احتياطات امنيه قبل الذهاب لغبور( ابو رواش)

**galalology** · 15-04-2008 06:13 PM

لو كنت جايب عربيتك جديدة...
وفرحااااااان بيها....
ولقيت حاجه (او حاجات كتير) مش مبسوط منها فى العربيه وضيعت فرحتك بالعربيه...
طبعا دا عادىىىىىى جدااااا......
لان عربيتك ليها علاقه بغبورررررررر...

انا اشتريت اكسنت وكنت فى الضمان ولقيت العربيه بتترجرج على الاول (قلت اكيد انا مش بعرف اسوق)
روحت لكل الناس الى اعرفهم وخلتهم يسوقوا عربيتى وكل واحد يشوفها يقولى مبروووك اقولوا:خش جرابها وحيات ابوك
المهم روحت لغبور (انا كنت فى صيانه 1000) قولت للمهندس على المشكله
رد و قالى:انت فى الضمان ولا لا؟(ولما عرف انى لسه فالضمان)يا فندم ولا تضايق نفسك خالص دى حاجه عاديه جدااااا...
المشكله كلها ان الدبرياج عايز يبقى عالى شويه ..........
العربيه بقيت ماشيه حلو والمشكله راحت واول مالضمان خلص......رجعت تانى بس ماكانتش لوحدها كان معاها ريحه.
روحت للميكانيكى بتاع المنطقه قالى : ياباشا الدبرياج كان عالى اوى وده اكنك ماشى ومحمل رجلك عليه على طول الاسطوانه اتحرقت بسبب ان ولاد ال.... عملوا كدة علشان يدارو على الاسطوانه التعبانه علشان انت لسه فالضمان فا لازم يغيروووها على حسابهم.......
لميت عيال المنطقه وروحت غبووور شوفت المهندس هو هو (كان الضمان خلص) قالى:انت يافندم لسه فى الضمان؟؟(لا)
قال: حضرتك الاسطوانه محروقه وده لان الدبرياج كان عالى ومحتاج تغير الاسطوانه يعنى هتعدى ال500جنيه والعربيه تبات معانه هنا فى مكان امان وفى ناس بتهتم بيها جدااااا(زجاج مفتوح والعربيه مرميه والتراب مبهدلها ولو احتاجه قطعه غيار مش عندهم مفيش مشكله لو يخدوها من عربيتى...يعنى انا ليا مين اعز من غبور ولو ما مدش ايده ليا هيمدها لمين يعنى ) ....

ربى انى لا اسألك رد القضاء ولكنى اسألك اللطف فيه

**liquidator** · 15-04-2008 06:27 PM

أخي الكريم أنا مقدر مشكلتك بس معلش اعزرني , أنا بقالي 3 سنين مع غبور و ماصدفتش أي مشكله من أي نوع , عربيتي في صيانة ال 60 ألف باتت عندهم يومين و استلمتها زي الفل ماكنش فيها أي حاجه , عمري ما رحت الصيانه بمشكله اللا و كانت محلوله و عمر ما حد كدب عليا هناك و ضمانهم حقيقي عن تجربه .. غيرولي شاسيه كرسي السواق بالكامل علي حسابهم في الضمان و غيرولي الكنترول يونيت و حساس الشكمان بالكامل علي حسابهم برده .. أصل غبور مش بيخسر حاجه , أنا اكتشفت ان كل القطع البايظه دي اللي بتتغير في الضمان بتروح علي كوريا و بييجي لغبور غيرها يعني غبور مش بيدفع حاجه من جيبه , يبقي مش من المنطقي انه يضايق العميل , و أنا عن نفسي شايف ان ضمانهم حقيقي و عندهم أمانه فعلا , يكفي انهم لما بيغيروا أي قطعة غيار بيحطلك القطعه القديمه في علبة الجديده و بيسبلك جيركن الزيت بشوية الزيت اللي فاضلين فيه , لا توكيل كيا و لا عز العرب بيعملوا كده خالص ...
أنا أسف بس أنا بقول تجربتي الخاصه مع غبور اللي مازعلنيش ولا مره و اللي أنا شايف ان أعضاء كتير هنا متحاملين عليه زياده عن اللازم مش أكتر ...
تحياتي لك .

