أبعد بعيد عن بنك كريدى أجريكول خاااااااااااااااااااااااا ااااالص
حرامية والموظفين فى جميع الفروع فى منتهى السوء ومعاملتهم وحشة جداً
أنا واخد عربيتى من عندهم وندمان جداً أنى أتعاملت مع البنك الزبالة ده
بتحس وأنت بتتعامل معاهم أنهم أقل من البنوك الحكومية بمراحل تحس أنك بتتعامل مع موظفين سجل مدنى مثلاً أو بتوع الوحدة المحلية
البنوك الحكومية أحسن منهم بكتييييييييييييير
الموظفين فى كريدى أجريكول كسالى جداً وعن تجربة فى أكثر من فرع ( الميرغنى - السبع عمارات - سانت فاتيما)
أبسط شئ أنه يسيبك واقف ترن قدامه بعد ماجاء دورك ويكلم مع موظفة ثانية زميلته ويسيب الشباك بتاعه أساساً وهاتك ياضحك مع السنيورة ولما تعترض يقولك بمنتهى الأستخفاف مانا بخلص شغل برضه
أو أبسط حاجة لو في مشكلة فى حسابك برضه الكل يقول ماأعرفش أسأل فى شباك تانى ويومهم بسنة
كان ليه عندهم كوبونات هدايا على الفيزا على سلسلة محلات مشهورة جداً ( مشتروات مجانية يعنى ) والمحل رافض أنه يصرف بحجة الأسم مش واضح ومرة تانية أن فى 30محل بأسم العجيل ، وأخيراً واحد فيهم قاللى أن البنك ده مقرف جداً ولينا شيكات متعطلة عندهم كتير وماتصرفتش
نصيحة أبعد عن كريدى أجريكول خالص
خليك فى كونتاكت ناس محترمين جداً جداً ، وسمعت برضه أن البنك الأهلى المصرى كويس جداً

بص ياباشا انا كنت شغال فى بنك واقولك على حاجه
لما يحصل موضوع زى ده اعمل اتكلم مع الموظف ووضح له غلطه ولو استهبل عللى صوتك وطالب انك تقابل مدير الفرع او تروح للمدير الاقليمى او المحافظ نفسه
وقول انك هتعمل فيه شكوى وهتتابعها
بس امانه عليك ميكونش فى موضوع ممكن يتحل وديا
انما المواضيع بتاعه التناحه او عدم الاهتمام اعمل زى مابقولك انا عن نفسى شفت موظفين كده معندهمش اى هتمام او رغبه انهم يخلصوا طلبات العملاء وبرضه فى نفس الوقت عملاء بيستغلوا الموضوع ده جامد وبالغلط ممكن يؤذوا موظف علشان العميل كان متضايق وهو جاى
والموضوع ده ينفع اكتر مع البنوك الخاصه لان اهم حاجه عندهم العميل ولما الموضوع يطلع لمديره او مدير الفرع هيعرف ازاى يتعامل مع الجمهور
انما فى الحكومه مقدرش افيدك اوى لان انت عارف الحكومه والموظفين لازقين بغراء رغم انى اتعاملت مع ناس محترمه جدا من الحكومه بس اكيد مش قاعده

**SAbuhashem** · 13-04-2008 04:55 PM

المشاركة الأصلية كتبت بواسطة solyelissa

هوا ايه نظام المرابحه ده??? وايه بقي نظام الوديعه ده ...? والفايده عندهم كام ?يا رايت تشرح لنا علشان كلنا نستفيد

المرابحة هي النظام الإسلامي للتقسيط . فيها بيشتري البنك السيارة وبعدين يرجع يبيعهالك تاني بموجب عقد بينك وبينه .

في عندهم نظامين

الأول ودة شبيه لأي بنك عادي بس على نظام إسلامي بيطلبوا مفردات مرتب ووصل نور والبطاقة ومش عارف ضامن ولا لأ بتدفع مقدم ٢٥٪ والباقي على ٧-7.٥ ٪ وطبعاً فيه حظر بيع

نظام الوديعة انك بتحط وديعة بباقي تمن العربية في البنك مثلاً نقول تمن العربيه 100,000 دفعت ٢٠ مقدم يبقى ٧٠٦ وديعة ب ٨٠،000-هنا مش شرط تدفع مقدم خالص ممكن تقسط ال-100,٠٠٠ كلهم لحد سبع سنين مدام حاطت وديعة ب-100,٠٠٠ في البنك الفايدة على التقسيط هنا جامدة جداً 6.٢٥٪-

الظريف بقى إن الوديعة بتجيب أرباح حوالي ٨.٥٪ مكن تديهم تعليمات إن أرباح الوديعه تطلع تغطي القسط أو جزء كبير جداً منه و بكده تضمن إن فلوسك معاك محفوظة وكمان قسط العربية يندفع جزء كبير جداً منه من أرباح الوديعه
وفي النظام دة مفيش تأمين إجباري ولا حظر بيع ولا أي حاجة نهائي والرخصة بإسمك كأنك شاريها كاش .

