الموضوع: سوال بخصوص هوندا استيدا

مساء الفل ياباشا
أحب أضيف معلومه ليك وأتمنى إنك تستفاد من كلامي
الستيد 3 أنواع البغله والجواد العادي والعكاز
البغله هي أم تانك كبير ودي غالبا بتكون موديل قديم ثمانينات وشكلها بغله فعلا لأنها عريضه شويه وده غالبا جادون شبه مسطره وده سعره بيعمل من 10000 لغاية 15000 الإفراج

والموديل التاني العادي vlx كود المصنع nc26 طبعا إنت عارفو ده وشوفته كتير في الشارع المصري وده جادونه القرنين العادي وغالبا بيتعدل مسطره وده سعره بيعمل من 13000 لغاية 18000 لإفراج النضيف أوي

الموديل التالت والأخير العكاز وهو ده الي إنت يتسأل عليه وده موديله ستيد vls تقدر تدور عليه على جوجل بجميع صوره وده سعره بيعمل من 17000 مستعمل لغاية 24000 إفراج نضيف
أخوك إبراهيم أسعد

المشاركة الأصلية كتبت بواسطة johnghaly

انا بجد بشكرك على المعلومات الجميله والجديده انا بجد اول مره اعرف المعلومات الجديده دى شكرا ليك اوى يا هيما بجد مش عارف اقولك ايه والنوع الثالث vls ده ممكن القى منه اشترى يعنى فى مصر ولا صعب
وتانى مره بقلك شكرا يا ابراهيم بجد :copy of m-s5:

حبيب قلبي العكاز موجود في مصر وانا من واقع خبرتي قابلت منه لونين الإسود ساده والأزرق ميتاليك وده الي موجود منه كذا واحده في مصر لكن الاسوذ يتعد عالصوابع والعكاز عموما تقيل شويه في بيعه نظرا لإرتفاع ثمنه والي بيفكر يشتري حاجه أعلى شويه من الإستيد الـ 400 بيشتري شادو تقريبا بنفس ثمن العكاز وبيشتريه لأنه أضخم بكتير من العكاز وأقوى في التحمل من العكاز أو بيكون الإختيار مابين إتنين الستيد 600 أو الشادو 400 أو الأعلى شويه شادو 750 ودي تقيله بردو في بيعها زي العكاز فالإختيار بيكون مابين ستيد 400 بعديها ستيد 600 بعديها شادو 400 والمقارنه بتكون في السعر لأن الكاستم عموما مبيعطلش "عدو الميكانيكي" غير لاقدر الله الحوادث
يكفينا ربنا ويكفيكم الشر

أه على فكره الستيد 400 بتكون 5 غيارات والستيد 600 بتكون 4 غيارات بس والشادو 5 غيارات

ستيد 400 سعرها مابين 13000 : 16500 جنيه موديلات 92 لغاية 96 موديلات لغاية الـ 2000 بيوصل سعرها لغاية 18500 جنيه
الستيد 600 سعرها مابين 15000 : 20000
ستيد عكاز مابين 17000 : 25000 جنيه
شادو 400 مابين 18000 : 25000 جنيه

دي جميع الأسعار الي هتقابلك وانت بتدور في السوق المصري على كساتم مابين معلق وإفراج
والأسعار الي كتبتهالك بداية من المستعمل لغاية الإفراج حسب الحاله وحسب الإستهلاك والمميزات
وعلى فكره الكساتم دي أهم حاجه فيها النواكل تكون بتلمع ثانيا الموتسيكل يكون مابيسخنش أما الموتور نادرا ماتلاقي في حالل أو محتاج يحل وخلي بالك الموتسيكلات دي ساعات بتسمع فيها رنه بتكون من الديسك أو بلية الدبرياج وده شيئ عادي في الكساتم وبيكون موجود في أغلب الكساتم
وأي خدمة يلا إنزل النهارده دور في المعارض عالموديل الي يعجبك هتلاقي أشكال وألوان

وألوان الستيد الفابريكه الموجوده في مصر
إسود ساده متاح
إسود وجنبين التانك نبيتي ميتالك متاح
نبيتي ميتالك وجنبين التان إسود وده لون نادر في مصر
أبيض لاكريه وجنبين التانك تركواز وده لون نادر في مصر
أبيض لاكريه وجنبين التانك أزرق وده لون نادر في مصر
طوبي وجنبين التانك أبيض كريمي وده لون نادر في مصر

