يعنى ايه العربية بتسقف وليه ممكن يحصل فيها كده
مع العلم انى لما بدوس بنزين وارفع من الدبرياج بسمع هبده فى الموتور
هى دى التسقيف؟
عرض للطباعة
يعنى ايه العربية بتسقف وليه ممكن يحصل فيها كده
مع العلم انى لما بدوس بنزين وارفع من الدبرياج بسمع هبده فى الموتور
هى دى التسقيف؟
التسقيف او ساعات بيسموها الكركرة
لما تسمع صوت في الموتور كركركركر
وهو ده نفس الصوت اللى هتسمعه لو جبت الرابع على سرعة 20 مثلا ودست بنزين مرة واحدة
وده بيحصل مع الكبس على دواسة البنزين المفاجئ والعربية واخدة غيار اعلى من سرعتها او مع الحمل الجامد
او لما تكون الكهربا عالية
او لما تكون حاطط بنزين 80 وعايز تسحب بالعربية وتكون العربية مصممة لـ 90 او اعلى
لو عربيتك سكودا فليشيا يبقى الحل عندك تأخير الكهربة شوية
هى عملت معايا كده بتاع اربع مرات فى اليومين الى فاتو دول ودى كانت اول مره تعملها معايا انى اطلع على الاول احس انى طالع على الرابع وتكركر شويه وتمشى . هو دا التسقيف؟ ودا بيجى من ايه ؟ وكمان جزاك الله خيرا على الاهتمام بالرد
لو بتحط بنزين 80 غير وحط بنزين 90
او زي ماقال زملينا عمرو اخر كهرباء الاسبراتير
انا عمرى ما حطيت 80 ابدا انا بحط 90 واخر تفويله كانت 92 وبمون من مصر الامارات يعنى بنزين مضمونجدا و العربية اسكودا فليشيا
يعنى ايه تأخير الكهرباء ؟
ودا يعلى العربية ولا يوطيها
تأخير الكهربا يعنى تأخير وقت الاشعال
بحيث البستم ياخد وقت اطول شوية وهو طالع في شوط الضغط قبل ما الشرارة تحرق الخليط
وده هيوطى السلانسيه حاجة بسيطة والصوت هيبقى انعم شوية
طريقة التأخير
هتهوى الصامولة اللى رابطة عمود الاسبراتير حاجة بسيطة وتلف الاسبراتير كله في اتجاه عقارب الساعة لفة بسيطة
وتجرب العربية لحد ما الصوت التسقيف يروح مع المشى العادى
وخلى بالك ما توطيهاش اكتر من اللازم ( لف الاسبراتير شعرة كدة في كل مرة وجرب لحد ما العربية تظبط )
ودا مش حيأثر على السحب بتاع العربية
السلام عليكم ورحمة الله وبركاته
اولا انت سمعت مصطلح بتسقف دة فين؟ ومين الي قالهولك ؟
ماهو عشان كدة قلتلك ما تأخرهاش اكتر من اللازم
انت عايز رأيي
اصبر عليها شوية كدة بس سايسهاا يعنى دوس بنزين بالراحة وما تنقلش بدرى عشان الصوت ده مش كويس للموتور
واستنى عليها شوية لحد ما البنزين ده يخلص لو انت متأكد ان الكهربة ما اتلعبش فيها من ساعة ماكانت مظبوطة اخر مرة
ومفيش حاجة في البلد دى موثوق منها 100% لا بنزين ولا اي حاجة
اوك حجرب ان شاء الله حشوف التفويله دى تخلص واشوف
اخ سيد سمعت من الناس هنا فى المنتدى وقلت جايز الاصوات الى عندى دى هى التسقيف .
طبعاً الكلام مظبوط 100 في ال100 بس دة مش تسقيف
دة بيسموه العربية بتسُك (بكسر الباء وضم السين)
تسك يعني تسمع تكتكة كل لما تضغط بنزين علي التاني والتالت بالزات واحيانا لما تبطل الموتور يترج وكأنها لسة دايرة وهي فعلا بتبقي دايرة ودة خطر جدا علي عمود الكرنك والبساتم. وعلاجه انك اما تنظف كرباتير وتغير طقم الكهرباء بالكامل وتظبط موتور (كهربا الموتور) او تخبطها مشوار محترم مع الحرق شويتين علي الغيارات لحد لما كل البنزين المغشوش يخرج مع العادم لآنك هتلاقيه اسود وكثيف.
