الموضوع: طريقة تركيب أرضية جلد للسيارة و عوازل الصوت ( بنفسك )

المشاركة الأصلية كتبت بواسطة sweetheart_

الموضوع جميل وانا بهنيك انك مكسلتش تصوره وتنزله لانى عملت العازل دا فعلا فى ارضية العربيه كلها لحد الشنطه وانا معايا فيورا 86 برده بس الفرق انى مفكرتش ساعتها اصوره بس ممكن نتناقش مع بعض فى شوية افكار وخاصة انى بحب اعمل الحاجه بنفسى زيك كده وتقدر تقول انى فكيت كل حاجه فى العربيه فيما عدا التابلوه والسقف والخطوه الجايه السقف وانا سالت على القماش 25 المتر وسالت على مصنعية لزقه لاقيتها 80 جنيه وبناءا عليه قررت انى اعمله وحتى لو بوظت القماش مرتين او تلاته هتبقى نفس التكلفه بس هتفرق انى اتعلمت وان شاء الله هتنجح التجربه الحاجه الوحيده اللى قلقان منها ان القماش يتوسخ كله من ايدى لو الكله جت على ايدى وبالنسبه للافكار
1-لتجنب الحرارة الخارجه من فتحة فرامل اليد يتم قص قطعة عازل حرارى الفضى على شكل مستطيل صغير ويتم عمل فتحه بالقطر عباره عن قطع طولى واحد بحيث ان يتم ادخال اليد فيها بالضغط الى ان تاخذ حجم اليد وليس اكثر ثم يتم لزقها بالكله على ارضية الفرش .
2-لو حصل واتيحت لك الفرصه عزل الحوض من الخارج عن طريق الفوم لا تتردد مثلا لو حد طلع الموتور يجيب فوم ويلزقه بكله على صدر العربيه قبل ما يسقط الموتور.
3- وضع عازل حرارى فى السقف ودا اللى ناوى اعمله ان شاء الله لو فكيت السقف وعملته.
4-بالنسبه للهوايه ممك عزلها ايضاً عن طريف العازل الحرارى الفضى نفك الهوايه ونفصل الفوم عليها ونلزقه بالكله ونركبها ونجيب الهوايه اللى بتركب على الكبوت ويا سلام لو المروحه شغاله يبقى احسن من الكتمه اللى بتبقى جوه العربيه فى الحر اينعم الهوا مش هيبقى ساقع بس اهو هوا كانك واقف بره العربيه ولو طلبت معاك حط ازازتين ميه بلاستيك متجمدين فى الهوايه جوه الكبوت ههههههه دا لو مزنوق اوى يعنى.
5-الاهتمام بحالة الريداتير ودا انا ناوى اغيره بواحد تلاته ماسوره وبفكر احط ميه خضره عشان فعلا بتفرق فى التبريد وفايدة دا انا العربيه هتسخن اقل يعنى بد ما المروحه كل ربع ساعه تشتغل ممكن تبقى كل نص ساعه وبكده ترحم نفسك من الصهد بتاع الموتور يعنى هتريح الموتور وتريح نفسك.
6-بالنسبه للصوات يجب ربط جميع اجزاء العربيه كويس خاصة اى مسمار او صاموله يعنى مثلا لو الشنطة بتخبط رجلش القفل واحبكها متخلهاش تخبط الابواب نفس الموضوع والمسوجر بتاع الباب لو بترعش فى المطبات ويعمل صوت غيره وهات المسوجر اللى على اد الفتحه
فى كمان لزق بيتحط على الصاج بيكتم الصوت مثلا على صاج الابواب من جوه او الشنطه انا شفته فى عربيات زيرو بس لحد دلوقتى مش لاقيه ياريت حد يدور معايا هو عامل زى الجلد بس تخين وبيكلبش فى الصاج وفايدة بيكتم اى صوت خبطه او رنه للصاج.
بس دى شوية افكار ويا ريت اللى عنده افكار يقولها عشان نستفيد وانا اخوكم احمد

منور يا باشا
و انا فعلن مبسوووووووط جدا بمشاركتك دي اوي اوي اوي و علي الأفكار و التجارب المتبادلة
هو بالنسبة لعزل الحرارة من ذراع فرامل اليد انا حليت المشكلة دي من تحت عن طريق سد الجزء المفتوح الخاص بعصا الفتيس و فرامل اليد في العربية من تحت و قمت بسدادها بقطع من الفوم الفضي فعلن و الحمد لله مفيش أي حرارة أو صهد
اما موضوع عزل الحوض بالكامل فطبعا صعبة شوية إنما ممكن عزل بعض الأجزاء و بالأخص السدر من ناحية علبة التكييف و علبة الفيوزات و متور المساحات
فكرة عزل الهويات دي فكرة جميلة برده هحاول افك الهوايات و احط قطع من الفوم و بعدين اركب الهوايات عليها بعد كدة
موضوع الردياتير دة مهم جدا طبعا هيريح كتير فعلن من ناحية السخونة و المروحة إللي كل شوية تشتغل
المشكلة إللي بعاني منها شوية هي الأبواب لأن لما بكون ماشي في شوارع مكسرة او طريق مش مسفلت كويس بحس ان الأبواب بتترج أو بيبقي في أصوات تخبيط خفيف منها
بالنسبة للزق اللي بيتحط علي الصاج من جوة دة جاااااامد منه ميخليش الباب يرن أو يطبل من المطبات و في نفس الوقت يديه صلابة شوية لو انت وصلت لمكان بيبيعه يا ريت تقولنا عليه دة مهم جدا
ألف ألف شكر يا بو حميد علي المشاركة الجميلة دي و أتمني المزيد من الأفكار الجديدة