زي ما احنا دلوقتي بنشوف المصايب و البلاوي اللي بيعملوها في أهاليهم الأطفال اللي في العيلة او ولاد اللي عندهم ولاد.. برضه احنا كان لينا مصايبنا اللي عملناها في أهالينا و احنا صغيرين.. حوادث او حركات عملناها فيهم بكل براءة و هي في الواقع مصاااااااااايب

مرة و انا صغيرة كنت بالعب مع اخويا و ولاد خالي و باجري منهم و عشان ما يمسكونيش طلعت فوق التربيزة.. و قدامي حد منهم على الأرض بيحاول يمسكني.. و انا طبعا حريصة كل الحرص انه ما يمسكنيش و بارجع بضهري.. و انا فوق الترابيزة طبعا.. بس معرفش ليه ما استوعبتش ساعتها ان الترابيزة دي ليها آخر و ان آخرها ده بيودي على الأرض عدللللللل.. ما استوعبتش بأه إلا و انا باتهبد على الأرض و ريحة الكولونيا مالية الدنيا.. أتاريني وقعت على راسي و أعمن علية كمان :o

مرة تانية برضه مع نفس العيال ولاد خالي (شكلهم كده كانوا مدبرينها لي بالعنية).. بنعلب اننا بنحط نفسنا في كراتين و نتقلب بيها.. ايه اللعب المؤذي ده؟
و لما جه علية الدور لسه بيقلبوني بالكرتونة على ظهري.. برضه فجأة لقيت نفس الريحة بتاعة المرة اللي فاتت.. طبعا ريحة الكولونيا مالية الدنيا