نفسى أعرف الناس بتشترى موبايلات غالية ليه..يا ترى تستاهل!؟

دعوة للحوار ليه الناس بتشترى موبايل وتدفع فيه آلافات
فياريت نتحاور هل فعلا فيه مزايا بتستخدم تستاهل ان الواحد يدفع فى موبايل فوق الألف جنيه
علما بأن فيه موبايلات كتيرة فى حدود الألف جنيه وفيها كل المواصفات من حيث الشكل والتاتش الجيد و الواى فاى والكاميرا (مع اننى لا أقتنع بجودة كاميرات الموبايل مهما كانت كويسة الا انها بتتميز انها بتكون مع الواحد فى اى وقت وفى اى مكان فصورة الكاميرات الديجيتال افضل على الإطلاق) كذلك يوجد بالموبايلات دى امكانيات مختلفة بالنسبة لموضوع الصوتيات الخ من امكانيات
هدف التحاور هو ان نشترى ما نحتاجه فقط ونستخدم باقى الفلوس فى شراء اشياء أخرى علما بأن الموضوع ليس له علاقة بواحد غنى او بواحد مش غنى القصة قصة مبدأ
شكرا والله الموفق

فوائد المحمول الجديدة الغالية كتير زي النت والميل والاوفيس وللأسف متطلبات كتير من الناس بتحتاجها عشان تواكب العصر الحديث والسرعة...دلوقتي بقي ممكن يكون عدم ردك علي ميل في غير مصلحتك المهنية لأن التكنولوجيا موجودة...ملكش عذر

أنا معاك شايف إن اللي مش محتاج الخدمات دي أحسن أنه يوفر فلوسه في حاجة أفيد ليه..هي بس بقت موضة وناس كتير بتمشي وراها
في نفس الوقت أنا شايف أن التكنولوجيا دي بتقلب حياة الإنسان لجحيم

بالاضافة الى الرد السابق ولكن ناس بتعتبره مكمل للشخصيه

أنا أقصد ان الإحتياجات الأساسية موجودة بالفعل وانا معك ان منها الإيميلات

بالنسبة للإيميلات فيه اجهزة كتير بتدعم الإميلات وبتبدأ من ال 800 جنيه

كذلك يوجد اجهزة تدعم قراءة ملفات الأوفيس والأدوب ريدر

بصراحة ماليش في الموبايلات اوي..انا لسه معايا نوكيل 6630
بس الفرق في السعر بنفس الامكانيات اكيد له مبرر..من جودة أو صناعة أو سهولة إستخدام

هى نسبة و تناسب.... كل ما زادت احتياجاتك كل ما كان الموبايل اللى بيحققلك كل احتياجاتك اغلى و هكذا

اقتباس:

---

المشاركة الأصلية كتبت بواسطة mahora

هى نسبة و تناسب.... كل ما زادت احتياجاتك كل ما كان الموبايل اللى بيحققلك كل احتياجاتك اغلى و هكذا

---

علشان كده عاوز اعرف ايه الحاجات دى اللى ممكن الموبايلات الغالية تحققها عن الموبايلات اللى سعرها فى حدود الألف جنيه او تزيد قليلا

بص ياباشا الموضوع لة كذا جانب كالتالى
1- فية تكنولوجيا جديدة ونظم تشغيل وبرامج ما ينفعش تشتغل الا على امكانيات عالية
2-شاشة الموبيل وحجمها
3-فية ناس بتمل من الموبيلات بتاعتها وبتحب تغير
4-منظرة قصاد بقية البشر

اقتباس:

---

المشاركة الأصلية كتبت بواسطة mmmero

بص ياباشا الموضوع لة كذا جانب كالتالى
1- فية تكنولوجيا جديدة ونظم تشغيل وبرامج ما ينفعش تشتغل الا على امكانيات عالية
2-شاشة الموبيل وحجمها
3-فية ناس بتمل من الموبيلات بتاعتها وبتحب تغير
4-منظرة قصاد بقية البشر

