كوميديا سوداء ... احداث يوم في الجحيم ؟؟؟!!!

**tito_1980** · 07-04-2011 06:01 PM

الزمان : النهارده الضهريه
المكان : سريري الحبيب

الموبايل بيهتز علي المكتب و بيعمل صوت زي صوت الحفار , طبعا قلقت من النوم مفزوع و قلبي كان هينط من بقي اصلي كنت بحلم بكابوس مفزع , رديت متأففا علي الموبايل .

انا بتأفف
ايوه

واحد صاحبي
ايه يا عم انت لسه نايم ؟

انا
لا صاحي بس بستعبط , حد يتصل بحد علي الصبح كده ؟

واحد صاحبي
احنا الضهريه يا لا انزل انا مستنيك تحت

انا
طيب هنزلك علي طول اهه

صاحبي ده عيل لزقه و رخم و كمان مصلحجي يعني ميعرفكش الا لما يكون عايز منك حاجه , المهم غسلت وشي كروكي كده و لبست الحته الزفره علي اساس اني رايح فرح و نزلت , نسيت اقولكوا ان اللاب كان بيهيس !!! , المهم صاحبي ده معاه عشه فراخ قصدي سيراتو و انا مش قصدي ازم فيها انا قصدي اديكوا صوره للي عامله فيها , والعه يا عم الحاج بيجبلك عربيه جديده كل سنه , بعد القر و السلامات و البوس و التلزيق علي الصبح , ركبت العربيه و تخيلوا شكلها انتوا من جوه , قعدت علي لبانه باين و حاجه تقرف , و مشغل اغنيه انا عامل دماغ قراميش باين او ما شابه من الاغاني الهابطه مع انه ابن ناس بس مش عارف بيسمع ليه الاغاني دي , المهم وصلت المكتب بعد فاصل من العرز و التخيشات شبه المؤكده ليه التهور معرفش , يدوب فتحت باب المكتب اتلاقي المنظر ده ؟ عمال الدهان قاعدين يشربوا سجاير و مشغلين نفس الاغنيه اللي كان صاحبي الملزق ده مشغلها .

انا بغضب مصطنع
انت يا عم انت و هو ؟ في ايه ؟ هي استراحه هنا ؟

واحد من العمال
معلش بنتستريح يا هندزه .

انا
هندزه بالزين ؟ ما علينا , خلصتوا ايه النهارده ؟

قعدوا يشترحولي اعمالهم الابداعيه و لا كأنهم متخرجين من كليه دهان قسم بويه مط بتقدير امتياز , المهم اتلاقي السكرتيره شغاله رغي في التليفون , ابصلها مفيش فايده شغاله رغي مع واحده صاحبتها ان جيت للحق , اديتها اللاب و قولتها تعمله باك اب عشان بيهيش زي ما ذكرت سابقا , طبعا صاحبي الرخم الملزق ده شغال تسبيل , الله يخربيتك يا اخي , المهم دخلت مكتبي انا و الملزق و قعد يتكلم معايا عن موقع توضيب عربيات عايز يفتحه ( فتح نفوخك ) , و بعد ساعه من الرغي , مشيت انا و الملزق و لسه البرنسيسه بترغي مفيش اي دم اصلا , قولك للملزق اني عايزه يوصلني مشوار طبعا قال امين عشان صباعه تحت ضرسي ( اعوذ بالله ) , كنت انا اللي سايق و كان في بيبسي باين مدلوق علي الكرسي و حاجه لوز العنب , وصلت لاستديو التصوير عشان استلم صور شويه عربيات كنت مصورها لزوم الشغل , الاستديو في مبني دورين لسه يدوب بطلع علي السلم اتلاقي كانز طاير عليا و طشششششش قام نزل علي البنطلون و طبعا البنطلون اتبل و بقي منظر زباله الصراحه , طبعا قصدت اسب و العن في البشريه الاغبيه , خلاص طلعت الدور التاني و الملزق معايا , اتلاقي واحده كده قعده تبصلي ( طبعا منظري مسخره ) .

