الموضوع: فيديو | هجوم الجيش على الفلول و البلطجيه

المشاركة الأصلية كتبت بواسطة ahmedjumpo

* احلى ما فى بيان المجلس العسكرى هو استخدام نفس الخطاب القديم من تحميل المسئولية للفلول
و اريد ان أتوجه بسؤال طالما ان فلول الوطنى هى المسئولة عن الفتن و الخراب كما يقول البيان طيب ليه لم يتم حل الحزب الوطنى و التحفظ على رؤوسه الكبيرة !!!!!,ده الناس ريقها نشف و هى بتطالب بكده
* حاجة تانية مهمة اكتشفتها صباح اليوم و هى ان مصر فيها قوات شرطة و امن مركزى و جيش طيب دول كانوا فين لما كان استاد القاهرة بيتكسر من يومين و على مراي و مسمع من العالم كله
و كانوا فين و حالة الانفلات الامنى تسود البلد و لا يوجد رابط او حاكم
و اين هم من ضباط الشرطة الرافضين لان يقوموا بواجبهم و بياخدوا لسه مرتباتهم من جيوبنا
و فين حكومتنا الرشيدة من القذائف الاسرائيلية التى سقطت بداخل اراضينا و يقال انها قتلت مواطنين اثنين ده غير ان موضوع قتل المصريين على الحدود مع اسرائيل موضوع قديم و ردود الافعال مفيش
* الى كثير من الاخوة اللى بيقولوا ان المجلس العسكرى حما الشعب و الثورة اسمحولى اختلف معاكم لان الجيش كان محايد و لم يقف مع الثورة و لا مع مبارك بل اتسم فى احيان اخرى بالسلبية كما فى احداث موقعة الجمل الشهيرة ,و المفترض ان الجيش يقف مع الشعب و ليس مع شخص لان الشعب هو الذى يتكون منه الجيش و هو من يدفع رواتب الجيش و يدفع اموال تسليحهم
* اما الى الاخوة الذين يحلوا دائما لهم مقارنتنا بليبيا فأنى اقول لهم هذه المقارنة لا تصح بل المقارنة الصحيحة تكون مع تونس و موقف جيشها الذى رفض ضرب المتظاهرين لانها من سبقتنا فى الثورة و نحن كنا التاليين و كان العالم سيقارنا بها و لم يكن فى تظاهر فى ليبيا بعد

الى الاستاذ العزيز a.saad
مشاركتك هذه نفس المشاركة منذ اكثر من شهر و اسبوع
http://www.nilemotors.net/nile/3873318989-post81.html
و كان ردى على حضرتك

اعتقد انى اوضحت لحضرتك ان هناك فرق ما بين المثال الصينى و ثورتنا المصرية و لا اعرف ليه حضرتك بتأخذ المثال من الصين فقط رغم انها لم تكن ثورة و تركت كل الامثلة الناجحة مثل ثورة تونس و ثورة ايران و ثورة شيلى و غيرها الكثير ,يا استاذى العزيز العبرة ابدا لم تكن بالقوة و الدموية فروسيا رغم قوتها الهائلة و دمويتها لم تستطع الوقوف امام انهيار الاتحاد السوفيتى لان القمع مهما طال لابد لارادة الناس ان تنتصر


هل حضرتك يا استاذى العزيز اختزلت كل الاسباب الحقيقية فقط فى صورة ان السبب المجلس الرئاسى
يعنى حضرتك شايف ان الفاسدين اتحسبوا و اتسجنوا و ان الرئيس السابق تمام و زى الفل و لا يجب محاسبته و ان قاتلى الشهداء اتعرفوا و اتسجنوا و ان الحمد لله مفيش فتن و ان مفيش تباطئ و الدنيا وردى !!!!!!!!
لا و ضيف عليهم كمان ان امن الدولة لسه لغاية دلوقتى يقوم بنفس دوره القديم و بعد ده كله حضرتك شايف ان مفيش اسباب للتظاهر غير المجلس الرئاسى !!!!!!!!!