---

جبت المفيد ياميرو واللهي

إخوانى الأفاضل نتفق على شئ
أننى مش ضد الموبايلات الغالية بس عاوز الإخوة الأفاضل اللى عندهم تجربة بخصوص هذه النوعيات ان ينقلوا لنا خبرتهم بخصوص ذلك
بمعنى آخر يقولوا بيستخدموا ايه من مزايا تكون غير موجودة بالموبايلات اللى فى حدود الألف او تزيد قليلا

بص يا سيدى انا برضه مقتنع انى حرام اجيب موبيل ب أكتر من 800 جنيه
بس احتجت موبيل سمارت عشان اكون دايما قادر اضبط الاجندة و اغير مواعيد الاجتماعات بتاعتى ده غير الميل
اقل موبيل فيه المواصفات المطلوبة كان ايسر Acer و تمنه 1000 جنيه
دلوقت انا نادم جدا على اختيارى و توصلت لانى كان لازم عشان احافظ على مواصفات عالية اجيب حاجة اغلى
ياما بنفس السعر كنت اضحى بالمواصفات
موبيل رخيص و مواصفاته عالية يعنى يهنج و انت شغال و بطارية ما تعيش ساعة لو دخلت على الانترنت و يعنى يبوظ لو بس اتزحلق من ايدك ووقع على السجاد مش البلاط
و كمان شاشة مش حساسة و تطلع عينك و صورتها مش جيدة جدا

اقتباس:

---

المشاركة الأصلية كتبت بواسطة alrabeh

إخوانى الأفاضل نتفق على شئ
أننى مش ضد الموبايلات الغالية بس عاوز الإخوة الأفاضل اللى عندهم تجربة بخصوص هذه النوعيات ان ينقلوا لنا خبرتهم بخصوص ذلك
بمعنى آخر يقولوا بيستخدموا ايه من مزايا تكون غير موجودة بالموبايلات اللى فى حدود الألف او تزيد قليلا

---

الشركات اللى بتصنع مش عبيطة..... الموبايلات الغالية دى بتحطها فى فئة اسمها ال high-end و بتديها اعلى عناية من ناحية تحديث السوفتوير و علاج اى مشاكل و خلافه لان ببساطة دى اكتر فئة بتكسب الشركات..... اما بخصوص المواصفات، خد عندك:
- عندك المالتيميدا مثلا، زى النوكيا n8 كاميرا 12 ميجا يعنى ده الجهاز الليدر من نوكيا فى الموبايلات اللى فيها كاميرات و الكاميرت بتاعته اتعمل فيها شغل كتير و ده ليه تمنه و بالتالى ده بينعكس على تمن الجهاز.
- عندك نظم التشغيل اللى احيانا بتفرض اختيارات معينة فى الهاردوير بتاع الاجهزة زى بروسيسور جيجا هيرتز على الاقل و رامات 512 مثلا.... و ده طبعا لتشغيل تطبيقات معقدة زى ال push mail و ال business applications و هنا ممكن تلاقى حاجة زى الفئة e من نوكيا كلها بتركز على تطبيقات الاعمال للناس اللى عايزة مكتبها يبقى معاها باستمرار.
- عندك الهاردوير و ده برضه ليه تمنه.... يعنى جهاز زى الجالاكسى S من سامسونج شاشته من افضل الشاشات فى العالم..... و حاليا البروسيسورز و الرامات فى الطالع باستمرار و كله بتمنه
و هكذا

شكرا لردود الأخوة الأفاضل
ولكن هل انا محق لو قلت ان مفيش لحد دلوقتى شئ يقنع انى أدفع فى موبايل اكتر من الف جنيه هل فيه حد متفق معى

