الموضوع: كده قلة أدب

الأخوة الأعزاء د/ أحمد فارما ، د/ أحمد عبد الغنى ، و كل الزملاء الأعزاء المشاركين من أطباء و صيادلة ، و الأعضاء الأعزاء المشاركين فى الموضوع:

تابعت بشغف الموضوع على مدى 8 صفحات و ترددت كثيرا فى التعليق و لكن مش قادر اصبر أكتر من كده.

أولا انا كطبيب نادرا ما باعلق على موضوع البدائل التى بيصرفها الصيادلة ، احيانا بعد مكالمة لطيفة ، و كثيرا بدون مكالمات او حتى تنبيه ، طالما المادة الفعالة واحدة و نفس التركيز و الفعالية فمش باعلق ، و لكن لى تحفظات شديدة على الموضوع ده للأسباب التالية :

1) فى كثير من الأحيان للأسف الواقف فى الصيدلية ليس صيدلى اصلا و انما عم فلان أو الأستاذ فلان (حقيقة مؤسفة موجودة) و هؤلاء خبرتهم فى البدائل محدودة (ان وجدت اصلا) و بالتالى باشوف حاجات تشيب من الناس دى ... المشكلة ان عادة اللى بيدخل الصيدلية من اهل المنطقة و بالتالى اللى واقف اصلا جاره و كلامه مصدق عنده و بالتالى بادخل فى مهاترات شنيعة مع المريض اللى عمال ياخد علاج غير اللى انا كاتبه (و طبعا مش بيتحسن) علشان اقنعه ان جاره اللى يعرفه من كذا سنة اداله دواء غلط (و للأسف بعضهم بيصر ان البديل المصروف صح و ان انا الغلطان!!) ... مثلا مرة كنت كاتب لمريضة مرهم Vidisic علشان عندها جفاف ، قام عم مجدى جارهم فى الصيدلية ماعندوش راح مديها من غير ما يقولها قطرة Vegamox و دى مضاد حيوى قوى و طول استعماله بيعمل اثار مش لطيفة على العين ، العيانة رجعت فى الأستشارة بتلعن فى ، و باحاول افهمها ان ده غير ده ترد و تقول لى "مجدى مابيغلطش ابدا ... دى عشرة عمر" ، و سكتت بس لما اخدتها من ايدها و نزلت لصيدلية قريبة و خليتها تدخل تسأله اذا كانوا بدايل ولا لأ و تسمع بودنها...

2) احيانا باكون كاتب قطرة معينة لعلمى بفعاليتها ، مثلا فيه قطرة فعالة و معروفة ، و لكن نزل بديل جديد من كام شهر مابيعملش اى حاجة ، يظهر نسيوا يحطوا المادة الفعالة فيه أصلا ، و بالتالى لما الاقى الصيدلى مطلعه باتجنن ، مش هاقول حاجة غلط على الصيدلى بس هاخلى العيان يطلب القطرة بعينها.

3) ساعات بتحصل تصرفات تنرفز ، اكون كاتب للعيان قطرة ب 10 او 12 جنيه ، و الاقى الصيدلى مديله البديل ابو 48 جنيه و يقول له "أصل القطرة الأولانية ماعادبش بتنزل" و المحزن انى لما اقول للمريض رجع القطرة و شوف فى مكان تانى ، تظهر القطرة اللى انا كاتبها و من عند نفس الصيدلية...

4) أحيانا البديل بيكون غلط و الرد بيكون مستفز ، مرة كنت كاتب لطفل قطرة Tobrex و لقيت الصيدلى مديلهم Tobradex و لما رفضتها متصل بى يقول لى "هما حرفين زيادة مزعلينك ؟؟ ما هى فيها نفس الTobramycin اللى انت عايزة" و لما قلت له ان فيها كورتيزون و ده انا مش عايزة رد "مش هاتفرق مع العيان!!" و راح قافل السكة.. بصراحة قلت للمريض مايجيبش حاجة من عنده تانى ..

5) بيزعلنى جدا لما يكون اللى واقف فى الصيدلية مش عارف الدواء اللى انا كاتبه (عادة بيكون عم فلان او الأستاذ فلان) و يقول للعيان "مافيش دواء بالأسم ده أ أكيد الدكتور غلط" و طبعا المريض بيرجع و هو فاقد الثقة فيا و مش بيطمئن الا بعد ما اخليه يروح لصيدلية انا عارف ان الدواء فيها و يروح يجيبه و يتأكد انى مش باكتب اسماء وهمية..

6) حكاية ان الطبيب يشخص و الصيدلى يكتب الدواء دى رائعة و لكن لابد من دراسة تخصص هو Clinical Pharmacy للوصول الى هذه الدرجة ، و للأسف هذا التخصص نادر فى مصر (أخويا الكبير و مراته الأثنين واخدين التخصص ده بس للأسف مالوش بخت فى مصر) ، و للأسف لو الصيدلى مش واخده ممكن يحصل بعض المشاكل ، ياريت التخصص ده ينتشر و يحصل التعاون المطلوب بشدة ده..

7) فيه دكاترة بتفرس و تنقط لما تلاقيه معلق على نوع واحد لأن مندوب الشركة بيظبطه صح و بيرفض اى نوع تانى و للأسف فيه صيادلة كده كمان..

8) اخيرا انا من المؤمنين بشدة بمبدأ ان لو هاتصرف البديل يبقى بلغنى او خللى المريض يبلغنى و بكده يبقى عداك العيب ، و لو تعذر كده اصرف البديل المناسب المعروف بانه فى نفس الفعالية و فى نفس حدود السعر و بعد ابلاغ المريض.

و أخيرا فالصيادلة و الدكاترة ترسان مشتبكان معا فى الآلة الطبية و لابد من عملهما معا فى تناغم و تناسق لسير العمل كما يجب و ليسوا ابدا اعداء او منافسين ، انها منظومة واحدة لنا معا.

و تحياتى للجميع