للعلم الألوان النادره متوفره بس تتعد عالصوابع في مصر وأي لون غير كده بيكون تعديل ماعدى السهو والخطأ

ودلوقتي يابطل إنت بقيت خبير في الإستيد وتقدر تنزل تدور وماتنساش تبص كويس لايكون في لحام في الشاسيه مستخبي كده ولا كده لحسن في معارض وناس معدومي الضمير ممكن تلبسك وأنا شخصيا أعرف منهم كذا واحد بيبصوا تحت رجليهم تيجي تبص تحت رجليهم إنت كمان يقوم خابطك على راسك ملبسك في الحيط
والله الموفق
أخوكم إبراهيم أسعد

[quote=johnghaly;3873439995]ياااااااا ابراهيم اانا شكرت الاول ومش عارف دلوقتى اقولك ايه غير بجد بجد بجد انا متشكر للخبره الكبيره اللى انت ادتهانى دى بجد مش ممكن انت محترم بجد انا زى ما قلتلك انى هبتدى ان شاء الله ادور فى اول شهر 7 بأذن الله واكيد ايكد يعنى اول واحد هتصل بيه ااصأل عن ستيدا هيكون انتى
وبجد انا متشكر للافاده دى يا ابراهيم وربنا يوفقكك ياااااارب[/quote]


ربنا يخليك يارب
وكنت عايز أحكيلكم قصه صغيره من حصلتلي من يومين
كنت ماشي أنا وإبن عمي عالدائري وكل واحد راكب إستيد وبالضبط مابين الجيزه والمريوطيه قبل الوصله الجديده وكان الكلام ده الساعه 11 بالليل والدائري كحل
وإتفاجئت بكلب بلدي بيفادي إبن عمي وفجأه بقى قدامي ومالحقتش أخد أي رد فعل لأني كنت على رعه عاليه ودريييب الكلب في الهوا وقام مرزوع في رجلي ولافف كام لفه في الهوا وعالأرض والموتسيكل قعد يحدف يمين وشمال وأنا مش فاهم إيه الي بيحصل لإن الدنيا كانت ضلمه وإني لولا فتحت النور فجأه لأني إتخايلت بخيال بيتحرك قدامي ولثانيه واحده مابين فتحي للنور والإصطدام ماكونتش عرفت إنه كلب وكنت إفتكرت العجله الأماميه حصل فيها حاجه لأن الموتسيكل كان بيعوم زي مايكون العجله الأماميه إتخرمت
على قد ماقدرت وزنت نفسي الحمد لله وخدت يمين شويه شويه بدون أي إستخدام للفرامل بس ماسك دبرياج لحد مالموتسيكل يثبت عالطريق من غير ما أنقل لوضع المور لأنه مكان في عصاية غيارات وقتها كانت بتجرجر عالأرض
لقيت كدمه في رجلي من أول لفه للكلب والستيد فكت عصاية الغيارات بسبب إن الصاموله الي ماسكاها طارت
فضلت أنقل برجلي لحد مالقيت مكان أجيب منه صاموله والموتسيكل رجع زي ماكان
الحمد لله بخير أنا والموتسيكل

مايستفاد من القصه :

أولا : إني لو كنت راكب وقتها ريسنج 250 او 400 أو أي ريسنج كان زماني في القبر وكان زمانكم بتدعولي بالرحمه

ثانيا : الله يرحم الكلب البلدي الي طلعلي لإن الصدمه كانت قويه والعربيات الي عالدائري ماسموش عليه

ثالثا : بحذر أي كلب بلدي أو غير بلدي من إنه يفكر يقف قدام ستيد لأن مصيره هايكون نفس مصير الكلب الي مات

رابعا : إزداد عشقي وإحترامي وتقديري للستيد لثباتها وعالطريق وقوة تحملها للحوادث

خامسا : ربنا يكفينا ويكفيكم الشر وأتمني من الله إن محدش يتعرض لموقف زي الي إتعرضتله في الحادثه

سادسا : بأنصح أي حد راكب ريس يفكر ألف مره ويحاول يركب كاستم لأن الريسنج بالنسبالي أكل عيش ليس أكثر

والله الموفق
أخوكم إبراهيم أسعد

المشاركة الأصلية كتبت بواسطة nour_safwan

مساء الفل ياباشا
أحب أضيف معلومه ليك وأتمنى إنك تستفاد من كلامي
الستيد 3 أنواع البغله والجواد العادي والعكاز
البغله هي أم تانك كبير ودي غالبا بتكون موديل قديم ثمانينات وشكلها بغله فعلا لأنها عريضه شويه وده غالبا جادون شبه مسطره وده سعره بيعمل من 10000 لغاية 15000 الإفراج

