إعادة تركيب مصابيح الشبورة في سبارك (بالصور)

**ecybrarian** · 03-04-2011 04:34 PM

الحمد لله استطعت ان اركب مصابيح الشبورة بالظبط OEM retrofit وإليكم الخطوات

المطلوب:
- دراع النور Light switch 96540684 سعر تقريبا 187 جنيه
- ريلاي 96590287 Relay سعره 24 جنيه
- مصابيح الشبورة سعره 320 جنيه للواحد في التوكيل وسعره 150 إلى 200 جنيه للجوز (شمال ويمين) خارج التوكيل
- فيوز صغير Fuse 10A
- 3 متر سلك 2 مللي لون اصفر (للفردة الحية)
- 1 متر سلك 2 مللي لون اسود (للفردة الأرضية)
- كليبسات نتاية وترامل حلقية (مدورة)
- شريط لحام او Heat shrink
- مسامير بورمة مش عارف مقاسها كام بس هي نفس مقاس مسامير التابلوه

الأدوات:
- آفوميتير
- مفتاح 10 - مفتاح 7 - قشارة سلك - زردية - قصافة - طقم مفكات صليبة Philips (يعني عدة كهربا كاملة)

داخل الصالون

تركيب دراع النور:
دي صورة الدراع قبل التركيب

ودي صورة الدراع إللي راكب

اولا: فك الـ 3 مسامير في اسفل الغطا البلاستيك المحيط بالقطمة

ثانيا: اسحب الغطا البلاستيك الاسفل لتحت والاعلى لفوق لفك الغطا كاملا
دي الصورة بعد الفك

ثالثا: فك دراع النور عن طريق الضغط على الشفه العليا والسلفى ثم سحب الدراع للخارج مع الضغط على الشفتين..ثم فك السوكت الأبيض الصغير المتصل بالسلك الرمادي

رابعا: لتركيب الدراع الجديد قم بعكس كل الخطوات السابقة وتأكد من أن مؤشر الشبورة مضاء في التابلو

وبكدا الصالون خلص:::

بعد إذنكم ماحدش يعلق لسه التقرير ما خلصش

=====

**ecybrarian** · 03-04-2011 04:34 PM

فك مكان مصابيح الشبورة

هناك اكثر من طريقة للوصول إلى مكان مصابيح الشبورة لكني اكتب هنا اطول الخطوات لكنها الاسهل عند الفك والتركيب
اولا: ارفع العربية على كوريك العجل
ثانيا: فك العجل
ثالثا: فك الكارتيرة خلف الأكصدام تحت الرفرف
رابعا: فك الفوانس الأمامية
كدا تعرف تشتغل بنفس وبدون معوقات
هاتلاقي مكان الشبورة مغطى بغطاء مربوط بثلاثة مسامير بورمة بدون سن مدبب..وهنا تقع يظهر لماذا سنحتاج إلى مسامير زيادة (مسمارين على الأقل) لأن المصباح الواحد يحتاج إلى اربعة مسامير وليس ثلاثة لتركيبه كما يظهر في الصور
صورة الغطاء بعد الفك

وصورة مصباح الشبورة (منقوله)

اخيرا: الأفضل عدم تركيب المصابيح في الأكصدام حتى الانتهاء من عمل الضفيرة

:::
بعد إذنكم ماحدش يعلق لسه التقرير ما خلصش

**ecybrarian** · 03-04-2011 04:35 PM

تنفيذ الدائرة زي الكتاب ما بيقول

صورة الدائرة الكهربائية كما يجب ان تكون (الفابريقة)

ملحوظة الريلاي لازم تجيبه من التوكيل لأنه مختلف تماما عن الريلهات العادية ودي صورته

صورة علبة الفيوزات ويظهر مكان فاضي لريلاي الشبورة الأمامية

من صورة علبة الفيوزات يجب التأكد بالآفو من التالي:
- اولا: الفتحة المكتوب عليها 30 متصلة بمكان الفيوز المكتوب عليه 10
- ثانيا: الفتحتين 86 و85 فيهم تيار مع تشغيل نور الشبورة من دراع النور
- ثالثا: اختبار الفتحة 87 قصة كبيرة لكن مهمة للتركيب فيما بعد (انظر خطوات تركيب الضفيرة)

تركيب الضفيرة:
- اولا: فك علبة الفيوزات عن طريق الكليبسات التي عليها دوائر زرقاء في الصورة السابقة.
صورة علبة الفيوزات من اسفل بعد الفك والسهم يشير إلى مكان توصيل سلك الفردة الحية لمصابيح الشبورة. الفيشة البني هي الكونيكتور رقم C103 في الدائرة الكهربائية اعلاه

- ثانيا: فك الفيشة البني بمفتاح (لقمة) مقاس 7 ويظهر في الصورة الفتحة رقم 26 التي يجب ان يركب فيها الكليبس الموصل للسلك الأصفر لمصابيح الشبورة (الفردة الحية)

-ثالثا: اغلب الكليبسات في السوق حجمها اكبر من ان تدخل في الفيشة البني، لذلك يجب تصغير حجمها بالضغط عليها لتهيئتها للدخول في الفيشة. يظهر في الصورة الحجم الكبير للكليبسة

- رابعا: تركيب السلك الأسود بالوصلات الأرضية G101 وG102. يقع G101 خلف الفانوس الأمامي الشمال وG102 خلف الفانوس الأمامي يمين. الصور تبين G102 داخل الدائرة الزرقاء خلف الفانوس الامامي يمين (معذرة في خطأ مكتوب G101 بس هوG102، على العموم الأتنين في نفس المكان خلف الفوانيس)

- خامسا: التأكد من ان سلوك الضفيرة مثبتة وواصله للمصابيح كالأتي قبل تركيب المصابيح
- سلك اسود من خلف الفانوسين (من G101، G102) إلى فتحتي مصابيح الضباب
- سلك اصفر من علبة الفيوزات إلى فتحتي مصابيح الضباب

سادسا: توصيل السلوك بالمصابيح ثم تركيب مصابيح الشبورة بأربعة مسامير للمصباح الواحد في الأكصدام وتوصيلهما بضفيرة السلك

سابعا: اختبار مصابيح الشبورة :
- تركيب الفيشة البني C103 في ضهر علبة الفيوزات والتأكد من تثبيها جيدا
- تركيب الريلاي
- تركيب الفيوز (احذر تركيب الفيوز قبل التأكد من ان كل السلوك معزولة ومثبة في مكانها وياريت لو تقيس التوصيلات بالآفو قبلا)
- ادخل صالون العربية وجرب تفتح نور الصالون
- ادعو لي :-))

ثامنا: واخيرا قفل بقى الشغل والفوانيس واي حاجة شكلها مش تمام او مش مظبوط. وتذكر تقفيل الشغل اهم حاجة وهو دليل الفهم والنضافة والنظام