فيه أسباب كثيرة ها أقولك ألي على بالي دلوقتي
- مايكرسوفت أوفيس بتطبيقاته .......عمل بريزنتشن بالبور بوينت .....أمكانية عرض على شاشات هاي ديفنيشن عن طريق وصلة الHD في الموبايل وعلى شاشة أل سي دي أو الأحدث يعني موبايلك أغناك عن لابتوب أو جهاز بلو راي
-كاميرات أقوى 12 ميجا
-أمكانية عرض لأي ملتميديا زي مثبلا أحتفاظك بأفلام أو مسرحيات أو برامج دينية أو مناسبات شخصية على موبيلك أو على فلاشات والموبيلات فيها خاصية قراءة الفلاشة عن طريق اليو أس بي زي e7 مثلا
أنا معاك أن في كثير بتجيبه كده مش علشان أسباب جوهرية ودي النسبة الأكبر أغلب الظن
بس فيه ناس بتستفيد بيه فعليا

احترم وجهة نظر صاحب الموضوع جدا و رأيى انك ماتشتريش الا الحاجه بالضبط اللى انت محتاجها
بالنسبه لى انا بحتاج حاجات كتير فبضطر برضه اشترى حاجه غاليه و كل حاجه فى المواصفات اللى بشتريها بيبقى ليها سببها

بالنسبة لي كنت عايزة موبايل فيه كاميرا كويسة
من 3 4 سنين اشتريت ان 73 كان ثمنه فوق ال 2000
وكاميرته 3.2 ميجا بس لكن مقتنعة بيها وبجودة الصورة الى الان
وشايفة انه كان يستحق ادفع فيه المبلغ ده وقتها وافضل من اني اشتري كاميرا ديجتال حتى لو الرزوليوشن اكبر لانه في ايدي على طول وسهل اسجل بيه اي موقف ظريف على سبيل تسجيل ذكريات جميلة

والله انت اللي بتحدد احتياجاتك وعلي اساسها بتحدد المميزات اللي عاوزها

وبالتالي كل ماركة فيها المميزات دي هتلاقيها بسعر معين

يعني لو علي اد تسجيل نمر كتير وارسايل وترد علي مكالمة يبقي اي تلفون ب 300 جنيه زي الفل


انا مثلا محتاج وايرليس وايميل في التفون بتاعي

في تلفونات كتير فيها الموضوع دا بس تقتدر تعمد علي تلفون اكتر من التاني

يعني البطارية بتقعد لاد ايه في المكالمات

الضمان والسوفت وير بتاعه

وخامة مواد التصنيع


دا التفكير العملي

اما ممكن ناس تجيب تلفون علشان دا اغلي تلفون في السوق
او اخر تلفون نزل في السوق

الموبايلات بالذات حسب اهتمامتك ونوعية استخدامك ليها
بالنسبة لشغلي يحتم عليا امتلاك موبايل بأنترنت وايرلس وايميلات وماسنجر اون لاين دائم
والدخول على النت من اي مكان من جهاز صغير فى جيبك دون حمل اللاب توب . لانى بقدم خدمات لعملاء لها علاقة بالانترنت والهوستينج وخلافة
وحصل موقفين كان المنقذ هو الانترنت الوايلس .. جربت اجهزة كتيرة جدا حديثة وقديمة ورغم ان كان معايا HTC
الا انى قعدت فترة طويلة من بعدة بموبايل صيني :grin54: .. وحاليا معايا i phone وباردو معايا الصيني .. الموضوع مش قدرتك المادية اية .. الموضوع استخدامك لة اية ؟ وهتستفيد منة اية ؟ وهل بيساعدك فى شغلك ويعوضك على تمنة . ويساعدك فى عملك ام عائق مادي عليك . اما موضوع الشكليات فدى حسب الشخصية .. عن نفسى مثلا
لو بهتم بالشكليات مكنتش هبيع HTC دايموند و LG HD واشتري صيني واستخدمة لفترة طويلة . اما عن افضل الاجهزة الذكية حسب تجربتى هى HTC والبلاك بيري رغم عيبة الوحيد وهو شكلة الرخم
ثم اي فون تو بجدارة وبقوة .. الا ان عيبة لا يستحمل المعاملة المصرية .. عايز حرص شديد

