بعد اذنكم أروح المنصوره ازاي من القاهره ؟

**driftracer11** · 16-04-2008 02:04 PM

المشاركة الأصلية كتبت بواسطة ABOZAYED

شوف انت روح عند مترو شبرا واطلع كانك رايح اسكندريه (طريق اسكندريه الزراعي ) واستمر فيه مسافه حوالي 50 كم لحد كوبري بنها تنزل من عليه يمين وتواصل عدل بدون اي ملفات حتي المنصوره
المسافه حوالي 120 كم هتاخدها في ساعتين ونصف تقريبا ( علشان المطبات وطبيعه الطرق المصريه )
وخد بالك ان اول 20 كم تقريبا بعد شبرا وانت في طريق اسكندريه الزراعي اقصي سرعه هي 60 كم وبعد كده 90 كم وفيه رادار علي الطريق وبيسحبوا الرخص فخليك ملتزم بالسرعات دي

ده اللى انا كنت هقوله بس نزود انك هتعدى بعد كده على كفر شكر هناك حمله ثابته وميت غمر واجا وخللى بالك اطلع الكباري اوعى تمشى من تحت كوبرى علشان متلخبطش نفسك اول ماتوصل لاجا خد الشمال علشان لو خلت يمين تدخل اجا بعد كده يفط بالهبل المنصوره فاضل كام بعد كده هتلاقى حمله ثابته يبقى كده حمدالله على السلامه ادامك طريقين يا امى تطلع الكوبرى (طريق طويل بس يوصلك) يا اما تكمل لسندوب وهناك تسال هيقولك عدى شريط القطر وخد الطريق طوالى لغايه ماتلاقى صينيه (خللى بالك قبلها فتحه يعن ده اللى عايز يرجع تانى لسندوب وطريق مصر)لفها شمال مع العربيات اللى بتلف ودخل طوالى هتلاقيك ماشى على كوبرى صغير كمله للاخر ولف تانى يمين عند البنزينه واهلا بك فى المنصوره...ده شرح مفصل مفيش بعد كده:D

**أبو عبدالله** · 16-04-2008 02:09 PM

معلش بقه انا اتأخرت على الرد لأني لسه شايفه
ويا اخي تشرفنا في المنصورة وتنورنا والله بجد
ولو عاوز اي مساعده غير الطريق متهيألي الأخوة قامو بالواجب وزياده كمان

انا تحت امرك

**liquidator** · 16-04-2008 02:16 PM

يا جماعه أنا مش عارف أقول لكم ايه بجد ... حقيقي شكرا ليكم جدا و معلش أصل دي أول مره في حياتي أروح المنصوره فا ماكنتش عارف الطريق ... باختصار , طريق اسكندريه الزراعي لحد كوبري بنها أنزل منه يمين و بعدين علي طول , يا تري المطبات في قبلها علامات وللا هالبس المطب ؟ و هما كام مطب بالضبط لو حد يعرف ؟
و المسافه 120 كيلو من القاهره لحد المنصوره , صح ؟

**أبو عبدالله** · 16-04-2008 02:23 PM

المسافة فعلا من عند قليوب الى المنصورة حوالي 120 كم

اما عن المطبات فهو امام كل قريه هتلاقي مطب اذا مكنش اتنين
وقبلها علامات ان شاء الله
بس تقريبا في مطب واحد او اتنين مفيش قبلهم بس مش اكتر
يعني اطمن اتنين بس
ههههههههههه

انا بهزر ربنا يحفظك ان شاء الله

وهو فعلا الطريق بعد توشيبا العربي هتطلع كوبري بنها بعد ما تنزل من عليه هتلاقي في نهايته داخله يمين زي اليو تيرن كده هتكمل عليها لحد ما هتدخل على الطريق بتاع المنصورة شمال
وعالطول ان شاء الله

وعند اجا بعدها هتلاقي كوبري صغير بتعديه وتاخد شمال برضه لأن اليمين يعني هتدخل اجا

وتوصل بالسلامة وبرضه انا تحت امرك وتشرفنا بك ان شاء الله

**SEATLOVER** · 16-04-2008 02:26 PM

طريق بنها مفيهوش ولا مطب ..المطبات هاتبداء بعد حوالى 30 كم فى طريق ميت غمر (اللى هاتخدة بعد ماتنزل من الكوبرى ) ..

مفيش اى علامات ..و العدد ..ماتعدش انت كل ما هاتخلص مطب اول ما توصل بالسرعة ل 80 هاتلاقى التانى فى وشك

وانواع المطبات ..كل اللى خلقها ربنا من اول عين القطة اليتيمة .. لجبال وادى حوف

ربنا معاك .. بس لما توصل بالسلامة ..هاتعرف ان المنصورة ..تستاهل

**liquidator** · 16-04-2008 02:26 PM

المشاركة الأصلية كتبت بواسطة أبو عبدالله

المسافة فعلا من عند قليوب الى المنصورة حوالي 120 كم

اما عن المطبات فهو امام كل قريه هتلاقي مطب اذا مكنش اتنين
وقبلها علامات ان شاء الله
بس تقريبا في مطب واحد او اتنين مفيش قبلهم بس مش اكتر
يعني اطمن اتنين بس
ههههههههههه

انا بهزر ربنا يحفظك ان شاء الله

وهو فعلا الطريق بعد توشيبا العربي هتطلع كوبري بنها بعد ما تنزل من عليه هتلاقي في نهايته داخله يمين زي اليو تيرن كده هتكمل عليها لحد ما هتدخل على الطريق بتاع المنصورة شمال
وعالطول ان شاء الله

وعند اجا بعدها هتلاقي كوبري صغير بتعديه وتاخد شمال برضه لأن اليمين يعني هتدخل اجا

وتوصل بالسلامة وبرضه انا تحت امرك وتشرفنا بك ان شاء الله

ربنا يخليك يا رب و والله لساني عاجز عن الشكر ... ربنا يخليك و يخلي كل الأعضاء اللي ساعدوني ..
حقيقي شكرا ليكم كلكم ... و يا رب أقدر أردلكم المساعده دي أو جزء منها حتي ...
شكرا ليكم جدا ...