الموضوع: محتار بين ســـيفــيـــك و جـــيــــتــــا

السلام عليكم في الأول
لو حضرتك حصرت أختياراتك في العربيتين دول أسمحلي أوضح الأتي من واقع خبرة بسيطة
بالنسبة للجيتا الأول انت حتجيب الشكل الحالي المعروف بالفتيس الجديد ال7 نقلات ولا حتجيب الشكل الجديد ( مش عارف نزل مصر ولا لسة ) لأن لو حتجيب الشكل الحالي حقولك أستني أحسن و هات الشكل الجديد



الشكل الجديد حيكون


ا
المفروض الشكل الجديد ده نزل بره خلاص بس مش عارف جه مصر ولا لأ

العربية الجيتا مع صديقي الأنتيم من 2008 خليجي الفتيس 6 سرعات ( لونها أسود ) جنط 17 و بستعملها معاه معظم الوقت
هي عربية تحفة ايجابياتها من وجهة نظري صالون واسع / شنطة خلفية كبيرة جدا أكتر من 550 لتر / عفشتها مريحة و ثابتة جدا في السفر و حتي سرعة 200 كم عن تجربة / موفرة جدا جدا في البنزين / تجهيزاتها و كمالياتها ممتازة / هي واطية بس اعلي نسبيا من السيفيك / صيانتها بنعملها في جسر السويس خلف حديقة بدر عند ناس متخصصة ( عمرنا ما دخلنا بها التوكيل )
سلبياتها برضه من وجهة نظري و ممكن تكون حاجة عادية عند غيري
صياناتها مكلفة جدا ( حوالي 5000 جنيه صيانة 80000 برة التوكيل ! ) زيت الفتيس لوحده حوالي 1300 جنيه و فلتر البنزين حوالي ألف جنيه / طبعا ارتفاعها منخفض فبتحك في كل المطبات تقريبا / سحبها مش سريع و أن كان وضع السبورت او الستيبترونيك بيعمل فارق كبير في الأداء / عفشتها مكلفة ( ربنا يسلم و ماتحتاجش تغير حاجة فيها و هي معمرة ) / القنطرة الرئيسية اللي شايلة الموتور و الفتيس ألومنيوم و بداخلها حساس الأيرباج ( تخاف من البلاعات العالية عشان ممكن تفتح أير باج و العربية سليمة )

بالنسبة للسيفيك
معلوماتي عنها محدودة بتجربة مرة ولا أتنين و ملاحظاتي عليها
أداء ممتاز من ناحية السحب ممكن تكون أفضل من الجيتا بس مجربتش سرعات عالية ( السيفيك فتيسها 5 نقلات علي حد معلوماتي )
بس بمقارنة الصالون أعتقد الجيتا أوسع / الشنطة الخلفية حوالي 380 لتر فقط ( اكيد الجيتا أكبر ) / و طبعا واطية جدا علي الطريق ( أوطي من الجيتا )

في الأخر لازم تاخد في الأعتبار استعمالك أنت حيكون أيه و عاوز أيه من العربية و في المجمل سعر أعادة البيع متقارب بس أعتقد الجيتا ممكن تكون مطلوبة أكتر شوية

و نصيحة أخوك اللون الأسود متعب جدا جدا في بلدنا المتربة دي لدرجة ان الواحد بيكون لسة غاسل العربية و بعدها بدقائق تلاقيها تربت تاني