والموديل التاني العادي vlx كود المصنع nc26 طبعا إنت عارفو ده وشوفته كتير في الشارع المصري وده جادونه القرنين العادي وغالبا بيتعدل مسطره وده سعره بيعمل من 13000 لغاية 18000 لإفراج النضيف أوي

الموديل التالت والأخير العكاز وهو ده الي إنت يتسأل عليه وده موديله ستيد vls تقدر تدور عليه على جوجل بجميع صوره وده سعره بيعمل من 17000 مستعمل لغاية 24000 إفراج نضيف
أخوك إبراهيم أسعد

الكبير كبير يا نور بصراحة مكنتش اعرف ان الي تنكها كبير بيسموها البغلة

وفعلا العكاز اغلى ما فيهم

بس انت اسمك نور ولا ابراهيم اسعد؟

لا تكون ياباشا ابراهيم اسعد صاحب معرض البايكس في الجيزة؟؟؟؟ عند ام المصريين

لو كده يبقى انصحك يا جون لو عايز استيد عليك وعلى الراجل ده بجد محترم جدا وناس كتير اشتروا من عنده وبيشكروا فيه وعنده تقريبا 3 او 4 هوندا استيد شفت اعلانهم على مصراوي


ان شاء الله نعملك زيارة قريب d:

المشاركة الأصلية كتبت بواسطة ducati

الكبير كبير يا نور بصراحة مكنتش اعرف ان الي تنكها كبير بيسموها البغلة

وفعلا العكاز اغلى ما فيهم

بس انت اسمك نور ولا ابراهيم اسعد؟

لا تكون ياباشا ابراهيم اسعد صاحب معرض البايكس في الجيزة؟؟؟؟ عند ام المصريين

لو كده يبقى انصحك يا جون لو عايز استيد عليك وعلى الراجل ده بجد محترم جدا وناس كتير اشتروا من عنده وبيشكروا فيه وعنده تقريبا 3 او 4 هوندا استيد شفت اعلانهم على مصراوي


ان شاء الله نعملك زيارة قريب d:

هو بالظبط كده إبراهيم أسعد بتاع الجيزه بس نعمل إيه للأستاذ كريم منير الي شطبلنا عضويتنا من المنتدى نهائي وانت عارف إن الواحد ميقدرش يستغني عن الناس الحلوه الي في المنتدى علشان كده عملنا عضويه تانيه قام مديها إيقاف وعملنا التالته قام مديها إيقاف هي كمان وقام شاطب العضويات كلها قمنا مغيرين الأي بي وعملنا العضويه دي والحمدلله ماشيه مع إني للأمانه معملتش ولا إعلان في القسم ده خالص وجالي المعلم خالد 2010 زياره للمعرض وقالي هاكلملك الأستاذ كريم منير أخليه يلغيلك الإيقاف ويرجعلك الأكاونت تاني وإذ بعدها فوجئت بخالد 2010 واخد إيقاف
وعلى رأي المثل جبتك يا عبد المعين تعينني لقيتك خدت إيقاف
ههههههه
شكرا على وقتكم يارجاله

المشاركة الأصلية كتبت بواسطة nour_safwan

هو بالظبط كده إبراهيم أسعد بتاع الجيزه بس نعمل إيه للأستاذ كريم منير الي شطبلنا عضويتنا من المنتدى نهائي وانت عارف إن الواحد ميقدرش يستغني عن الناس الحلوه الي في المنتدى علشان كده عملنا عضويه تانيه قام مديها إيقاف وعملنا التالته قام مديها إيقاف هي كمان وقام شاطب العضويات كلها قمنا مغيرين الأي بي وعملنا العضويه دي والحمدلله ماشيه مع إني للأمانه معملتش ولا إعلان في القسم ده خالص وجالي المعلم خالد 2010 زياره للمعرض وقالي هاكلملك الأستاذ كريم منير أخليه يلغيلك الإيقاف ويرجعلك الأكاونت تاني وإذ بعدها فوجئت بخالد 2010 واخد إيقاف
وعلى رأي المثل جبتك يا عبد المعين تعينني لقيتك خدت إيقاف
ههههههه
شكرا على وقتكم يارجاله