البنت
هو الكانز جه عليك ؟

انا
لا اصل بحب امشي و البنطلون مبلول

البنت و هي بتضحك
معلش مخدتش بالي

انا بابتسامه صفرا
لا مفيش مشكله اصلي متعود ادلق البيبسي علي البنطلون

سيبتها و مشيت و الملزق قاعد يضحك عليا , المهم دخلت الاستديو و استلمت الصور بعد 3000 سنه من التدوير , نيجي بقه للمرواح , طاير بالسيراتو و الملزق جنبي و مشغل اغنيه للشاب تامر ( اغنيه خليها تاكلك ) هابطه هابطه يعني , المفروض ان قبل اي مطب في العالم الناس بتهدي من سرعتها صح و لا انا غلطان ؟ بنت راكبه هوندا قررت عدم تطبيق النظريق الفائته لان شكلها فاشله في نظرها و هوووووووووب لبست في العربيه من ورا , بصراحه انا كنت مبسوط فيها و في الملزق , نزلوا قعدوا يشدوا في الكلام و الناس تدخلت و جندي من الجيش يعد يعزق فيهم و يفض الشكله هههههههههههههههه , و الله المنظر كان مسخره , طبعا انا معرفتش انزل لان شكلها عاملها علي نفسي بالكانز اللي اتدلق عليا , الخساير الاكصدام الورق بتاع السيراتو اتشرخ و وش الفانوس اليمين اتكسر , الهوندا معرفش جرلها ايه عشان مبصطش , روحنا و الملزق جاري اصلا و قالي ان اجي معاه الحرفيين لكن هيهات ايها الزنديق ده انا معنتش عايز اشتري عربيات عشان حوارات الحرفيين دي تقوم تقولي اخشها عشان خاطرك , فعلا يوم في الحجيم

**shouk_1987** · 07-04-2011 06:32 PM

وانت عامل ايه دلوقتى ؟؟
الحمد لله إنك كويس و طلعت سليم

**tito_1980** · 07-04-2011 08:55 PM

هي متعتبرش حادثه دي تريحه يعني عادي

**mr_vampire** · 07-04-2011 09:17 PM

فكرتني بواحد صاحبي ملزق برده بس انا بعامله بقسوة متعمدة اكتر من كدة. ويقابلني بضحكة ملزقةةةةةةةةةةةةةةةةة ويقولي انا بحبك وعارف ان قلبك طيب.
- ياعم انا رجل بلا قلب اصلا وبتحبني اييييييييييييييييييييييه ده انتا لو مراتي كانت خلعتني من اللي بعمله فيك.

هههههههههههههه فعلا خد اللي يحبك ومتخدش اللي بتحبه.

**tito_1980** · 07-04-2011 11:09 PM

ههههههه بس صاحبي ده مصلحجي

**mido_soliman** · 07-04-2011 11:22 PM

مش غريبة انة يبقى صاحبك وملزق ومصلحجى
انا اللى اعرفة انة حد كدة مش حيبقى صاحبى ممكن معرفة مصلحة لكن صاحبى واقول علية كل دة يبقى انا مش تمام
متزعلش منى بس القصة معجبتنيش والعنوان مبالغ فية بكتير
تحياتى

**tito_1980** · 07-04-2011 11:49 PM

هو اللي مصاحبني عافيه كده , انا فعلا بعتبره معرفه بس هو اللي بينزل عليا بباراشوت في اوقات مش ظريفه زي النهارده كده عشان خاطر مصلحته , بس الاحداث معجبتش حضرتك في ايه ؟ انا بحب النقد المحترم البناء زي بتاع حضرتك كده .

**mido_soliman** · 08-04-2011 02:29 AM

المشاركة الأصلية كتبت بواسطة eng_ahmed_90

هو اللي مصاحبني عافيه كده , انا فعلا بعتبره معرفه بس هو اللي بينزل عليا بباراشوت في اوقات مش ظريفه زي النهارده كده عشان خاطر مصلحته , بس الاحداث معجبتش حضرتك في ايه ؟ انا بحب النقد المحترم البناء زي بتاع حضرتك كده .

