الموضوع: تقرير ممل أوي عن صيانة الصني 5000 كيلو في السبع المنصورة (للي عنده صبر بس)

السلام عليكم ورحمة الله وبركاته
ازيكو يا أعضاء منتدى نايل موتورز ...
عملت صيانة ال 5000 بتاعة الصني في مركز السبع بتاع المنصورة بعد ما عملت صيانة الألف في السبع اللي في المعادي ..
أولا أنا كنت بشتكي قبل صيانة الألف من حاجتين : أول حاجة استهلاك البنزين كان عالي عندي ... تاني حاجة الأبواب كانت تقيلة قوي في القفل وخصوصا الباب الوراني شمال كان بيقفل بصعوبة لدرجة أني ممكن أعطل الشارع عما أنزل واحد من العربية عما يقفل الباب
وكنت عاوز أركب سنسور ركن ووحدات رفع
... المهم حجزت ورحت في معادي المفاجأة اللي اتفاجأتها بس كانت غلطة مني أني لما حجزت كنت حجزت صيانة الألف بس وكان لازم أحجز كمان تركيب السنسور ولكني كنت فاكر أن كله بحجز واحد وطبعا أنا من المنصورة فصعب أرجعلهم تاني وقالولي كمان أن وحدات الرفع ما بتتركبش في الضمان فعملت صيانة الألف وقلتلهم عن الشكاوي وبعد ما خلصوا قالولي احنا عدلنا حاجة في نظام استهلاك البنزين وإن شاء الله حيتظبط وبالنسبة للأبواب قالولي احنا شحمناها وحتبقى كويسة ... أنا فعلا جربت البابين الأدامانيين وكانوا تمام بس بعد ما ما مشيت افتكرت أني نسيت أجرب الباب الوراني شمال واكتشتف أنه زي ماهو لأن أعتقد مشكلته كانت مختلفة عن باقي الأبواب ... أبقى اعمل الباب والسنسور مع بعض بقى ... وبالنسبة لاستهلاك البنزين فللأسف بعد فترة من التجارب مالقتش في فرق في الاستهلاك ومافيش حاجة اتظبطط . طبعا اضطريت استحمل قلت أنتظر لصيانة الخمس الافوأقولهم عالحاجات دي تاني بس اللي أنا كنت مخدوع فيه أني كنت فاكر أن معنة كلمة ضمان يعني تديهم العربية وأنت مغمض عينيك وتستلمها جديدة لكن الموضوع للأسف ماطلعش كدا ولازم تراجع وراهم كل حاجة .. طبعا دا مش معناه تقصير منهم بصفة أساسية هما أكيد ممكن يغلطوا لكن الغلطة كانت مني أني ما راجعتش كويس وراهم ...
المهم بما أني مشاوريي قليلة شوية فصيانة الخمس ألاف جات بعد فترة طويلة عما عرفت أن مركز السبع فتح فرع في المنصورة فكلمتهم وحجزت صيانة الخمس آلاف وسنسور ركن وكان موجود عندهم قالولي في التليفون أنه ب 250 جنيه مع تركيب ب 150 جنيه يعني المحصلة 400 جنيه (صيني بضمان - 4 طبات وشاشة عالطابلوة) ...
من عجائب القدر أني ليلة الصيانة شفت الموضوع بتاع الأستاذ أحمد على المنتدى بتاع عرض السنسور ووحدات الرفع مع بعض ب 440 في مودرن فطبعا أنا قررت أني أروح أركبه هناك عندهم وأكتفي بموضوع السبع في الصيانة بتاعة الخمس آلاف ....
بالنسبة بقى لطريق مركز السبع بتاع لمنصورة أنا اللي كنت عرفته من الموقع هنا أنه على بعد 5 كيلو من المنصورة طريق طنطا بس اللي كنت محتار فيه 5 كيلو منين بالظبط ل وبما أن المركز بتاع لمنصورة صغير جداا فماكانش باين خالص عالطريق وبالتالي وأنا رايح لفيت 3 لفات حوالين نفسي رايح جاي لحد ما شفته أو لقيت حد يدلني عليه .... طبعا من باب الدقة عشان اللي يروح بعدي ما يتوهش تاني هو المركز بالظبط على بعد 3 كيلو من بداية طريق طنطا من أول ما تلف من الصانية اللي بين طريق دمياط وجمصة وطنطا لف حوالين الصنية وادخل طريق طنطا واحسب 3 كيلو بالظبط من دخلتك حتوصله حتلاقيه على يمينك وهو أدامه من الناحية التانية توكيل تويويا بس المشكلة أن توكيل تويويتا بعده بشوية يعني لازم تشوف السبع الأول وهو تحت عمارة خضرا ومش مكتوب أي يفط جانبية خالص لازم تبص جنبك عشان تلمح يافطة نيسان زي اللي موجودة في أي مركز صيانة ...