انا بصراحة كل الى يهمنى فى التليفون النت مش اكتر من كدة
الكاميرا استخدامها عادى جدا
وحاليا لقيت تليفون فية الى انا عاوزة بسعر 1000 لاانى بصراحة كنت مقرر انى مشتريش تليفون يتعدى 1100 علشان الموضوع مستفز
وملوش قيمة

اقتباس:

---

المشاركة الأصلية كتبت بواسطة alrabeh

دعوة للحوار ليه الناس بتشترى موبايل وتدفع فيه آلافات
فياريت نتحاور هل فعلا فيه مزايا بتستخدم تستاهل ان الواحد يدفع فى موبايل فوق الألف جنيه
علما بأن فيه موبايلات كتيرة فى حدود الألف جنيه وفيها كل المواصفات من حيث الشكل والتاتش الجيد و الواى فاى والكاميرا (مع اننى لا أقتنع بجودة كاميرات الموبايل مهما كانت كويسة الا انها بتتميز انها بتكون مع الواحد فى اى وقت وفى اى مكان فصورة الكاميرات الديجيتال افضل على الإطلاق) كذلك يوجد بالموبايلات دى امكانيات مختلفة بالنسبة لموضوع الصوتيات الخ من امكانيات
هدف التحاور هو ان نشترى ما نحتاجه فقط ونستخدم باقى الفلوس فى شراء اشياء أخرى علما بأن الموضوع ليس له علاقة بواحد غنى او بواحد مش غنى القصة قصة مبدأ
شكرا والله الموفق

---

أتفق معاك في وجهة نظرك .. و الغريب حقيقي ان كثير من الاوروبيين و الاجانب اللي بييجوا مصر و تشوف موبايلاتهم تستغرب .. تلاقي معاهم موبيلات تم انتاجها من اكثر من 5 سنين مثلا و مش غالية و في نظرنا هنا انها متخلفة .. الناس برة بتشتري على قد الاحتياج .

بالفعل سوق الموبايل بيسحب فلوس كتيرة فنفسى كل واحد يشترى اللى يحتاجه بس
وعلى فكرة انا مصرحتش فى البداية اننى مهندس كمبيوتر وبرمجيات
وانا عملت الموضوع ده لما سألت كل اللى قابلتهم بتستخدموا ايه من امكانيات الموبايل اللى معاكم ومش موجودة فى الموبايلات الأرخص فلم أجد أى استخدام الا ويكون كله موجود فى إطار الموبايلات التى لا يزيد سعرها بأى حال من الأحوال عن 1500 جنيه وده فى أعلى المواصفات ولكن الإستخدامات العملية فإن السعر لن يتجاوز ال ألف جنيه
جعل الله هذا الموضوع فيه نفعا للناس وأن ينر بصائرنا جميعا

في اعتقادي الغالبيه من مستخدمي الموبايل بيجيبوا الموبايل مجرد منظره

اقتباس:

---

المشاركة الأصلية كتبت بواسطة ahmdmagdy

في اعتقادي الغالبيه من مستخدمي الموبايل بيجيبوا الموبايل مجرد منظره

---

+11111111111111111111111111
السلام عليكم
معاك فى موضوع المنظره..........وفى ناس كتييييير بتحتاجها فعلاً
المشكله إن فى ناس بتحاول تخلى نفسها تحتاجها يعنى يجيب موبيل تمنه 5 ألاف جنيه ويوهم نفسه انه رجل أعمال
ويفضل يشيك على الاميلات وهو كل اميلاته ع الجنك ميل.....ماعلينا
شكراً على الموضوع ياباش مهندس

بس حقيقي ولاد لذينا مصنعي الموبيلات مش حاطين كل البيض في سلة واحدة اقصد الامكانيات وتوافق الاحتياجات يعني علشان توفق شوية مواصفات مع بعض ممكن تاخد حاجة اعلي شوية للحصول علي كل المواصفات اللي انت عاوزها في موبايلك وعلشان تطول تواجده معاك لان عمر الالكترونيات قصير الجديد بيغطي عالقديم بزنس بقي مش حيجيبوا من الاخر وكله بتمنه وشكرا لصاحب الموضوع

