-
الف مبروك و ربنــــا يعطيك خيرها ويكفيك شرها ويبارك لك فيها
-
الف مبروك يا باشا
و ربنــــا يعطيك خيرها ويكفيك شرها ويبارك لك فيها
فعلا المازداوية زادوا واحد
اهلا بيك
بالنسبة للمشكلة دى حصل خير و ان شاء الله تبقى حاجة بسيطة
بس انا لو مكانك حتى لو علقت النمر هروح المعرض اخنقهم واشوف هيقولوا ايه
انا عارف انهم مش هيعملوا حاجة ولازم تروح التوكيل وان شاء الله خير
انا افتكر وانا بستلم العربية كان فيه فيوز كدة برة و فتحلى الكبوت و ركب الفيوز وقاللى عشان عداد السرعة يشتغل
هل ده حصل معاك ؟
لو مش كدة اسال المعرض
كمان عايز انبهك للحاجات دى مهمة وانت بستلم العربية :
- فحص جسم العربية بالكامل من اى نقر او خدوشات وايضا فحص بطن العربية
- فحص والتاكد من وجود جميع الكارتيرات فوق كل العجل
- التاكد من استلام الاستبن
- التاكد من استلام العدة وهى مفك فى الغالب اسود صليبة وفى نفس الوقت عادة و مفتاح 10 12 على ما اتذكر
- التاكد من استلام الكوريك واليد بتاعته
- التاكد من استلام الشداد لو لقدر الله العربية بتتقطر
- التاكد من استلام عدد 2 مفتاح والتاكد انهم شغالين الاتنين بيفتحوا و بيدوروا الموتور سواء المفتاح العادى او اللاسلكى
- التاكد من استلام كود المفتاح فى صفيحة صغيرة كدة لعمل نسخ فيما بعد بالكود ده
- التاكد من استلام المانوال بتاع العربية
- التاكد من فحص الكاسيت او السى دى شغال تمام والسماعات كلها شغالة
- التاكد من توصيل الفيوز اللى قولتلك عليه فوق
- التاكد من سلامة جميع العلامات اثناء تشغيل المحرك
- التاكد من استلام وتركيب جميع طبات الجنوط او طاسات العجل العادى
- التاكد من استلام وتركيب غطا مكان قطر العربية من الامام وده طبعا بلون العربية
- التاكد من فحص جميع الانوار والاشارات من الامام والخلف
- التاكد من سلامة الطابلوه والصالون والفرش
كفاية كدة لحسن تقولوا عليا ممل ههههههه
والف مبروك يا باشا
عربية فعلا جميلة وهتشوف وتقول بنفسك
-
الف مبروك و ان شاء الله خير
و زى ما هيما قال انقط دى مهمه انك تشوفها الاول وانت بتستلم و ربنا معاك
-
الف مبروك وان شاء الله خير وجت سليمة
-
مبروك يا باشاعلى العربية الجديد... ودى ضريبة بيدفعها كل واحد شارى عربية جديد ... وهى العين هههههههههههههه
ان شاء الله هيكون عيب بسيط ... وربنا يديك خيرها ويكفيك شرها
-
السلام عليكم .........
مبروووك يا باشا على العربية
بس كان من المفروض تعمل ذى ما اخى الكريم ما قال هيمز دا انا لما استامت المازدا هاى لين من ابو راواش لبست الجونتى بتاعى الجراحين و مشيت بأيدى على الصاج حته حته و كان معايا 3 اشخاص صحابى بيساعدونى و خلصت فى السريع
مش عايز اقولك ان انتا اخترت موزع مش كويس عشان انا رحت قبل كده عندة حسيت من كلامة انه مش فاهم حاجة
احسن موزع انا اتعملت معاه كان ماسترز فى شارع الطيران بس ما شترتش من عندة عشان كان اللون مش موجود
فا اشتريت من ابو راواش مازدا
ايوه دفعت 2000 جم زياده بس ريحت نفسى و العربية الحمد لله تمام نحمد اللة على كل شى
سؤال يا باشا انتا اشترتها بكام
و كمان لة عايز اى سؤال انا فى الخدمة ( انا كمان معايا هاى لين 2010 )
-
انا ملاحظ حاجة بقالى فترة ان فيه اعضاء كتير ملاك لمازدا و هوندا فى نفس الوقت
هما فعلا تميز اليابانى
السيفيك والمازدا
عربيات محترمة وبتعيش باذن الله
-
انا برضو اول ماطلعت من المعرض تاكسي حكلي الاكصدام الخلفي
هي شكلها بتتحسد بسرعه
الف مبروك وخلي بالك منها هتريحك قوي وهتكيفك فعلا
-
الف مبروك و ربنا يعطيك خيرها و يكفيك شرها
كنت عايز اعرف كمالياتها ايه هاى لاين
1-مثبت سرع
2-فتيس 4 سرعات ستيب ترونيك
3-عدد سماعات و امكانيات كاسيت مثل فلاش و بلوتوث
4-كاميرا خلفيه
5-حساس مطر نور و باركنج
6-فيها زينون
7-مرايا تعتيم اتوماتيك
8-باور كهرباء و لا هيدروليك
9-مرايات ضم
10-درج تابلوه فيه تلاجه لما تكييف يشتغل
11-تكييف تاتش و لا بكر
12-كمبيوتر بيعطيك مثلا بنزين يكفيك هتمشى اد ايه و انهوا باب مفتوح و درجه حرارة و غيره
19-مفتاح بصمه
20-انوار مثلا فى ابواب مع كاسيت و انذارات مع انوار
21- هل لما تبقى ماشى على سرعه و تفرمل فجأه الانتظار يشتغل اتوماتيك و ايه عوامل امان حديثه تانى موجوده
22-نظام ملاحه موجود
23-نظام لمقياس ضغط اطارات
24-هل توجد فتحات تكييف خلفيه
يعنى من اخر عايزك تفصصهالى كل كبيرة و صغيرة و ياريت لو بصور يبقى كتر خيرك
-
السلام عليكم
باشا , اولا مبروك العربيه و ربنا يكفيك شرها
معلش اللي حصل فيها, فدت اي حاجه تانيه , المهم انك بخير :)
بالنسبه للمبة Check engine
افصل البطاريه و سبها 3 او 4 دقايق و وصلها تاني و دور العربيه و كام ثانيه و هتلاقيها طفت انشاء الله
دا حصل مهايا اول ماستلمت عربيتي بعد مركبلي الفيوز بتاع السرعه
و لما سئلت ليه بتفص البطاريه, قالي بعد مبتركب اي حاجه خاصه بالكهربا
الكمبيوتر بيحس ان في حاجه غلط و بينور
فلازم تعمل زي restart
و الله اعلم
تحياتي و تقبل مروري
و الففففففففففففف مبروك
Content Relevant URLs by
vBSEO 3.6.0 PL2