اقتباس المشاركة الأصلية كتبت بواسطة م.احمد زكريا مشاهدة المشاركة
طيب يا باشمهندس يا ريت توضحلنا ايه الفارغ في الكلام ده

وتشرحلنا وجهة نظرك بما انك مهندس ميكانيكا قوى
اقتباس المشاركة الأصلية كتبت بواسطة medo84eg مشاهدة المشاركة
استاذ hobiko يا ريت ترد علي الاخ م.احمد زكريا
علشان نستفيد
اصلي بردو ليا خبره في مجال الطاقه بانواعها
و عاوز اسمع رأيك
معلش يا جماعة ..... كنت نسيت الموضوع و لسه شايفه دلوقتى

بكلام مبسط ..... ولو حد عايز زيادة مافيش مشكلة

عندنا فى مصر نوعين اساسيين من محطات الكهرباء اللى بيشتغلوا بالوقود الحفرى (غاز - مازوت - سولار)

فيه نوع اسمه ..... المحطات الغازية(gas power plant) او محطات الدورة المركبة (combined cycle power plant)

النوع ده اصلا ماينفعش يشتغل غير بالغاز الطبيعى ..... لو مافيش غاز طبيعى ببساطة .... كده شكرا المحطة بتقف و ما بطلعش كهرباء .... و ممكن نستخدم السولار بس بشكل محدود

النوع ده من المحطات بيولد حوالى 40 % من اجمالى كهرباء مصر كلها

النوع التانى اسمه ..... المحطات البخارية (steam power plant) او محطات الدورة البسيطة (simple cycle power plant)

النوع ده من المحطات بيولد حوالى 46 % من اجمالى كهرباء مصر كلها

النوع ده ممكن يشتغل بالغاز او بالمازوت ...... بس مشكلة المازوت اللى بنستخدمه فى مصر الأساسية 3 حاجات :-

1) تقليل عمر المحطة الأفتراضى ...... تبقى عامل محطة و صارف عليها حوالى مليار و نص دولار عشان تقعد 30 او 40 سنة ...... بس من كتر ما انت بتشغلها بالمازوت قصفت عمرها حوالى من 20 ل 25 % ..... ده غير عدد مرات التوقف ( outage ) للصيانة بتزيد و استهلاك قطع الغيار بتزيد و مشاكل تشغيلها بتزيد و كل ده بيترجم لفلوس بتخسرها فى الأخر

2) تقليل كفاءة المحطة ...... المحطة طبعا عشان عمرها الأفتراضى بيقل ..... كفائتها بتقل ..... مش بطلع كمية الكهرباء اللى هى المفروض تطلعها ..... رغم ان المحطة المفروض انها مصممة انها تطلع نفس الكفاءة حتى فى حالة استخدام المازوت

طب ازاى ؟؟؟؟؟؟ مش انت بتقول المازوت ده مش كويس ؟؟؟؟

ده يقودنا للنقطة التالتة

3) امشى جمب اى محطة كهرباء بخارية ( محطة كهرباء سيدى كرير مثلا بتبقى باينة و انت ماشى على طريق الساحل) ..... لو لقيت المدخنة بطلع دخان اسود كثيف ...... اعرف انها شغالة بالمازوت ..... لو مش شايف حاجة طالعة منها او طالع منها ابخرة شفافة كده يدوب بتميزها بعنيك ..... تبقى المحطة دى شغالة بالغاز

المازوت المصرى .... او اللى بنستخدمه فى مصر من اسوأ انواع المازوت فى العالم ...... بيدمر محطة الكهرباء و بيلوث البيئة بشكل بشع ..... بجد انا مش عارف بيعملوه ازاى ولا بيجبوه منين ..... وزارة البترول طبعا عشان هما المسؤولين عن توريد الوقود لمحطات الكهرباء

طبعا فى الصيف الحمل بيزيد ..... تيجى ترفع الحمل على محطة الكهرباء فتسحب وقود اكتر ..... مرة واحدة الغاز يقطع (ما هو الحمل بيزيد فى اسرائيل هى كمان ماهى نفس تقريبا الظروف المناخية) ..... المحطة تقف ..... تيجى تشغلها بالمازوت ..... بدل ما تزود انتاجها عشان تواجه الأحمال ..... المازوت يخلى انتاجها يقل ...... و الشعب يفطر فى رمضان على ضوء الشموع

و ربنا يخليك لينا يا ريس انت و ابنك جمال و حسين سالم و سامح فهمى

و محدش يسأل عن السد العالى ....... السد العالى بياهم ب 9 او 10 % بالكتير من اجمالى انتاج الكهرباء فى مصر

وانا تحت امر اى استفسارات