ظهرت بعض الاصوات فى الفترة الاخير مطالبه بمقاطعة الاهرام والاخبار والجمهورية لاسباب الكل عارفها ;) بس ياترى الناس ممكن فعلا تعمل كده ؟
عرض للطباعة
ظهرت بعض الاصوات فى الفترة الاخير مطالبه بمقاطعة الاهرام والاخبار والجمهورية لاسباب الكل عارفها ;) بس ياترى الناس ممكن فعلا تعمل كده ؟
أنا بأرحب بحضرتك في منتدانا الرائع ده
أنا أول مرة أسمع عن المقاطعة للجرايد دي.. ممكن توضح إيه سبب المقاطعة؟ أكيد في ناس تانية زيي مش عارفة السبب
بانتظار الرد
بصراحة انا نفسى اقاطع كافة الصحف الحكومية ولكن للاسف مش قادر على مقاطعة الاهرام لانه ادمان بعيد عنك !
ولكن علشان المقاطعة تكون عملية اقترح مقاطعه الجرائد اليومية لمدة معينة 00 يعنى مقاطعة اخبار اليوم ليوم السبت والاهرام ليوم الجمعة والجممهورية ليوم الخميس 000 يعنى بهذا الشكل تكون هناك فائدة من المقاطعة وتكون عملية
السبب هو موقف الجرايد الحكومية فى احداث 6 و7 ابريل وناس شافت ان الرد العملى هو بالمقاطعة
تحياتى
انهم كدابين زفة
مثلا :
تاني يوم الاضراب .. والناس كلها شافت الشوارع فاضية والدنيا مولعة في المحلة ... وتعالي شوف المانشيت الرئيسي للاخبار ( شفته مع واحد كان ماشي في الشارع بالصدفة ) المانشيت : فشل الاضراب هو يعني الجرايد بتتكلم عن بلد غير اللي احنا عايشين فيها
انا عن نفسي مقاطع الجرايد كلها من سنوات .. مش بس الاهرام والاخبار والجمهورية ... لكن الكل .. الصحافة بقت عملية نصب كبيرة ومصالح ودنيا تانية - الا ما رحم ربي -
انا رأيي ان من اكتر الاماكن فسادا في مصر هي الاعلام عموما والصحافة خصوصا
ويجعله عامر
ومن المانشيتات المضحكه ان الوزيره الدكتوره عائشه عبد الهادي بتقول ان الإنتاجيه بتاعه مصانع المحله زادت ايام الإضراب ( 6 و 7 )
انا اري مقاطعه الجرائد الحكوميه لمده شهر
دي حاجه ان شاء الله نقدر عليها وهاتدي كارت اصفر ليهم ولكل المنتجات
ها يعرفوا ان الشعب ممكن يتحد علي كلمه ويقف امام سلعه او منتج معين
لما يعرفوا ان فيه مقاومه هايعملولها حساب
قالوا لفرعون مين فرعنك ؟؟
انا نادرا ما بشترى جرايد
يعنى تأدر تقول انى اشتريت فى حياتى كلها 5 - 6 جرايد
بدون أى مبلاغة
اما بالنسبة لمقاطعة الجرائد دى أعتقد انها هتكون كويس لو انها بتمثل مصدر دخل للسلطة
الجرايد دى غير متأثرة بالمرة بالمبيعات بدليل خسارتها كل سنة اضعاف خسارتها السابقة لآنها بتاخد ميزانيتها و تمويلها من (معين لا ينضب )
وماحدش بيجبها غير عشان الاعلانات المبوبة و فرص العمل
و (قلى البطاطس) :d
المقاطعة من يوم 11 - 18 ابريل، بس عموما انا مقاطعهم تماما، لأنه بمنتهى البساطة ازاى ادفع فلوس علشان اقراء اخبار غير حقيقية؟ و المصيبة 90% من الناس اللى بتشترى الجرايد دى عارفة كده.
