ارجو النصيحة : ابيع ولا استنى و اصبر؟

**sss** · 13-04-2008 02:10 PM

عندي لادا95 محتاجة عمرة و مدوخاني محتار ابيعها و اشتري جديد على اد امكانياتي حاليا , ولا اوضبها و امشي بيها لحد 2010 يمكن لما الجمارك تتشال الاسعار تنزل و اكون انا حوشت مبلغ معقول ارجو النصيحة .جزاكم الله خيرا:)

**Hossam_Hassan** · 13-04-2008 02:38 PM

بيع و اشترى على قد امكانياتك و حوش و لو حصلت معجزة فى 2010 و الجمارك رخصت ابقى بيع اللى اشترتها و كمل عليها اللى حوشته و جيب واحدة جديدة

**hazem_khidr** · 13-04-2008 02:59 PM

لو العربيه تعباك بيعها و ريح دماغك
لو الجمارك نزلت و انت اشتريت العربيه غاليه يبقي حتبيع بالرخيص و تشتري بالرخيص.
نفس الوضوع لو انت اشتريت عربيه رخيصه و العربيات غليت يبقي ساعتها حتبيع بالغالي و تشتري بالغالي يعني هيا هيا.
غير كده يا اخي العزيز مفيش حاجه بترخص في البلد

**SEATLOVER** · 13-04-2008 03:05 PM

لا طبعاً اعملها عمرة و ظبطها ...لآن اول الجديد اللى هايقابلك من اول 65 على الاقل
ومتستناش معجزات ..زمن المعجزات انتهى خلاص .

**Xpert** · 13-04-2008 03:08 PM

انا رأيي خليها .. عمر .. و ظبط .. عربيتك و انت عارفها .. و العمره كبيرها 1500 جنيه عندك ... عمرها و سيبها ... و لو حصلت معجزه صحيح و الجمارك فتحت مانتاش خسران كتير بالنسبه لتمن العربيه دلوقتي ....

**hamadaalo2002** · 13-04-2008 03:52 PM

اعتقد انك تعمر لكن الله اعلم اية اللي حيحصل في 2010!

بس يا ريت لو عاوز تبيع ومن الاسكندرية تقول لاني بدور علاي واحده
واللي معاك روسي ولا تركي ؟
وبيتعرف ازاي التركي من الروسي؟

**sss** · 13-04-2008 10:04 PM

انا يا استاذ حمادة من طنطا , لكن بحب اسكندرية اوي طبعا
اما بخصوص العربية فهيا على ما اعتقد روسي لكن للاسف ما اهتمتش و انا باشتريها

**hazem_khidr** · 13-04-2008 10:30 PM

بس يا ريت لو عاوز تبيع ومن الاسكندرية تقول لاني بدور علاي واحده
واللي معاك روسي ولا تركي ؟
وبيتعرف ازاي التركي من الروسي؟

مفيش لادا تركي كل اللي موجود روسي في السوق

**bassam nagy** · 13-04-2008 10:56 PM

عمتا لا تتوقع ان الاسعار هاتنزل لان فى بلدنا الاسعار بتعلى بس
ولو هاتبيع يبقى اتكل على الله والحق الفترة دى قبل ما امريكا تعمل عملتها وتضرب ايران لان احتمال الاسعار يحصل فيها زى ماحصل فى 2003 ساعت ما ضربت العراق

**Akram** · 14-04-2008 11:01 AM

انا رأي إن دا يتوقف على المبلغ الموجود معاك و كم التكاليف اللي ممكن تحتاجه العربية اللي معاك دلوقتى , لأن الموضوع ممكن يكون فيه مصاريف تانية زي تظبيط عفشة أو لو محتاجة سمكرة او دوكو أو فرش .

فلو معاك مبلغ معقول و العربية محتاجة مصاريف يبقى بيع و اشتري غيرها , علشان ترتاح شوية من مواويل الصنايعية , دا غير انك هتوفر لأن اللى هتصرفة مش هيزيد تمن العربية كتير لما تيجي تبيع ,
و يا عم لو حصل أي تعديل في الأسعار عموماُ يبقى زي ما قالك حازم هتبيع رخيص و تشتري رخيص أو هتبيع غالي و تشتري غالي , يعني مش فارقة كتير ,

لكن لو معاك مبلغ بسيط يبقى لم الموضوع و ظبط العربية على قدها ,
و لما ربنا يكرمك بملغ كويس ابقى غير .