محلات قطع غيار بروتون فى الأسكندريه

**densfog** · 29-03-2011 02:08 AM

السلام عليكم ورحمه الله وبركاته

بعد البحث المضنى نوصلت الى بعض اماكن لبيع بعض قطع الغيار للبروتون وبالأخص الجين 2 بالاسكندريه وهى كالتالى :

شركه الحرفه التجاريه (محامى: محمد سالم الحرفه)

25 صلاح الدين - العطارين
034942842 - 033927357 - 0123130386

اسعاره معقوله وعنده بدائل لقطع الغيار مثل سير تقسيمه يابانى وانواع تيل مختلفه

شركه اولاد الباجورى ( الحاج : عبده الباجورى )

31 صلاح الدين المطل على طومان باى
033929328 - 033625711

مجربتش التعامل معاه

اليابانيه موتورز ( ا/مختار)

38 صلاح الدين - العطارين
033935010 - 0124156927

مغلوانى اوى ومينفعش معاه غير انك تحسسه انك لاقيت قطعه الغيار بره بارخص من كده بكتير وتذكرله المكان والسعر ... نزلت معاه 100 جنيه فى تمن بلى العجل الأمامى لما عرفته انها بتتباع بره ب 150 الواحده مش ب 200 زى ماكان عاوز يبيعها وبالمناسبه عنده التيل الأمامى fbk ب200 جنيه بالرغم من انه بره ب 150جنيه (ياريت لو حد راحله ميقولوش انى بقول عليه كده علشان هو يعرفنى شكلا بمعنى اصح متلبسنيش فى الحيطه يمكن احتاجله :))... بس بصراحه بينفع فى الزنقات علشان ممكن يجيبلك حاجات من القاهره ويمكن فى نفس اليوم زى لما كنت محتاج كبوت جابهولى فى نفس اليوم بس ادفع ىبقى

الحاج شوقى مزروعه

الأزاريطه الشارع اللى قبل محطه ترام الأزاريطه وانت جاى من محطه الرمل بجانب مركز خدمه شغال فى الهوندا

راجل محترم جدا واسعاره كويسه جدا بس البضاعه عنده قليله شويه ... ممكن ينفع لو مش مستعجل
يبلى العجل الأمامى 150 جنيه الواحده و التيل ال fbk الأمامى ب 150 جنيه وتقريباالخلفى زيه بس ماكنش عنده
وعنده سير دينامو كورى ب 90 جنيه واشتريت من عنده فوانيس اماميه بحوالى 240 جنيه الواحد من فتره

الكسار للسيور

فى شارع عمودى على صلاح الدين وهو مشهور هناك

اشتريت من عنده سير الدينامو ( المانى ) فى حدود 120 جنيه على ما اتذكر

الحاج / عطيه البيبس

قريب من ميدان الساعه فيكتوريا

035260691 - 0101598381 -0121826318

شغال فى المستعمل (بيقطع عربيات فى استراليا وبيجيبها على كلامهم ) غالى طحن فى معظم قطع الغيار فى بعض الأحيان اغلى من التوكيل ويتطلب فصال معاه بس متحسسوش انك واقف عليه وان الحاجات دى موجوده بره ... بس بصراحه نفعنى فى زنقات كتير جدا زى باب خلفى شمال و خرطوم تكييف ... حاجه تانيه هما مش عارفين الفرق بين موديلات الجين 2 قبل 2009 وبعدها فلازم تكون مركز وتعتمدش على خبرتهم

**densfog** · 29-03-2011 02:24 AM

سمعت ان محل الراعى اللى فى القاهره ليه فرع فى الأسكندريه تقريبا ناحيه سيدى بشر ياريت لو حد عرف يجيبلنا معلومات عن الموضوع ده يذكرهالنا هنا لتجميع الفائده

**sleepyhammer** · 29-03-2011 12:05 PM

شكرا يا باشا على المعلومات
ويارب قطع غيار الساجا تنزل زى الجين 2 كده

**tamerosman** · 29-03-2011 07:55 PM

برجاء التثبيت

**powerofhelll** · 29-03-2011 10:09 PM

الراعي في شارع 45 في وش الكنيسه
و شغال في البروتون و الاسكودا و الفولكس

**densfog** · 31-03-2011 07:28 PM

شكرا للردود ,,,,, والف شكر على معلومه الراعى

**powerofhelll** · 01-04-2011 03:13 AM

العفو اي خدمه

**RedBull_30** · 02-04-2011 08:46 PM

الراعي قالي ان مكنة رفع الزجاج الخلفي مستعملة ب 400 جنيه وهو دايما بيقارن اسعاره باسعار التوكيل وعارف اسعار التوكيل كويس اوي واول ما بدأ كان بجد تاخد منه الاسعار ارخص من اي حد لغية ما بقى ليه اسم وبعدين بقى مغلواني جدا ..

**densfog** · 03-04-2011 06:16 PM

المشاركة الأصلية كتبت بواسطة redbull_30

الراعي قالي ان مكنة رفع الزجاج الخلفي مستعملة ب 400 جنيه وهو دايما بيقارن اسعاره باسعار التوكيل وعارف اسعار التوكيل كويس اوي واول ما بدأ كان بجد تاخد منه الاسعار ارخص من اي حد لغية ما بقى ليه اسم وبعدين بقى مغلواني جدا ..

انا برضه على ما أفتكر سألته بالتليفون عن كبوت وبالرغم من انى علرف انه تقليد مش اصلى كان عاوز يديهونى بفرق 100 او 200 جنيه عن التوكيل ..... عامه متعرفش ممكن تضطر ليه فى يوم من الأيام ...... بصراحه بيتهيألى موضوع قطع الغيار للبروتون فى القاهره احسن من عندنا بكتيير

**porsche911eg** · 04-04-2011 03:29 PM

علي فكره في محل شركه المختار بجانب المدرسه الالماني هناك اسموا كريم عندو معظم حجات البروتون و احسن اسعار في السوق و الجوده و عن تجربه صلاح الدين بجوار المدرسه الالماني ..