المشاركة الأصلية كتبت بواسطة م/مصطفى محمود
دكتور محمد ، أنا قولت لحضرتك إني من مؤيدين التجنيد الإجباري ، ويعلم ربنا إن أنا كان نفسي أدخل الجيش (علشان هدف ورؤية) والحمد لله هدخل
بس لو بصينا للموضوع بنظرة عقل وحكمة هنلاقي إن لازم مرتبات الجيش تزيد ، محدش قال أبدا اليومين دول ، أحنا بنتكلم عن المستقبل بإذن الله
حضرتك انا والحمد لله من عائلة متوسطة الحال ، أهلي عرفوا يوفرولي شقة صغيرة وعربية وعلموني لحد ما أخدت شهادة الهندسة فمفيش مشكلة إني أدخل 3 سنيين لأني مش هبدأ بعدها من الصفر
لكن تخيل معايا حضرتك واحد خرج من الجيش عندة 25 أو 26 سنة ولسة هيبدأ من الصفر ، تفتكر هيقدر يكون نفسة ويجهز نفسة ويشتري شقة فى خلال قد أية ؟؟؟؟
يا دكتور محمد أنا والله مؤمن جدا إن ده واجب ، وانا والله داخل وانا هدفي فعلا إن ده واجب وطني و أننا بنعد لهم القوة و و و ، بس لازم نبص للموضوع بنظرة موضوعية ، لازم نوفر للجندي مقومات الحياة الكريمة علشان نفسيتة تبقى مستريحة ، يعني هو علشان هيخدم بلدة يبقى أقل من اللى أخد إرجاء ومش هيخدم فى القوات المسلحة ، انا مش بتكلم عن الأكل أو العيشة جوة ، أنا بتكلم عن المرتب ، عن الخدمات ، على الأقل يبقى في مميزات تفرقة عن اللى لم يخدم الوطن
أزاي أخلي اللى لم يخدم فى الجيش مستواة أفضل من اللى هيدافع عن الباقي ، اه ده واجب علينا ومحدش يقدر ينكر ، ومحدش بيقول أنه عايز مقابل أنه يدافع عن وطنة وكل الناس ساعة نشوب الحرب هتدافع بأرواحها عن البلد ، أنا بتكلم عن الفترة اللى هبقى فيها فى الخدمة ، الفترة اللى أنا بخدم فيها البلد في وقت الإستقرار ، واللى ناس كتيرة بتبقى فى نفس الوقت بتعيش حياتها عادي
صدقني حضرتك انا والله بفكر زيك بالظبط ، وبقولك إني كنت نفسي أدخل الجيش من قبل الثورة ، وبعد الثورة كتبت إني أرغب إني أبقى ظابط علشان انا شايف أن ده واجب تجاه بلدي ، ولو مفيش فلوس مش هتفرق معايا والله ، بس خد بالك حضرتك إن مش علشان ربنا أكرمني وأكرم حضرتك بشهادة كويسة وبأسرة ساعدتك إن كل الناس كده ، فى أخواتنا كتيير ميقدرشي بعد ما يخرج من الجيش عندة 25 سنة يبدأ من الصفر ، أتمنى من حضرتك تعيد النظر تاني فى الموضوع ، وأفتكر إن الناس دي مش عايزة حق الدفاع عن بلدها ، الناس دي بتطلب العدل وإنهم ميبقوش متأخرين عن زمايلهم لأنهم بس هيخدموا البلد
فكر تاني يا دكتور على رواقة كده ونرجع نتناقش تاني بإذن الله
أخوك مصطفى ، مرشح ضابط إحتياط