لكن العربية بتسقف دة معناه انك لما تسمع صوت عالي للمكنة وتقطع وتفضل تتنطط بيك كل لما تسيب بنزين واحيانا بيسموها بتنخع لما تشيل رجلك من علي البنزين. واول لما تدوس بنزين تستجيب وتفط بيك.
عموما علي كل الاحوال انت محتاج تغيير طقم الكهربا وضبط الموتور
وحاول مؤقتا تعطس العربية، بمعني افضل كارك بنزين بالراحة (ما يوازي 2 rpm ) ومرة واحدة اكبس علي الأخر
هتلاقيها طلعت دخان اسود كثيف ويمكن تدي قنابل من الشكمان.
بغض النظر عن سبب المشكله..
انا حوضح لحضرتك ظاهرة التسقيف هندسيا..
___________________________
المفروض في أي عربيه تكون كهربتها مظبوطه إن عند ضغط شحنة الخليط(الوقود+الهواء) عند توقيت معين وعند ضغط معين.بندي الشراره من البوجيه..
فبتشتعل الشحنه..إزاي؟بتتكون جبهه منتظمه من اللهب من عند الشراره و بصوره منتظمه.و بتوصل لحد راس المكبس و يبتدي يتحرك..
___________________________
لو الكهربا مش مظبوطه..أو البنزين رقم أوكتانه أقل من المسموح به(رقم الأوكتان هو اللي بيسمح بإني أضغط الشحنه عند ضغط عالي بدون حدوث إشتعال ذاتي)
بيحصل الآتي...إن الشحنه ضغطها بيزيد..فبتشتعل ذاتيا قبل حدوث الشراره..
وبعد كده بتحصل شرارة البوجيه...
و إيه المشكله في الكلام ده؟؟
المشكله إن مش بتكون فيه جبهة لهب واحدة منتظمه في هذه الحاله..
لأ اللي بيحصل إن بتكون فيه أكتر من جبهة لهب في إتجاهات متضادة..
و عند حدوث تصادم بين جبهتين أو أكتر...بيحصل صوت فرقعه أو صوت أشبه بالتصفيق..
و من هنا جه مسمي إن العربيه بتسقف..
و بالفصحي تسمى ظاهرة الصفع أو الدق.
طبعا نتيجه ن مفيش جبهة لهب موحده تحرك المكبس.ده بيؤدي إلى فقد في القوه في صورة إحتكاكات..و إرتفاع إستهلاك البنزين.
و اللـــه أعلم.
مع كامل احترامي للاستاذ ابو مرام صاحب السيارة الفيلشيا وصاحب الموضوع، ممكن سؤال للمهندس محمد علاء
تفتكر يا باشمهنس محمد اي انواع منظفات الانجيكشن احسن
انا جربت الاسبراي الي بترش علي الرشاشات ومش عاجبني
انا عايز اجرب الي بيتحط مع التفويلة مع العلم اني بمون من شل او موبيل بنزين 92
واسف للمداخلة وللاستاذ ابو مرام
يعني العربية رايحة فرح ههههههه ..
---------
لاء بهزر .. ان شاء الله عربيتك تمام ومفهاش حاجة
العربية بتسأف طبعآ مفيش كلام احسن من الى اتقال
و بالنسبة للهبدة لو هبدة بمعنى تكة يبقى فيه قاعدة من قواعد الماتور عايزة تتغير
انا كان عندى كلهم بايظين و كانو بيعملو التكة ديه و غيرتهم و اتحلت المشكلة
علما بان القواعد ديه مش غالية
انا كنت جايب الكربرتير ب 40 و الجيربوكس ب 60 و طرمبة المياه مش عارف يكام و واحدة تانية مش فاكر اسمها كانت ب 40
ربنا ما يحرمنى منكم يا اخوان