السلام عليكم
محتار بين مازدا فاميلى 2000 ولانوس ايه رايكم
عرض للطباعة
السلام عليكم
محتار بين مازدا فاميلى 2000 ولانوس ايه رايكم
مازدا افضل بكل المقاييس..
عيبها الوحيد اعادة البيع صعبة جدا وقطع الغيار قليلة بس موجودة ومش غالية على حسب كلام واحد قريبي كانت مغاه العربية دي...
وعليكم السلام ورحمة الله
أحب أنقل لحضرتك تجربتي الشخصيه بالنسبه للعربيتين
العربيه المازدا لا يعلي عليها هي حاجه كده مصنوعه صح أوي لكن كانت بتوريني أيام غريبه جدا لو نويت الصيانه
قطع الغيار تعتبر محتكره من بعض الأشخاص المجهولين بالأضافه لغبور طبعا
قطعة الغيار لما تلاقيها عند حد تلاقيها غاليه جدا مثال بسيط قاعده الموتور الواحده ب 1200 أنا عارف ان قواعد الموتور مش هاتتغير كل يوم لكن اللي حصل
خرطوم الهوا ب 360 جنيه وساعتها بالصدفه لقيت خرطوم هوا الماتريكس عندي نفس الخرطوم مع أختلاف بسيط في الطول وجبته ماتريكس ب 180 جنيه
والي يضايق جدا بقي أن مفيش ميكانيكي بيعرف يفك فيها مسمار ولو قدر و فكه مبيعرفش يربطه زي ما كان
و أخيرا مشكلة البرجله العربيه مبرجله ولا حد عارف يظبطها حتي التوكيل في قليوب ولا بيعرفوا فيها حاجه أنا عارف أنه كل ده مش عيب فيها او صناعتها وعيب في توكيلها
لكن العربيه دي
مواد خام عاليه الجوده
موتور قوي جدا وروحه طويله وعزمه عالي جدا .....مفيش عربيه 2011 بتقدر عليه مع انه ملغبط ومش مظبوط ومبيفرقش معاها التحميل
الصالون في غاية الفخامه عمري ما أرتحت في كرسي زي الكرسي بتاعها
الصاج قوي
الرفاهيه و الأبهار عاليه
التكييف تلاجه
البنزين عالي شويه علشان ال 2 كامه لكن مش حوت يعني
قطع الغيار معمره
أعادة البيع هاتلاقي العربيه بتحبك أوي و مش راضيه تتباع بسهوله
أما اللانوس
قطع غيار موجوده رخيصه
توكيل بيشتغل فيها
الموتور علي قدها يعني مناسب ليها
الراحه والاتساع لاتقارن بالمازدا
القوه والصاج ضعيف نسبيا لكن الواحد مش هايحارب
أعاده البيع سهله
علي العموم لو حضرتك محدد ميزانيه تسمح لأقتناء المازدا ورعايتها يبقي المازدا
أما لو مش مستعد بلاش
ولو حضرتك صبور وبتحب المغامرات والأستكشافات وتقدر تدور علي قطع الغيار يبقي المازدا
لو حضرتك هاتشتري مش للبيع يبقي المازدا
لكن ركز علي عربيه تكون حاله ممتازه لا ترضي بالحاله الجيده جدا
و أبقي طمنا
السلام عليكم
عندي استفسار صغير
هو حضرتك كلامك كله ده على المازدا فاميلي ولا على المازدا عامة؟؟؟؟؟
و كنت عاوز ايه حكاية العربية مبرجلة دي؟؟؟بش فاهمة بجد؟؟يعني بيكون فيها ايه مثلا عشان حضرتك تقول عليها كده؟؟؟
و ايه حكاية ان الماتور متلخبط و بش مضبوط؟؟؟؟؟
و هل لما العربية يبقى فيها 2 كامة,استهلاك البنزين بيزيد؟؟؟؟؟
طب هي مثلا بتستهلك كام كيلو في الصفيحة(20 لتر)؟؟؟؟
معلش اسالتي كتير,بس عاوز افهم من حضرتك حاجات بش فاهمها
و تقبل مروري
شكرا ياجماعه علي الردود الجميله وفي انتظار المزيد.
متشكر جداااا لردك و ذوقك يا استاذ حسام
معلش حسألك كام سؤال تاني كده:oops1:
هي المازدا فاميلي 2000c.c ,صح؟؟؟
طب هي المازدا 3 اتنين كامة برده؟؟؟؟
و ياريت لو حضرتك تعرف استهلاكها كام للصفيحة بالنسبة للاتوماتيك ياريت تقولي
و لو اي حد من الاعضاء عارف استهلاكها كام ياريت يقولي بعد اذنكوا؟؟؟؟
الفايلي 1600 والمازدا 3 بردو..
المازدا 3 بتعمل 200 كم في الصفيحة وسط البلد لو استخدام خفيف من غير كيك داون ولا حرق عالغيارات..
عالطريق سرعة ثابتة 90-110 كم/س بتعمل 250 او اكتر في الصفيحة..
بس مع الحرق سواء وسط البلد او عالطريق ماتحسبلهاش احسن..
بالنسبة لمشكلة البرجلة اللي عند استاذ حسام:
تكشف على الحاجات دي وان شاء الله تطلع واحدة منهم..
بوجيهات وموبينة عند الكهربائي..
ايدل كونترول كهربائي او ميكانيكي..
فلتر بنزين وطرمبة بنزين...
الاحتمال الخير بس بعيد شوية يكون في رشاش بنزين بايظ..