الموضوع: دعوة لصناعة أول سيارة مصرية

انا مش فاهم ايه الاهتمام ده بصناعه عربيه مصريه
يعنى الدول اللى مبتصنعشى عربيات جرالها ايه
فى صناعات كتير اهم من صنع عربيه مليون مره وممكن تتميز فيها
لكن نصنع عربيه وفى الاخر ملهاش سوق لانك لاتمتلك المميزات اللى تخليك تقدر تنافس بيها فى السوق العالمى او الداخلى

يااستاذ مصاص الدماء
الصين وكوريا لما بداوا يصنعوا عربيات قبلها بسنين طويله كانوا بيعتمدوا على الصناعات المغذيه وقطع الغيار فقط لحد لما اخدوا الخبره فى هذا المجال
شوف احنا بنشترى الفوانيس الصينى والقطع الصينى من امتى والعربيات ظهرت امتى
طور الاول الصناعات المغذيه للسيارات وافتح سوق ليها فى الخارج ولما تحس ان بضاعتك ليها قبول عند الشركات العالميه تبقى سعتها تفكر تصنع عربيه فعلا
لكن يا اخى الفاضل انت هنا مابتعرفشى تعمل فردة كوتش عدله ولا جنط حديد من غير مايطلع فيه رفه ولا عمرنا شوفنا فانوس عربيه حتى يبقى عاوز تنافس ازاى
وبعدين عزيزى صناعة العربيات اصبحت صناعه تجميعيه بالاساس
اظن مافيش اكتر من الرولزرويس اللى بتصنع محركات الطائرات لما حست ان انتاجها الصغير 3 او 4 الاف عربيه فى العام مش حيغطى تكلفة تطوير وتصميم محرك جديد لعربياتها حيزود من التكلفه جدا استخدمت محركات بى ام دبليو

يعنى بمعنى اصح العربيات اصبحت ملهاش اصل
تلاقى الماركه اساسها امريكى ومملوكه لشركه صينى والمحرك المانى والشاسيه يابانى والفتيس فرنساوى والفرامل ايطالى وبلد المنشأ اللى اتجمعت فيها العربيه ماليزى

وجاى تقول نصنع عربيه مصريه 100 % طبازاى بعد اللى بيحل فى العالم ده كله

وبعدين بعد انقلاب 1952 عبد الناصر قال انا عاوز انشىءبلد صناعى
خد الارض من اصحابها ووزعوا نصفها عليهم والباقى فدانين تلاته لكل فلاح بنى عليهم بيت والباقى من الارض مبقاش عارف يزرعه صح علشان صغر حجمه وكبر تكلفة وانخفض الانتاج الزراع وبقينا بنستورد اكتر من نص اكلنا
يعنى لاحصلنا نبقى بلد صناعى ولا استنينا بلد زراعى
ياعزيزى انت حتى الصناعات اللى كان عندك فيها ميزه تنافسيه زى المنسوجات لان القطن بتاعك احسن قطن فى العالم انهارت
الصناعات الغذائيه انهارت حتى علب الفول بتستورده من بره ( اللى هما بياكلوه للبهايم بره )
فاضل ايه تانى فكرنى لانى مش فاكر والله
انا بقول رايى يا اخوانا وده اللى انا شايفه ان الحكم بتاع الثوره اللى كان اخره نظام مبارك قضى على البلد فى 60 عام نهائيا ولازم نفكر صح من غيرحماس زياده وشعارات لاتودى ولا تجيب ونشوف ايه اللى متاح لنا دلوقتى وحيجيب نتيجه ايجابيه ونبداء بيه
مش تقولى دعوه لصناعة اول سياره مصريه ,, طب منين ياحسره

عارف
احنا ممكن نعمل اى حاجة فى السيارة عدا المحرك لانة عاوز تكنلوجى عالى اوى
احنا بس نبدا نقفل سيارات صح لان التقفيل المصرى صراحة عار على السيارة وبيقلل تمنها اوى
دة انا سمعت ان فى مصنع تويوتا هايتعمل فى مصر والناس كلها جلها احباط وقالو خسارة العربية دى كانت كويسة
لازم فعلا نعرف اخطانا
ولو انى من انصار واصحاب الراى اللى بيقول مستقبل مصر فى الزراعة مش الصناعة