اى ياعبد المعين انت جاى تسيح فى المنتدى ولا ايه لما كريم نفسه خد ايقاف قبل كده دى قوانين وانت غلط يبقى لازم تتعاقب وبعدين انتا ياعبد المعين معملتش معايا اى واجب ساعتها كنت عايز تدينى 400 عاده ب 19000 يرضي مين ده ياعبد المعين وبعدين لو عايز تعمل اعلان يبقى بالاتفاق مع ادارة المنتدى مش تعمل ناصح ..........سلام ياعبد المعين

المشاركة الأصلية كتبت بواسطة KHALED2010

اى ياعبد المعين انت جاى تسيح فى المنتدى ولا ايه لما كريم نفسه خد ايقاف قبل كده دى قوانين وانت غلط يبقى لازم تتعاقب وبعدين انتا ياعبد المعين معملتش معايا اى واجب ساعتها كنت عايز تدينى 400 عاده ب 19000 يرضي مين ده ياعبد المعين وبعدين لو عايز تعمل اعلان يبقى بالاتفاق مع ادارة المنتدى مش تعمل ناصح ..........سلام ياعبد المعين

المشاركة الأصلية كتبت بواسطة KHALED2010

حبيب قلبي أنا مابعملش ناصح وعيب عليك لما تقولي بعمل ناصح أنا ماغلطش في حقك ولاأقدر وكل كلمه بتطلع مني بحساب ومفيش معلومه بكتبها إلا بعد دراسه يعني ماليش في الفتي
وبعدين أنا معرفش مين أصلا أستاذ كريم ولا أعرف إيه إختصاصاته مع كل الإحترام والتقدير ليه وإنت لوحدك قلتلي هاكلمه يرفعلك الإيقاف من غير ما أسألك مين هو ده
وياسيدي كتر خيرك إن كنت عايز تقدملي خدمة حتى لو كان محصلش عموما بأشكرك
أما موضوع الـ 400 cbr الي إنت مخدتهاش لأنها غاليه إتباعت ولله الحمد بـ 21إلا ربع يعني 20750 جنيه وخلي بالك إنها كانت بحالة الزيرو وكنت إنت أول واحد هايركبها في مصر وبعدين لو إنت دارس واقع السوق وقتها كنت هاتعرف أنا عملت واجب معاك ولا لأ وكنت ممكن أحسبهالك بـ 18500 بس إنت مكنتش جاهز تخلص ومسيرك تشرفني في المعرض وأوريلك العقود ولسه بايع واحده من أسبوع بـ 19 وهي في السوق دلوقتي بتعمل 20 و 21 و 22
وده لأنها كانت جايالي بسعر مرتاح
بس إنت الي ماجيتش دوغري ساعتها لأنك كنت عايز مكنه على قد الإمكانيات المتاحه معاك وقتها وبعدها بكام يوم ركبت 250 عاده يعني وقتها إستحاله كنا هانوصل مع بعض لإتفاق
حتى الـ 400 فاير بليد الي إنت جيت إتفرجت عليها من فتره بسيطه وفصلتها بـ 14000 كنت بترمي سعر وياصابت ياخابت ودي إتباعت بـ 16500 يبقى العيب في مين ولو كنت جيت قعدت معايا كنت ممكن أريحهالك في السعر شويه علشان خالدبس مش لدرجة الـ 14 ولا الـ 15 أسعارك بتجيب حاجه أقل من الي بتتفرج عليها عندي يعني إنت تيجي تتفرج على 400 عاده عندي وتروح تشتري 250 عاده وتاني مره إتفرجت على 400 فاير عندي ورميت سعر وروحت إشتريت 400 عاده بالسعر الي انت قلت عليه
يا خالد حرام عليك تبخس بحاجة الناس
ماهو أصل الي إشتروا الموتسيكلات الي إنت إتفرجت عليها عندي مش عبط إنت عارف إن الي بيشتري موتسيكل النهارده بيكون فرم السوق وإتفرج على 50 موتسيكل قبل مايجيلي وبيجيب معاه ميكانيكي يتنطط جوه الموتسيكل
عموما لو انت فاضي هستناك تشرفني نشرب معايا شاي أو حاجه ساقعه وأكلمك في موضوع خارج البيع والشراء وسيبك من الي فات
وبعتذر للإداره إن كنت أخطئت في أسلوبي في الحوار
وللعلم أنا لم أقم بكتابة أي إعلان المشكله كلها كانت في كتابة رقم تليفوني
والله الموفق
أخوكم إبراهيم أسعد