شخصيا برده مش مقتنع بإني اجيب موبايل بأكثر من ألف جنية ،،

لسبب بسيط ،، غالبا الموبايل مبيقعدشي معايا أكثر من سنتين (( يا يضيع يا يبوظ يا ازهق منه ))

نحسبها كده ،، موبايل جامد من 3000 ل 4000 جنية ،،

علي سنتين يعني في الشهر متوسط 150 جنية ،،

معتقدشي إن الخدمة اللي بتقدمهالي العدة دي تساوي 150 جنية في الشهر ،،

ما بالك بقه إني أدفع المبلغ كاش ،، كاش و فيه مليون حاجة أفيد تصرف فيها هذا المبلغ الكاش

و في الآخر ممكن تناسه في اي حته في ثانية ،، ماشي باربعتلاف جنية في جيبك ،،، مش داخلة دماغي برده

الحل إنك تركز في طلباتك و تختصرها للحد الأقصي و العملي فعلا ،، و غابا هتلاقي موبايل رخيص و جيد بياديها ،،

بس المشكلة فعلا إنه بقه مظهر إجتماعي زيه زي اللبس ،، الناس تقولك ده منظر موبايل تشيله !!!

أشكر لكم ردودكم وأشكر كل من شكرنى
ولو أى حد حب يشترى موبايل يقوللى عاوز فيه مواصفات ايه وأنا أتشرف بأن أقوم بترشيح بعض الأنواع المتوافقة مع المواصفات المطلوبة

الاندهاش من اللى بيشترى موبايل بالفين او تلاتة وليه مش بيشترى بالف

زى بالظبط الاندهاش من واحد بيشترى عربية ب 500 الف بدل من عربيه ب 100 الف مع ان العربيتين هيقوموا بنفس المهمة

الناس طبقات واللى يلزمنى ممكن ميلزمش غيرى

وفيه اللى بيشترى منظرة

وفيه للى بيشترى لضرورة او احتياج

أحب نظرية None or All

* أعتقد القصة مش قصة منظرة لأن أشكال الموبايلات دلوقتى مبقاش فيها اختلافات كبيرة .
* لو القصة قصة نظام تشغيل متقدم وبروسيسور سريع وما الى ذلك ، أعتقد دى حتبقى نسبة صغيرة جدا .
* أعتقد ان فيه ناس كتير بتشترى الغالى لإنها مش قادرة تفهم الموبايل ده غالى ليه والموبايل التانى أرخص منه ليه .
* عدم خبرة من الإخوة مندوبى المبيعات الموجودين بمحال الموبايلات فبالتالى مش حيقدر يساعد فى الإختيار .

أخيرا قد يكون الجهاز الأرخص أفضل وأقل مشاكل من الجهاز الأغلى
كما أن أعلى موديل فى الفئة المتوسطة قد يكون أفضل من أقل موديل فى الفئة الأعلى

هقولك رايي

1_ الموبايلات الجديده او السمارت فون تعتبر لاب توب كامل متكامل رامات وبروسييور وشاشه وحاجت تانيه

2_انا بمل جدا من الموابيل بتاعي

3_ حب مواكبة التكنولوجيا

4_كاميرات بتكون تصور اتش دي وتصوير يعتبر احترافي واشياء اخرى

من ضمن الحاجات المهمة قبل ما تشترى حاجة ادخل على النت واكتب اسمها ورقم الموديل بتاعها متبوعا بكلمة review
وذلك لعرض تقييمات المواقع والأفراد الذين قاموا بشراء المنتج بالفعل وعرض أراءهم

انا اشتريت من فتره نوكيا سي 3 و بسم الله ما شاء الله , بلوتوثك , موماريك لحد 8 جيجا , وايرلسك ,كاميرتك ال 2 ميجا حلوه برضه , و انصح اي حد يشتريه , و كل ده ب 800 جنيه بس