**galalology** · 15-04-2008 06:35 PM

الف شكر على ردك بس ده الى حصل معايا واطلب منك لما تروح التوكيل رجاء انظر على العربيات الى مرميه عند صيانه البودى كل دى عربيات بايته علشان تتصلح بس للاسف شكل رميتها كدة وهى متبهدله تزعل وانا واثق انك مش هتلاقى عربيه الزجاج بتاعها مقفول...وشكرا ليك مرة تانيه

**liquidator** · 15-04-2008 06:44 PM

لا شكر علي واجب أخي الكريم بس أنا عربيتي اتعمل شغل فيها في الهياكل برده و كانت فعلا برده مرميه كده و الزجاج مفتوح و كان شكلها يقرف , بس هما عارفين برده هما بيعملوا ايه لاني لما جيت أستلمها لقيتها حاجه تانيه خالص , مغسوله و نضيفه و متلمعه من جوه كمان كائنها زيرو .... فانت مالكش دعوه باللي بيحصل جوه , كمان مش مسموح ليك انك تدخل الورشه أصلا و تبص علي عربيتك , انت ليك لما تيجي تستلمها بس و فعلا بتلاقيها نضيفه و زي الفل ....
معلش اذا كنت أنا مخالفك في الرأي بس والله ده اللي حصل معايا بالضبط ...
تحياتي لك ....

**3mr Farrag** · 15-04-2008 06:54 PM

ياريت الناس تبطل ...ما كل واحد يدخل يقول مشكله علي اي ماركه
يجي حد يقول دانا عربيتي ذي الفل و غبور ده حيبيبي و مش بيزعلني في حاجه....
يعني بالعقل كده....لما يجوا بيجمعوا العربيات بيبقوا قاصدين يبقي كل العربيات في نفس مشكله التجميه
اكيد لأ يعني.....
انما ده بسبب قله الضمير....شويه تلاقي فيهم مشاكل و شويه كويسين

