الموضوع: فرش جلد ولا فرش عادى ؟

أولا الف مبروك وربنا يبارك لك في العربيه الجديده ويكفيكي شرها ان شاء الله..

بالنسبف للفرش الجلد انا جربت اللي موجود في السوق من سنتين تقريباً اللي هو مش أصلي والحمد لله ماكملش معايا 4 شهور وقشر وبقى شكله في منتهى الوحاشه والقرف ده غير الحاله النفسيه السيئه اللي كان عاملهالي في العربيه من كتر السخونه الفظيعه اللي بتتطلع منه حاجه تقرف :( فا انا لا انصح بيه ابداً والله وعن تجربه وعن حاجه حصلتلي عبيطه يمكن ومضحكه بس في الآخر عقدتني من اي فرش شكله كده .....كنت في يوم من الايام عندي Interview من سنتين ونازل الصبح متقمع وزي والفل والقميص ابيض وميه ميه ولا احسن اعلان اريال والله العظيم :p على ما رحت المكان بعد ساعتين تقريبا ملزوق في الكورسي وتفاعلات كيميائيه عماله تحصل وانا مش واخد بالي نزلت حاسس ان ضهري بتاع واحد تاني مش ضهري اتاري الأخ فرش العربيه شبيه الجلد حبك معاه يتقشر انهارده وعلى القميص الابيض طبعا القميص اتحول الى رمادي مبقع ابيض مش العكس :D ورجعت بيتنا تاني ولبست اي كلام واتأخرت وكان يوم فظيع انا زعلت على القميص والله اوي :pما علينا عموما لا انصح بالفرش الجلد ده ابدا عن تجربه والله......الجلد الطبيعي انا عمري ما جربته الحقيقه بس اعرف انه غالي جداً.

خليكي في الفرش القماش العادي وربنا معاكي ان شاء الله ومبروك مره تانيه .......آسف على الاطاله.

المشاركة الأصلية كتبت بواسطة mimysheckles

الاول نقول الفرق بين الاتنين
-القماش
* خفيف واحسن تهويه فى الصيف
* ممكن تركبى فرش قماش سهل الفك والتركيب بحيث لو حصل حاجة ممكن تشليه تغسليه او تغيريه خالص
* فى بقع مش هتطلع منه حتى لو غسلتيه بماية نار :)
* ارخص بكتير من الجلد
-الجلد
* فى الصيف بيسخن اوى ويعرق (ده لو معندكيش تكييف فى الكراسى)
* الجلد الطبيعى بيبقى غالى جدا بس بيعيش معاكى العمر
* مهما كانت البقع مش هتأثر فيه الا لو كانت مواد كيماوية ممكن تغير لونه
* بيستحمل اكتر من الفرق القماش لو جلد طبيعى لو صناعى ممكن يقشر منك وبيبقى حسب الاستخدام و درجه حرارة المكان المحيط(يعنى لو بتركنى فى شمس كتير هيقشر منك اسرع)
* ممكن تغسليه فى اى محطة بنزلين وانتى بتغسلى العربيه (جوه وبره) وبيبقى على طول بيلمع معاكى :)
* بيقى اشيك بكتير من القماش وبيدى فخامه خصوصا ان عربيتك سوده ومن جوه بيج هيبقى تحفه بس حاولى تجيبى نفس درجه التابلوه عشان يبقى ماشى مع العربية


كده انتى شوفى انهى احسنلك واختارى والاسعار انتى عرفتيها من الردود السابقة

i agree with his point of view.

أنا ركبت عند دوس فرش تفصيل جامد جداً كأنو الاصلي، من قدام قماش ومن الخلف جلد. بيكون في معامله خاصة لعملاء النايل موتورز. اتكلف ١٣٠٠ ج.م
اسامة دوس ٠١٠٢٧٥٢٧٥٦ ، اتصلي به ولو انتي قريبة من، روحي إتفرجي وخدي رئيو. مكانو في مصر الجديدة بالقرب من ميدان الحجاز.