ممكن اسأل حضرتك مين هما اللى عايزين يشاركوا فى الحكم ؟؟؟؟
و على فكرة انا لا مؤيد و لا معارض لفكرة المجلس الرئاسى و لكن هذه الفكرة قد تم تطبيقها قبل ذلك فى دول اخرى و بالتالى ما الاسباب التى تمنع من تطبيقها عندنا فهى فكرة تريح الجيش و تجعله يتفرغ للامور العسكرية كما يريد و كان يمكن اختيار اعضائه من قبل الشعب او تعيينهم بالتشاور مع مختلف القوى الوطنية

+11111111111111111111111111
بدأنا نسمع تانى من الاخوه لغه الوصايه علينا وان لو رأيهم اتخالف يبقى احنا عايزين نضيع البلد وهنبقى صومال وليبيا وننتقد الجيش نبقى عايزين نهده...نفس الاسلوب ونفس الكلمات استخدمتوها قبل رحيل مبارك ورحيل شفيق وغيرها من الاحداث ..عشان كدا مش مستغرب من كلامكم دلوقتى مش جديده على عقلاء الوطن

المشاركة الأصلية كتبت بواسطة a.saad

التحفظ على كباره معاك فيه
لكن المحاكمة تكون لسبب
ولا هل نقبل اعدام شخص لمجرد المطالبة بذلك من الخصوم
استاذى العزيز جميل ان احنا متفقين على ضرورة التحفظ على رؤوس الفساد و اود ان اذكر حضرتك انا لم اطالب بأعدام احد دون ادلة
و لكن السؤال الان لماذا لم يتم التحفظ هذا مع انه من سلطات المجلس العسكرى و طبقا لقانون الطوارئ و لماذا تم تركهم احرار يدبروا المؤامرات و يدمروا الادلة و اكرر يدمروا الادلة و يحولوا اموالهم للخارج و الان فقط بندأ نقدمهم للتحقيق بعد ما تركنا لهم شهرين ظبطوا امورهم و من الذى ترك زكريا عزمى يفرم الورق فى رياسة الجمهورية و ما الاجراء القانونى الذى اتخذ مع من اتلف اوراق رسمية و اليست هذه مخالفة قانونية تستوجب توقيفه
و كذلك نفس الحال مع ضباط امن الدولة من الذى سمح لهم بفرم و حرق اوراق و مستندات تخص الدولة و اين محاسبة هؤلا عما ارتكبوه من جريمة
هذه شوية اسئلة و انتظر من حضرتك ان تجاوب عليها

كان فيه شرطة فى الاستاد
لكن متقدرش تتدخل
واكيد عارف ليه
شوف يا استاذى العزيز لما علشان شوية متظاهرين فى التحرير كان هذا الجمع الغفير من قوات الامن المركزى و الشرطة مع قوات من الجيش بها فرق صاعقة و مظلات ما شاء الله كل ده لشوية متظاهرين عزل اما فى استاد القاهرة و اللى كان واضح من صباح يوم المباراة ان هناك فئة من الجماهير دخلت الاستاد بالعنف و معها اسلحة بيضاء و ابلغ مدير الاستاد الجهات المعنية بذلك فماذا كان تصرف المجلس العسكرى و الشرطة حيال هذا الامر علما انه يمس سمعة مصر فى العالم بالاضافة الى تأثيره على العلاقات الخارجية بدول شقيقة

هو فيه انفلات امنى انا معاك لكن برده فيه جهود منهم
ما هى هذه الجهود يا استاذى فأنا ارى رجال الشرطة فى الشوارع و كأنهم اشباح لا تنفع و لا تضر بس حضرتك لنماذج اخرى عملت جهود حقيقية مثل عزل قيادات الشرطة الفاسدة و الممتنعة عن العمل و استبدالها بقيادات من الجيش من التى احيلت الى التقاعد و هناك من ادخل خريجى الحقوق فى دورات امنية و اصبحوا ضباطا و فيه افكار اخرى تقدر حضرتك تولى الان ما الذى فعلوا المجلس العسكرى للتعامل مع هذا الموقف ؟؟؟؟
ده حتى دورى كرة القدم اللى وافقوا على استئنافه وزارة الداخلية بعتت للاندية تقولها تأمين المباريات عليكما و انتوا اللى مسؤلين عن تفتيش الجماهير و الامن بالذمة ده كلام امال ايه لازمة وزارة الداخلية و الشرطة اللى اصبحت عاجزة عن فعل اى شئ لا و كمان تضاعفت مرتباتهم

ياريت تشوف حوادث الاعتداء على الشرطة كانت اد ايه الفترة الماضية
تم الاجابة فى النقطة السابقة