و هي عربيتك هيونداي ايه يا استاذ galalology؟؟

**Ahmed Anwer** · 15-04-2008 07:03 PM

يا عمرو ،،

أنا عارف انك مش بتحب عربيتك ،،

رغم اني كان نفسي اجيبها ،،

بس للأسف عقبال محوشت الفلوس كانت الإكسنت القديمة بطلت تنزل ،،

فاضطريت اجيب فيرنا

كفاية انها في اخر ايامها كانت نازلة ب 53 الف ،،

و يوم ما هتبيعها و انتا نايم علي السرير هتجيبلك 46 الف

يعني راكب عربية ببلاش

و لحد الآن سابت فراغ كبير في الفئة دي ،،

مفيش عربية سيدان حاليا بالسعر ده

عموما لو عايز تحب عربيتك انزل بورسعيد و شوف التاكسي هناك ايه

و اركبها و اسأل سواقين التاكسي عليها

مع اعترافي انها طبعا مش عربية فظيعة

دي اول عربية بموتور هيونداي بالكامل و ظهرت سنة 95 ،،

يعني من زمان اوي ،،

بس أكيد عربية اكل عيش كويسة ،،

**3mr Farrag** · 15-04-2008 07:13 PM

استاذ احمد....
الفكره مش موضوع بحب عربيتي ولا بكرها....
بس الفكره ان في بعض الناس هنا بالمنتدي مقتنعه بأن لما جاب عربيه و مافيهاش مشاكل يبقي التوكيل بتاعها تمام
و ان عربيته دي عسل.....
اللي عايز اوصله للناس ان مش معني فيه توكيل تجميعه مش قد كده....
يبقي لازم يطلع كل العربيات تجميعها وحش....
لأ ممكن واحد يشتري نفس العربيه و تكون تمام و ممكن واحد تاني تطلع معاه مقلب
اعتبرها بطيخه ...لتطلع بطيخه حلوه و طعمها حلو ...لتطلع ارعا و عايزه تترمي في الزباله:)
بس الناس هنا مش مقتنعه بالكلام ده....
يعني اولا المفروض اللي يجيب عربيه جديده مايشوفش التوكيل غير ايام الصيانه بس
مش كل شويه يلاقي حاجه تبوظ و عمال رايح جاي علي التوكيل....
و بعدين نقول بس عربيه تمام
طيب دي لسه جديده...امال بعد 5 سنين هتبقي عامله ازاي
و انا كلامي مش علي هيونداي بس....
كلامي علي جميع التوكيلات اللي تجمعها مش تمام

**أبو عبدالله** · 15-04-2008 07:17 PM

المشاركة الأصلية كتبت بواسطة 3mr Farrag

استاذ احمد....
الفكره مش موضوع بحب عربيتي ولا بكرها....
بس الفكره ان في بعض الناس هنا بالمنتدي مقتنعه بأن لما جاب عربيه و مافيهاش مشاكل يبقي التوكيل بتاعها تمام
و ان عربيته دي عسل.....
اللي عايز اوصله للناس ان مش معني فيه توكيل تجميعه مش قد كده....
يبقي لازم يطلع كل العربيات تجميعها وحش....
لأ ممكن واحد يشتري نفس العربيه و تكون تمام و ممكن واحد تاني تطلع معاه مقلب
اعتبرها بطيخه ...لتطلع بطيخه حلوه و طعمها حلو ...لتطلع ارعا و عايزه تترمي في الزباله:)
بس الناس هنا مش مقتنعه بالكلام ده....
يعني اولا المفروض اللي يجيب عربيه جديده مايشوفش التوكيل غير ايام الصيانه بس
مش كل شويه يلاقي حاجه تبوظ و عمال رايح جاي علي التوكيل....
و بعدين نقول بس عربيه تمام
طيب دي لسه جديده...امال بعد 5 سنين هتبقي عامله ازاي
و انا كلامي مش علي هيونداي بس....
كلامي علي جميع التوكيلات اللي تجمعها مش تمام

كلام مظبوط واتفق معاه تماما
والله يفتح عليك يا عمر

**cazanova555** · 15-04-2008 07:23 PM

يا جماعه انا محتار غبور كويس ولا وحش

مهو مش معقول كل السمعه دي والاسم ده ويكون بالاهمال ده

**liquidator** · 15-04-2008 07:29 PM

المشاركة الأصلية كتبت بواسطة cazanova555

يا جماعه انا محتار غبور كويس ولا وحش

مهو مش معقول كل السمعه دي والاسم ده ويكون بالاهمال ده

والله يا أخي أنا قلت التجربه اللي حصلت معايا بدون تزييف أو تغيير و ان كان عليا أنا بنصح كل اللي بقابلهم انهم يبقوا من عملاء غبور , بس حقيقي أنا أول مره أشوف المشاكل دي هنا في المنتدي , أكيد أنا مش بنكرها بس أنا كمان عشان ماصدفتش أي مشكله من أي نوع طول ال 3 سنين فا بس مش مقتنع شويه .....

بالنسبه لأخر أسعار الفيرنا أنا جبتهالك و هتلاقيها في موضوع :
الرد علي استفسارات الاخوه الأعضاء بعد صيانة ال 70000 كيلو .
تحياتي لك .

الموضوع: احتياطات امنيه قبل الذهاب لغبور( ابو رواش)

LinkBack

أدوات الموضوع

عرض

-

-

-

-

المواضيع المتشابهه

امنيه حياتى فى الكاتالوج ده

سامسونج امنيه

ما هى احتياطات السفر؟

احتياطات السفر

كيفية الذهاب إلي أبو رواش

الكلمات الدلالية لهذا الموضوع

المفضلات

المفضلات

ضوابط المشاركة