أنا عارف طبعا إن الحكايه دي صعبة, طيب ما نعمل زي ماليزيا؟ ناخد تصميم ومحركات وشاسيهات من شركة قديمة في المجال ده, زي ميستسوبيشي مثلا ونجمع العربيه دي وتتقفل بضمير مش زي اللي بيتقفل دلوقتي.. وده طبعا زي مانتوا قلتوا محتاج صناعات تكميليه معاه, مصنع كاوتش مثلا بدل النسر اللي ملوش لازمة أو حتى نطور المصنع ده, محتاجين مصنع قطاع غيار وممكن لو احنا فعلا خدنا تصميم ميتسوبيشي يبقى نعمل قطع الغيار ميتسوبيشي ونبقى ضربنا عصفورين بحجر, عملنا قطع غيار للعربيه بتاعتنا وعندنا قطاع غيار شركة مشهورة نصدرها للبلاد اللي حوالينا أو حتى لليابان نفسها! ويبقى الياباني لما ييجي يشتري قطاع غيار الراجل يقول له عندي الياباني وفي مصري ارخص ونفس الكفاءه تقريبا.. ف الراجل يجيب المصري عشان ارخص ومش فارق كتير عن الياباني
وبعين ربنا يكرمنا ونطور العربيه بتاعتنا دي ونعمل موديل بجد 100% بعد عشرة أو خمستاشر سنة.
و لو الطريقة دي مش هتنفع, ممكن عالاقل ناخد خط انتاج عربيه معينة ونصنعها للعالم كله, زي الكورولا في جنوب أفريقيا أو الرينو فلوينس في تركيا أو اللوجان في المغرب.. أكيد أحسن من تجميع عربيات اتلغت من زمان زي الفيرنا أو اللانوس عشان نبيعها في مصر! وياريت التقفيل بتاعها نضيف!
لو عملنا كده هنشغل ناس كتير وهنفتح الباب لتطوير الصناعة عندنا ومش بعيد بعد كده نصنع طيارات ركوب أو حتى سفن حاويات! بس أكيد طبعا الحكايه محتاجة تخطيط كتير ودعم بجد من الحكومه, مش هنعمل ناصحين ونصنع عربيه من الأول على طول زي الرمسيس كده وبعد 5 سنين نرميها في الزبالة..
المفضلات