الاهرام العدد الاسبوعى بتاع يوم الجمعة كله اعلانات وبكثافة تدور على حاجة تقراها مافيش ورغم كده سعره جنيه و ربع مع انهم كسبانين ملايين من اعلاناته
المفروض يوزعوه مجانا زى الوسيط
طبعاً مقاطعها من زمااااااااااااااااان
وأيام ما كنت باشتريها كنت باجيب بس أهرام الجمعة أيام ما كنت بادور على شغل
دي حسنته الوحيدة
الجرايد دى بتكسب كويس اوى بس بيوزعو المكسب على الكبار بتوعهم ( تذكر موضوع رئيس تحرير الاهرام السابق ) و اكيد الحاليين من حصيلة الاعلانات
وبعدين مابيدفعوش ضرايب للبلد و مابيوردوش نسبة ضرايب الاعلانات ( حوالى 60 % )
مقاطعة الجرايد دى هيبقى كجزء من إضراب 4 مايو
خصوصاً بعد موقفها الساذج من إضراب 6 أبريل ........ كأن اللى بيقروا دول مش عايشين فى البلد
بصراحة بقت حاجة مملة قوى لما يبقى كل الإعلام اللى فى البلد فى إيد الحكومة ........ حاجة تقرف.:mad:
انا معاكم انها اخبارهم فيها اشياء كتير مش صادقة بس ده يعتبر عزلة عن المجتمع اللي احنا عايشين فيه انا راي تتابع الاخبار من كل حتة قومية ومعارضة ووو .. والحمد لله لسه عندنا شوية تفكير تقدر تحكم بيه على صحة الاخبار
شعب كوريا الشقيق يساند اخوانه المصريين...:)
http://www.islamonline.net/Arabic/al...ages/00-02.jpg
لن يصمت !! مش عارف هيعمل ايه ؟
ياريت لو يمنعوا تصدير العربيات الكورية لمصر و خصوصا الهيونداي..
ده هيريح ناس كتير هنا :)
http://www.islamonline.net/Arabic/al...ages/00-01.jpg
النصرللشعب المصري !..والله كتر خيرهم...
http://www.islamonline.net/Arabic/al.../images/00.jpg
النصر لكفاح العمال المصريين ...
و ديه كانت مظاهرة امام السفارة المصرية بسول .,,
منقول من اسلام اونلاين...
انا باجيب اهرام الجمعة و طبعا انا معاك طبعا بس للاسف مراتى بتحب تقرا صفحة النكد و العواجيز:d(صفحة بريد الاهرام) بس من بعد بكره مافيش جرايد حاتخش البيت و ياريت كمان نحط معاهم القنوات التليفزيونية الارضية المحلية
شوفوتووووووا
والله شعب كوريا دول محترمين .. و برضه شعوب كتيير فى أوروبا
لو أى حد هناك عايز يعمل إضراب .... كله يشارك حتى لو مش هيستفيد بشكل مباشر من الإضراب ... كنوع من مشاركة أخوانه فى الوطن.
حتى شعب كوريا بيساندنا من غير ما يكون ليه أى مصلحة عندنا.
......و هنا الناس مش ناقص غير نبوس رجليهم عشان يشاركوا فى إضراب هما أساساً هيستفادوا منه بشكل مباشر.
مش عارف إيه السلبية دى ؟!!!! :(
بصراحة النت خلى الواحد ما بيفكرشي يشتري جرايد خالص على الاقل الواحد ممكن يتتبع الخبر في كذا مكان ويعرف مدى مصداقيته وانا مع المقاطعة
يا جماعه الجرايد دى فى الباى باى من زمان
لدرجه تبدل نداء بائعى الجرائد الشهير ( أهرام أخبار جمهوريه ) إلى دستور مصرى اليوم وفد
ولو تعرف أحد بائعى الجرائد إسأله عن توزيع الصحف الحكوميه مقارنه بالصحف المستقله
الناس فاقت من زمان وبطلت تدفع فلوس لناس بتكدب عليها
أنا فعلا بعد التهريج بتاع أحداث 6 أبريل كنت بافكر مانشتريش الأهرام تاني (ناس لسة عايشة بعقلية الستينات !!)
