الموضوع: حل لمشكلة الخرابيش

لو الخرابيش لونها اسود ده معناه انها شالت البوية و اللون ده لون الفبر بتاع الاكصدام
صحيح ده اقوي نوع خدوش و مستحيل تتداري 100% بس انا ان شاء الله اداريها 80% مثلا ...
بس ده اسهل واحد يتعالج الصراحة ... (خد مني عن تجربة و توكل على الله)
بص يا سيدي
حتروح لأي حد بتاع دوكو و تجيب منه شوية بوية بنفس كود لون عربيتك .. و تحطهم فأي ازازة (افضل حديد) و تبقى قافل عليها كويس عشان متنشفش ... العلبة حتكفيك كتيييييييييييييييير طبعا ... الحوار ده حيكلف 15 جنيه مثلا
و تجيب فرشة الوان مية من اي مكتبة بس تكون رفيعة
و بوليش ابيض (كومباوند)(ماركته ميدو او حاجة زي كده صناعة مصري) العلبة بحوالي 5 جنيه و بتكفي مرات بالهبل برضه .. من عند اي حد بتاع حدايد و بويات ...
و اخيرا ... شمع ..
حتعمل الاتي
تنضف مكان الخدش كويس الاول ...
تجيب البوية و الفرشة و تطلع و تمسح على ورقة .. تعمل الحوار ده كام مرة كده لحد ما البوية الورقة تتبل منها و تنشف حبتين
تبدا واحدة واحدة تحك الفرشة في البوية و تمشي عالخدش (بالراحة و اوعى تنزل بوية كتير على الخدش عشان ممتعملش بقع او لطخ كده)
استنى لما البوية تنشف
عدي على البوية المدهونة و البوية السليمة اللي حوليها بالكومباوند عشان تخليهم سطح واحد و ناعم
امسح الكومباوند
حط الشمع عالخدش و المنطقة المحيطة
امسح تاني
ادعيلي ....



اتمنى اني اكون افدتك ....

مساء الفل يازعيم
ربنا يبارك لك بس ليا كذا استفسار هوا ايه الشمع المطلوب ؟ يعني منين بيتجاب

متابع لاني عندي خدوش غبية

المشاركة الأصلية كتبت بواسطة party_0000

مساء الفل يازعيم
ربنا يبارك لك بس ليا كذا استفسار هوا ايه الشمع المطلوب ؟ يعني منين بيتجاب

بص يا سيدي ..
الشمع ده مادة بتغطي فوق البوية عشان تحميها و فنفس الوقت تديها لمعة
عندك نوع ب 5 جنيه حتجيبه من اي محل بويات و حدايد اللي حتجيب منه البولش الابيض (حتقول للراجل اديني بولش اصفر بتاع العربيات او تقوله شمع عربيات)
و في انواع اجنبي بتبقى علبة اكبر و انضف بحوالي 20 او 30 لحد 70 جنيه حسب الماركة
بتلاقيها في البنزينات الكبيرة او كارفور او داندي مول و الحتت دي ...

شكرا على المعلومة