نظرا لاحداث اليوم اللى حضرتك ذكرتها فهى لا تتماشى مع العنوان لان فية مبالغة يعنى يوم من الجحيم دة معنى وعنوان كبير اوى على دلقة كنزاية على بنطلون بالاضافة انى محستش بتلزيق صاحبك دة خالص من الحكاية سوى وصفك لية بالصفة دى :) مش عارف اية اللى خلانى اتعاطف معاة يعنى الراجل جالك لحد البيت عندك وبعربيتة وخلاك تسوقها وكمان لبست فى عربية تانية وانت فرحت فية مش عارف لية محستش بتلزيقة قد ما حسيت انك بتكرهة :)
متزعلش منى انا قلتلك رائى بصراحة وارجو انك تتقبلة بصدر رحب
تحياتى

**WaleeD-ZidaN** · 08-04-2011 02:35 AM

هو التعليق الغريب عند الصديق الملزق ازاى مستحمل كل اللزق ده هو فى كدددددددددددددددددددددددد ه؟؟؟؟؟؟؟؟؟؟؟
انا لو مكانو كان هيبقى لى تصرف تانى
التايق الاغرب بس فتح صدرك كدة و اتقبلو بروح رياضية زي سلسلة المواضيع الفكاهية اللى هرينا بيها
بس انا ملاحظ ان الدنيا بتفندق منك كتير وشخصيات ابو العربى بتظهر اكتر
طبعا مع احترامى لابو العربى ابو دم خفيف

**tito_1980** · 08-04-2011 03:39 AM

المشاركة الأصلية كتبت بواسطة mido_soliman

نظرا لاحداث اليوم اللى حضرتك ذكرتها فهى لا تتماشى مع العنوان لان فية مبالغة يعنى يوم من الجحيم دة معنى وعنوان كبير اوى على دلقة كنزاية على بنطلون بالاضافة انى محستش بتلزيق صاحبك دة خالص من الحكاية سوى وصفك لية بالصفة دى :) مش عارف اية اللى خلانى اتعاطف معاة يعنى الراجل جالك لحد البيت عندك وبعربيتة وخلاك تسوقها وكمان لبست فى عربية تانية وانت فرحت فية مش عارف لية محستش بتلزيقة قد ما حسيت انك بتكرهة :)
متزعلش منى انا قلتلك رائى بصراحة وارجو انك تتقبلة بصدر رحب
تحياتى

في الاول صاحبي ده جاري و جالي تحت بلكونتي عشان ياخدني للمكتب عشان عنده طلب , و بعدين اعد يبصبص للسكرتيره الرغايه , و اعد يضحك عليا لما الكانز اندلق علي البنطلون , و بعدين انا مليش ذنب في التريحه اللي حصلت , هي اللي لبست فيا من ورا و انا علي مطب , هي اللي مفروض تهدي علي الاقل عشان المطب يبقي مش ذنبي , يمكن العنوان مبالغ فيه حبتين و انا اصلا مرضتش اذكر مواصفات الاخ الملزق كتير في الاحداث لان الاحداث بتدور حواليا انا , و طبعا مش زعلان منك لانك وضحت رأيك بمنتهي الاحترام و الموضوعيه .

المشاركة الأصلية كتبت بواسطة waleed-zidan

هو التعليق الغريب عند الصديق الملزق ازاى مستحمل كل اللزق ده هو فى كدددددددددددددددددددددددد ه؟؟؟؟؟؟؟؟؟؟؟
انا لو مكانو كان هيبقى لى تصرف تانى
التايق الاغرب بس فتح صدرك كدة و اتقبلو بروح رياضية زي سلسلة المواضيع الفكاهية اللى هرينا بيها
بس انا ملاحظ ان الدنيا بتفندق منك كتير وشخصيات ابو العربى بتظهر اكتر
طبعا مع احترامى لابو العربى ابو دم خفيف

انا ببالغ في وصف الاحداث شويه بس هي حقيقيه 100 % و يجعله عامر .