طبعا المركز زي ما قلت صغير جداا طبعا بما يناسب حجم المنصورة ماهياش مشكلة يعني رحت في معادي وشافوا العربية وقلتلهم بقى المرة دي عالمشاكل بالتفصيل تاني وكنسلت تركيب السنسور .. المهم عملوا الصيانة في حدود ساعة أو ساعة نص وأنا طنت مراقبهم طول الوقت من الازاز فوق وبصراحة كان شكلهم شغالين بضمير ولقيتهم وصلوا الكمبيوتر بالعربية كذا مرة وكل ما يعملوا شوية حاجات يوصلوه تاني وكاناو بيتناقشوا مع بعض كدا بس طبعا ماكنتش سامع حاجة وبعد كدا في الآخر لقيتهم بدأوا يبصوا عالأبواب ويجربوها لمدة تلت ساعة تقريبا وجابوا اسبريهات وحاجات كدا وفضوها على مفصلات العربية والأوكر لحد ما خلصوا وطلعوا العربية ... نلزلتهم بقى طبعا كان حساب الصيانة عادي 75 جنيه بس اللي استغربتله بقى انه زودلي 18 جنيه عالبخاخات والاسبريهات ولا ماعرفش إيه اللي اشتروه عشان الأبواب + 5 جنيه مياة مقطرة وخصملي 50 جنيه لأني كان معايا كوبونات خصم من السبع اللي اشتريت منه العربية .. واللي ضايقني بقى أنه قالي برده بالنسبة للبنزين احنا لقينا فعلا الاستهلاك عالي فعملنا برده إعادة ولا تغيير للنظام بتاع العربية اللي مش قادر أحفظ اسمه برده وهو كدا حيبقى مظبوط معاك ...
قلتله طيب حأجرب بقى الأبواب المرة دي باب باب أكرة أكرة مفصلة مفصلة مانا مش حتلسع تاني بقى من نفس الجحر ... الببينات كلها كانت أنعم فعلا لكن برده للأسف الشدييد الباب الوراني شمال كان نفس المشكلة كان ما بيرضاش يقفل إلا بعذاب شديد المهم أظرف حاجة أن المهندس نفسه وهو بيجربهولي أول مرتين الباب ماقفلش معاه قالي على فكرة هو الباب دا أصلا نظامه كدا عشان العربية تقفيل مصري قلتله طيب أمال بقى إيه اللي جد ماهي دي المشكلة اللي كنت بشتكي منها قالي ماهي العربية نظامها كدا ونادالي الفني اللي قعد بقى يقنعني أن كل عربيات صني الباب الوراني شمال بتاعها نفس النظام وبيقفل بصعوبة قلتله يعني هما عجزوا في الباب الشمال بس أما الباب اليمين قدروا عليه ... قالي أصل الستسة بتاعتها بتبتقى ناشفة شوية قلتله .. وشوية يقولي أصل الجلدة بتاعة الباب تخينة وشوية يقولي أصلي خايف ألعب في الكلون ... وفضل يقنع فيا شوية قلتله بلهجة جامدة شوية يعني أنا لو رحت في أي مركز تاني حيقلولي نفس الكلام ؟؟ أن كل عربيات صني الباب الوراني شمال بتاعها كدا ؟؟ لقيا المهندس قالي طب لو سمحت حضرتك اتفضل ريح شوية وأنا حدخلك العربية تاني وحشوف الكلون .... يادوب طلعت دقيقتين بالظبط لقيته ببينادي عليا جوا مكان الصيانة وقالي اتفضل جرب كدا ... جربت الباب ساعتها والله وحمدت ربنا أني فضلت معاهم للآخر لأن الباب ساعتها فعلا بقى حاجة تانية ... راح الفني قالي على فكرة الباب كدا اتغير بقى حاجة تانية خالص وأنا فعلا لاحظت كدا وجربت كل أبواب العربية تاني وقالي جرب براحتك خالص وفعلا كله بقى تمام .. قلتله طب إيه اللي جد بقى دلوقتي قالي أصل الظاهر أن حد في المعرض كان ركن على باب العربية فأنا ماكنتش تخيلت أن دا ممكن يكون السبب لأن العربية جديدة فلما شفتها لقيت فعلا أن الباب بس كان عاوز يترفع شوية ... المهم شكرتهم بعد ما تبعتهم وتعبوني معاهم ومشيت ...
المهم بقى بصراحة بقى كلمة حق أني لما مشيت بالعربية وانا راجع حسيت أن العربية باقت حاجة تانية جداا حسيت أن صوت المكنة خف شوية والعربية بقت أنعم أوي وسحبها بقى أعلى بقى وحسبت بفرق غريب في العربية فعلا ....
الخطوة اللي جاية بقى هي حساب استهلاك البنزين تاني اللي يارب بقى تطلع مظبوطة عشان أنا تعبت من الموضوع دا وإن شاء الله لما أجرب حقولكوا إن شاء الله ....
وآسف جداا على الأسلوب الممل بس بصراحة أنا حسيت أني لازم أحكي كل حتة بالتفصيل عشان كنت بدور دايما على المواضيع اللي أصحابها حاكيين بالتفصيل دا فحبيت أوفره ليهم .... وشكرا ليكم واللي عنده أي استفسار أنا تحت أمره .