أفكار ومقترحات حول موضوع سرقة العربيات السيراتو
السلام عليكم
أكيد يا جماعة كنتم متابعين خلال الفترة اللى فاتت موضوعات سرقة السيراتو سواء من خلال منتدانا أو من بره وعلشان كده أنا فكرت فى فتح الموضوع ده بحيث من خلاله نقدر نعرف بالظبط إيه سبب السرقة، هل الأعداد اللى بنسمعها بتتسرق مبالغ فيها لغرض فى نفس شخص ما، كمان نسمع بعضنا وكل واحد عنده فكره إزاى نواجه الزحف ده يقولها
بداية أنا عندى كام فكرة كده وهى:
1- ياريت الأخوة اللى حصلت معاهم السرقة دى يعرفونا بكل ظروفها سواء المكان اللى اتسرقت منه العربية والوقت وكمان مواصفات العربية نفسها هل فيها انذار مثلا ولا لأه وماينسوش أصغر التفاصيل حتى لو كانت العربية وقتها متغطية ولا لأه، كمان يعيدوا ذكر أرقام عربياتهم وألوانها.
2- ميثاق شرف نتفق عليه كلنا واحنا والحمد لله كتير ان أرقام العربيات المسروقة وألوانها نحفظها وتفضل فى بالنا وكل مكان نمشى فيه نحاول ندور فيه عليها.
3- لو فيه حد من الأخوة هنا ضابط شرطة ياريت يشاركنا سواء باتصالاته أو سواء بخبرته وأفكاره.
4- كان فيه موضوع قديم عن جهاز ممكن يتركب جوه العربية وتقدر منه تحدد مكانها من خلال جهاز gps او موبايل، طبعا الجهاز ده مش هنلاقيه فى مصر وبالتالى ممكن نتعب أخونا محمد شوقى يحاول يشوفه بره ويقولنا تكاليفه
أخيرا المجال مفتوح للمشاركة البناءه من الكل لغاية ماربنا يزيح عننا الغمة دى والبلد أمورها تتظبط
تحياتى للجميع وربنا يكفينا الشر