الواقعة الوحيدة هيا واقعة الجمل
هذه الواقعة استمرت من ظهر الاربعاء الى ظهر الخميس كان فين المجلس العسكرى من حماية المدنيين العزل طوال هذا الوقت الطويل
امال مين اللى نظم تعديلات الدستور
يا استاذى العزيز الهدف الحقيقى من هذه التعديلات كان شق الرأى و حالة التوحد اللى كانت موجودة و هو ما تم بنجاح و الدليل انه نعم او لا فى الحالتين كانت هتؤدى الى اعلان دستورى ينفرد به المجلس العسكرى و اعتقد ان حضرتك لاحظت ان الاعلان الدستورى من حاجة وستين مادة كل اللى حضرتك شوفته فى الاستفتاء مش اكثر من سبع مواد
مين اللى شال رؤساء الصحف
مين غير قيادات التليفزيون
يا استاذى النظام هو هو و الفكر لم يتغير و انظر الى تغطية التلفزيون امس و حالة التعتيم عن التحرير امس علشان حضرتك تستوعب ان الفكر لم يتغير
مين اللى مارضاش يضرب علينا نار
ما هى ديه حالة الحياد اللى قلت عليها لحضرتك
ميين اللى حل المجالس النيابية
حل المجالس النيابية كان ضرورة لان الدستور سقط بتسلم المجلس العسكرى لمقاليد الحكم لانه لا يوجد فى الدستور ما ينص على توليه السلطة
مين اللى تواجد فى المظاهرات الفئوية ونظم جلسات بين العمال وقياداة الشركات اللتى يعملوا فيها
من منع هروب الفاسدين للخارج ومنع تحويل اموالهم
هو حضرتك متخيل انه منع الفاسدين من الهروب يا استاذى ده كل فاسد قاعد فى البلد براحته و منهم اللى كان قاعد فى القصر الجمهورى و اللى كان بيعمل لقاءات صحفية و غيرهم اما اذا كنت تقصد الكام واحد اللى بيتحاكموا دلوقتى اعتقد ان حضرتك سمعت تصريح وزير العدل اللى هيعمل تشريع يسمح لهؤلاء بالتصالح و كل سنة و احنا طيبين

بالمناسبة هو حضرتك فاكر ان اللى عايز يهرب محتاج يروح يقطع تذكرة سفر و يخرج من الموانى الرسمية يا استاذى العزيز ده شباب بلدنا الغلبان و اللى ملوش ضهر و لا علاقات بيعرف يهرب على ايطاليا و اروبا يبقى رجل الاعمال الملياردير ابو لنشات و علاقات هيغلب انه يهرب و يهرب فلوسه لو هو عايز

من فتح ملفات تحقيقات الفساد
جزء من الاجابة فى النقطة السابقة و اكمل عليها بحاجة فاكر حضرتك لجنة تقصى الحقائق اللى اتعملت فى احداث قتل المتظاهرين و خرجت بنتائج منها ان صفوت الشريف و زكريا عزمى و ابراهيم كامل و عائشة عبد الهادى و اخرون كانوا خلف هذه الاحداث , تقدر حضرتك تقولى ايه الاجراء اللى اتخذ بناءا على هذا التقرير للاسف و لا حاجة و مر الان شهرين و نصف و الى الان لا نعلم من قتل الشهداء
و بما ان حضرتك بتتكلم فى الفساد فأين الى الان المجلس العسكرى من حل المحليات و التى قال فيها زكريا عزمى ان الفساد فيها للركب و كما يقول المثل و شهد شاهد من اهلها

ايه النجاح الحالى فى تونس
اعذرنى حضرتك بس اجابتك لا علاقة لها بتعليقى عن خطاء المقارنة مع ليبيا فى موقف الجيش من ناحية التعامل مع المظاهرات
و مع ذلك هاجاوب حضرتك ,تونس بمجرد هروب الرئيس اتخذت قرارات بالمطالبة بتجميد امواله فى الخارج و نجحت فى ذلك فعلا و ليس مثلنا انتظرنا شهر و يمكن اكثر
تونس حلت امن الدولة و اجهزة الامن السياسى لديها و احنا غيرنا اسمه بس
تونس استعادت كثيرا من الامن و اعادت الى حد كبير الشرطة الى العمل و احنا زى ما حضرتك عارف انفلات تام
تونس الغت الدستور و هيتم انتخاب اللجنة التأسيسية فى شهر يوليو القادم لوضع دستور جديد يعنى الموضوع غيرنا بيعملوا مش مستحيل زى ما تم تصويره لنا و احنا دخلونا فى دوامة تعديلات دستورية
تونس اخذت قرار بحل الحزب الحاكم و حاسبت بعض رؤوسه و احنا العكس
ايه رأى حضرتك فى نموذج تونس و مع ذلك لسه امامهم تحديات و خطوات حتى يصلوا للنجاح التام


أستئذنك لو قريت بتفاصيل اكتر عن الثورة الصينية هتلاقى ان عدد المشاركين اكبر من كدة
وان الطلاب والعمال كانوا بيحضروا من الاقاليم لميدان السلام فى بكين
وبفرض صحة الرقم اللى حضرتك كتبته وهو 100000 متظاهر من تعداد الصين وقتها طبعا
شوف تعامل الجيش معاهم ازاى
المتظاهرين كانوا بيضربوا بالدبابات والمدرعات
رصاص المدرعة لا يقل عن 20 مللى
يا استاذى العزيز المقارنة مع الصين لا تصح لاسباب ذكرتها لحضرتك قبلا و لماذا لم تقارن بتونس مثلا و هى التى سبقتنا مباشرة