بس زي ما قال د. المشد ده إدمان، أنا ساعات باقرا الجورنال ع النت ولما ييجي بابا بالجورنال باقراه تاني !! إدمان .. مافيش متعة -بالنسبة لي- أكتر من إني أمسك الجريدة واقلب الصفحات واختار الأعمدة اللي هاقراها.
ريحة الجريدة نفسها منعشة -بالنسبة لي برضه-
بس أنا مستعد مانشتريش الجريدة من تاني.
على فكرة بابا هو اللي بيجيب الجورنال وانا باضرب عليه ساعتين اقراه وارجعه تاني، وده فكرني بنكتة عن واحد بخيل بعت لجريدة جواب بيهددهم "لو مابطلتوش تكتبوا نكت عن البخلاء .. مش هاستلف الجورنال من جاري تاني" :d:d
بامانة احسن جرنال هو المصري اليوم
لان الجرائد القومية مخلية الدنيا وردي
و جرائد المعارضة مخلية الدنيا جحيم
ده غير جرائد الصفراء
اللي عاوز جرنال حلو بامانة المصرياليوم
عهده في الصحافة قليل جدا
بس عمل لنفسه مكانة متميزة جدا
ههههههههههههههههههه
انا برضه بحب اجيب اخبار اليوم يوم السبت و الاهرام يوم الجمعة
ليه معرفش
دائما بشترى الاخبار بس بعد موضوع الاضراب اللى حصل تانى يوم رحت اشترى الاخبار ملقتش جبت الجمهوريه وطبعا قريت كلام عن دوله تانى فى اوربا مثلا مش عن مصر وتمجيد ومدح وكلام فارغ
رحت اشوف قناه العربيه او الجزيره لقيت بلاوى مش صور ولا صوت فيديو عن المظاهرات حلفت من ساعتها مش هشترى جرنال حكومى تانى ابدا
والمصرى اليوم برقابتهم
نتيجة التصويت مش محتاجة تعليق بس يا ترى ممكن الناس تعمل تجمعات وتعمل مقاطعة لكل حاجة متعجبهاش الواضح ان فى مقاطعة فردية 18فى المية مقاطعة من الاول ياريت نعرف ننظم نفسنا ونعمل الحاجة احنا الى بيسمونا الاغلبية الصامتة اتمنى من ربنا تبقى ليها صوت مسموع وشكراااا لكل واحد شارك فى التصويت واحب اقول صوتك صدقنى بيفرق بلاش مقولة (يعنى هيحصل ايه)
علي فكره يا جماعة المقاطعة شيئ سلبي للغاية ليه
اولا ان الجرايد في توزيعها قلت كثير جدا لانني مدمن جرايد تعرفوا ان الوفد كان في الثمانينيات كان بيوزع ما يقرب من مليون نسخة وطبعا كان اهرام الجمعة واخبار السبت يتخطوا المليون وكل واحد منهم يقول انا الاكبر في الشرق الاوسط ودلوقتي انسي ودا طبعا بعد ما خربوها بالمبتدئين اللي الواحد منهم بقي صحفي عشان بابا وعموا وطنط
لكن حقيقي في الجرايد دي قي ناس كويسة ولكن مخنوقين وممكن نقول كل اسبوع مين الآفضل مثلا بدل المقاطعة اللي ها تزود المنافقين !