مثال
العربية تمنها 100,٠٠ دفعت 20,٠٠٠ مقدم باقي 80,000

الوديعه بتجيب أرباح حوالي 8.٥٪ يعني 80,000 x ٨.٥ /١٠٠ = ٦٨٠٠ في السنة يعني تقريباً حوالي ٥٦٦ جنيه في الشهر

قسط العربية هيكون 80,٠٠٠ x ٦٫٢٥ ٪ = حوالي ١٧٥٠ في الشهر على ٥ سنين

بكده إنت هتدفع ١٧٥٠ - ٥٦٦ = ١١٨٤ جنيه بس كل شهر والباقي الوديعه هتسدده .
لو حسبتها على البنوك التانية هتلاقي قسط نفس العربية ١٨٨٧ جنيه بتدفعها كاملة كل شهر دة غير حظر البيع دة غير الاهم من دة كله شبهه الحرمانية والله أعلم

Thanks
Eng.Sherif Shaker

**خالد** · 13-04-2008 11:57 PM

المشاركة الأصلية كتبت بواسطة M_HaFeZ

بص ياباشا انا كنت شغال فى بنك واقولك على حاجه
لما يحصل موضوع زى ده اعمل اتكلم مع الموظف ووضح له غلطه ولو استهبل عللى صوتك وطالب انك تقابل مدير الفرع او تروح للمدير الاقليمى او المحافظ نفسه
وقول انك هتعمل فيه شكوى وهتتابعها
بس امانه عليك ميكونش فى موضوع ممكن يتحل وديا
انما المواضيع بتاعه التناحه او عدم الاهتمام اعمل زى مابقولك انا عن نفسى شفت موظفين كده معندهمش اى هتمام او رغبه انهم يخلصوا طلبات العملاء وبرضه فى نفس الوقت عملاء بيستغلوا الموضوع ده جامد وبالغلط ممكن يؤذوا موظف علشان العميل كان متضايق وهو جاى
والموضوع ده ينفع اكتر مع البنوك الخاصه لان اهم حاجه عندهم العميل ولما الموضوع يطلع لمديره او مدير الفرع هيعرف ازاى يتعامل مع الجمهور
انما فى الحكومه مقدرش افيدك اوى لان انت عارف الحكومه والموظفين لازقين بغراء رغم انى اتعاملت مع ناس محترمه جدا من الحكومه بس اكيد مش قاعده

شكراً جزيلاً لتعقيبك
والله أنا دايماً مسالم جداً وبكتم فى نفسى كتير عند المعاملة مع الموظفين المصريين ولكن فى حالات كتير بفقد أعصابى من الغيظ وحرقة الدم ، وبفتكر أيام ماكنت مسافر فى الدول الأوروبية زى سويسرا والنمسا وشفت الناس هناك عايشة أزاى وبيتعاملوا مع الناس أزاى سواء أبن البلد أو الأجنبى ، ولكن غالباً بسكت خالص وبحب أفضفض مع أى حد بس مابسبش حقى خاااااااااالص وأفضل وراه ولكن بالأدب لأنى مابعرفش أزعق وجسمى قليل ونحيف جداً فتقريباً ماحدش بيخاف منى لو زعقت!! ، على فكرة أنا دكتور فى الجامعة وطبعاً بواجه أعداد طلبة بالالاف وبعرف أسيطر عليهم كويس والحمد لله على كل حال

**M_HaFeZ** · 14-04-2008 12:44 AM

والله يادكتور خالد ده الواقع للاسف ...
انا قلتلك ازاى تاخد حقك او على الاقل تلاقى المعامله المناسبه لك
انا باعمل كده اوقات لما اشوف تعسف وتضييع لوقت الناس على الفاضى
بس مش موضوع جسم برضه لا موضوع انك عميل وصدقنى يوم ماتدخل لمدير الفرع او مدير الخزنه ويعرف انك مدرس فى الجامعه هيقدرك اكتر لان الناس اللى زيك المفروض انها من اكتر الناس المثقفه والمحترمه واللى تستحق احسن معامله فى اى مصلحه