فيه تباطؤ
ليه
اكيد فيه سبب
لكن السبب مش فساد فى الجيش
ممكن يكون فيه ضغوط عليه او انقسام فى الراى بينه
لكن مش السبب انهم اعداء للشعب
وهل ترى التباطؤ منهم سبب لحدوث الصدام مع الجيش
هل التباطؤ سبب لتقسيم الجيش والتسبب فى حرب بين اسلحته المختلفة
اذن متفقين ان فيه تباطؤ واضح يبقى مين المسؤل اعتقد يا استاذى العزيز ان المسئولية دائما تكون فى ايادى متخذى القرار و فى هذه الحالة هو المجلس العسكرى
و طبعا هذا التباطئ الغير مبرر يدخل فى نفوس الكثير من الناس الشك و الريبة و يفقدهم الثقة فى المجلس العسكرى و ارى ان المجلس العسكرى عليه اتخاذ مواقف واضحة و الاسراع فى محاسبة الفاسدين و التحفظ على رؤوس الفساد و فرض الامن فى الشوارع بهذه الخطوات يقضى المجلس العسكرى على شكوك الناس و يستعيد ثقتهم و يتجنب الفتن

فيه موضوع انا عملته
ملخصه
البرادعى
بديع
مصطفى الفقى
التيار السلفى
رفضوا ما حدث فى التحرير من الاعتصام والتصادم مع الجيش
طيب دول ومؤيديهم بيمثلوا جزء كبير من الشعب
يبقى بعد كدة مين اللى عايز الصدام مع الجيش
احكم حضرتك وفكر
انا شخصيا لست مؤيد او معارض للاعتصام و لكنى رافض بشدة هذا الاستخدام المفرط للقوى من جانب المجلس العسكرى امام مواطنين مصريين عزل و اظن الفيديوهات موجودة

بالمناسبة حضرتك لم تجاوب على سؤالى ما الذى يمنع من تطبيق تجربة المجلس الرئاسي و من هم الذين يريدون المشاركة فى الحكم

واسمح لى اقتبس المشاركة اللى كتبتها انت شخصياً يا استاذ احمد وهى


ده رأى حضرتك الشخصى سابقاً



وده الراى الحالى

انا واعذرنى شايف تناقض انك فى الاول دافعت عن الجيش
اليوم تصفه انه لم يكن مع المتظاهرين وكان سلبى ايضاً
تقبل تحياتى

يا استاذى الكريم لا يوجد تناقض و مازالت عند رايي و هو ان افراد الجيش هم اهلنا و مننا بس لازم نفرق بين المجلس العسكرى و قيادات معينة و بين باقى الجيش
طبعا حضرتك هتقولى ازاى و لذلك هاضرب لحضرتك مثال من فينا
اعتقد انه لا يوجد خلاف ان حكومة نظيف و قبلها عاطف عبيد خربوا البلد و لكن هل معنى ذلك ان كل موظفى الحكومة و البالغ عددهم خمسة مليون فاسدين و يجب محاكمتهم ام يتم فقط محاكمة المسئولين عن رسم السياسات و اتخاذ القرارات
نفس المبدأ مع المجلس العسكرى و الجيش و هسأل حضرتك سؤال
جزء من اموال مبارك من عمولات من صفقات سلاح فهل كانت تتم هذه الصفقات بدون علم قيادات الجيش و هل الفساد الذى ضرب كل ركن فى مصر جاء عند الجيش و توقف و هل هؤلاء القادة لم يعلموا عن الفساد المستشرى فى كل مناحى الحياة و لم يشاركوا فيه و لو حتى بالسكوت عليه
الفرق الوحيد بين الجيش و قياداته و باقى مؤسسات الحياة ان هناك سرية و عدم قدرة على الخوض فى اموره و ترهيب لمن يجرؤء على التفكير فى ذلك و صدقنى لو تم رفع هذه المحاذير لسوف تسمع امور تذهلك و قد سمعت عن بعض الاشياء من اقارب لى و لكنى لا احب الخوض فيها منعا للبلبلة و درءا للفتن و لحساسية الوضع الحالى

و بالنهاية اشكر لحضرتك نقاشك الهادف و ارجو من الله ان يجنب البلاد شر الانقسامات و يوفقنا فى ان نجعل هذه البلد فى المكانة التى تستحقها بين الدول