ثانيا انت بتقول ان المصري اليو م هي الافضل ودا كلام مشكوك فيه لان الجرايد الحكوميه مكشوفة لكن المصيبة في دي كبيرة لان اصحابها رجال اعمال مش مهم الصحيفة تصرف ايه لان كلها ماتكملش عشرة في المائة من اي قناة فضائية ولكن تآثيرها كبير اوي وده تلاحظه انت بنفسك وبعدين عايز اقولك حاجة الجرايد اللي انت فاكرها معارضة هي الحكومية واذا كنت عايز تتاكد راجع المكتوب يوم الاضراب وشوف الصور وسلم لي علي الترماي وخلي باللك كل دول بقوا نجوم ماليين الفضائيات (المعارضة) واجعيين دماغنا وهما منافقيين حتي النخاع عايزين يقربوا للسلطة وهلم جرا
ثالثا ان الجرايد الحكومية دي ملك الشعب ومع ذلك كلنا مكبرين دماغنا بدل ما تشتم الزبالة اللي جابوه وحطوه في مكان ما حلمش بيه قلنا هي كوسة وخلا ص ومع الوقت صدق محفوظ عجب نفسه مع ان الايميل موجود وتقدر تنفخ اي حد مش عاجبك فيه
اما الجرايد الخاصة فكله عايز يرضي صاحب المال سواء كان من حبايب التطبيع وفلوسه اسرائيلي آو امريكاني ايهما اقرب او واحد من حرامية الاراضي او غيره عد كتيير المهم انه يبقي وطني ويحل مشاكل البلد !
اخيرا المشاركة احسن حاجة وعامة ها تلاقي معارضة في الجرايد البايظة اكتر بس لاحظ ودي حقيقة مش تمثيل لان القصة كبيرة واحنا عايزين فول بزيت احسن من عسل فيه سم
يا جماعة الموضوع أخطر مما تتصورون. يا ريت بلاش الانسياق وراء دعوات الفوضى و التخريب, الأهرام و الأخبار كان ليهم موقف هام ضد دعاوى الفوضى, صحيح انو الكثير من الأخبار فيها بعض التحيز, و لكنها أفضل من الجرائد الصفراء التى تعيش على الفضائح و سب الناس على الفاضى و المليان, زى الدستور و صوت الأمة و غيرهم.
أنا أسف, لن أقاطع لا الأهرام و لا الأخبار و لا روزاليوسف, و لن أقاطع أيضا الدستور لأن الجرائد الصفراء مسلية أثناء قضاء الحاجة :)
طبعاً ده رأي حضرتك ويحترم جداً
ولكن
أظن ان كتير من الناس اللي بتأيد المقاطعة وانا من ضمنهم مقتنعين تمام الاقتناع
ان كل الاخبار بلا استثناء فيها تحيز
مش "بعض" زي ما حضرتك بتقول
والمصيبة اني ساعات بيتسلل إلي الاحساس ان الجرايد دي بتتكلم عن مصر غير اللي احنا عايشين فيها
اقتباس:
يا ريت بلاش الانسياق وراء دعوات الفوضى و التخريب
ايه الفوضي والتخريب في التوقف عن شراء الجرائد الحكوميه ؟؟
شيء طبيعي ان اي منتج مش عاجبني مش هاشتريه
وعموما اطمن خالص طالما انها فئه مندسه يبقي ليس لها تأثير ...
وبعدين اعتقد ان الفئه المندسه مش مصريين ولا عرب فكده كده مش بيعرفو عربي
شكرا علي الرد
خليت كلامي متناقض وما وضحتش في ايه
خليتوا الموضوع بقي حكومي وغير حكومي وفئة مندسة وكلام غريب ومافيش داعي ننزل بمستوي الحوار لان اختلاف الراى لا يفسد الود ولازم نتعود علي كده
ايه بقي كلام التخريب والكلام المجعلص ده احنا بنتكلم عن اشخاص
اما الجرايد فهي موجودة شئنا ام ابينا ومع ذلك عشان الاذكياء كان فيه اقتراح في الموضوع المتناقض وماحدش رد عليه