تقرير مبدئي لأستلام وترخيص عربية نيسان صني 2011 ( بدون صور)
السلام عليكم ورحمة الله وبركاته
أسعد الله أوقاتكم بكل خير
بدايتاً أعتذر عن تأخري في إنشاء هذا الموضوع لأني كنت تعبان شوية بسبب تغيير الجو وبعدين لعدة اسباب هتعرفوها ان شاء الله خلال الموضوع . أيضاً أنا بعتذر لأني محطتش صور في الموضوع عشان كاميرا الموبايل بتاعي تعبانه وعشان مكنش عندي وقت بصراحه اني أخد صور للعربية بسبب ظروف الشغل والترخيص . إذا ربنا اراد هاخد صور بموبايل واحد صحبي وأحطها كرد في الموضوع هنا.
الحمد لله والفضل لله أستلمت العربية يوم السبت اللي فات وقمت بإنهاء أجراءات ترخيصها اليوم .
بالنسبة لحجز العربية وأستلامها : أنا عايز اقول اني حجزت العربية يوم 2 / 4 وأستلمتها يوم السبت اللي فات 16 / 4 من معرض السبع موتورز الموجود بشارع اللاسلكي بالمعادي . بدايتاً المعرض كويس وكل حاجه وأسلوب المبيعات في الشرح جميل وواضح بس الملاحظ عدم اهتمام المبيعات بالعملاء نهائياً لا حد بيتصل بيك ولا بتاخد مواعيد مظبوطه ولا حد بيديك معلومات عن أي حاجه خالص . بمعنى أنا حجزت العربية يوم 2 وورقها خلص بعدها بأربع أيام . كل يوم يقولوا ليك هتستلم العربية بعد يومين وهنتصل بيك ومفيش حد بيتصل بيك ومن الاخر كل شوية أتصل يقولوا ليا يومين وتستلم العربية وهكذا لحد ما استلمتها . المشكلة انك مش بتسمع اسباب مقنعه ولا بتعرف أيه سبب التأخير لدرجة أني جالي توهم أنهم عندهم العربية وحطينها في المعرض يومين للعرض قبل ما أستلمها . ثانياً ورق العربية عشان ترخصها نفس النظام يومين في يومين ومفيش حد بيتصل بيك يقولك أي حاجه خالص بالاضافة إلى ان في عدم مصداقية في التعامل بتاخد معلومات وكلام مش صحيح في بعض الاحيان . بالاضافة ودي ملاحظة مهمة جداً يا جماعة ورق المبايعة بتاعت العربية ليك مش مكتوب فيها غير أسمك فقط لا مكتوب فيها رقم بطاقتك ولا عنوانك ولا تليفون حتى هو أسمك فقط والموضوع ده عملي مشكلة كبيرة لأنهم كانوا كاتبين الاسم الرابع عندي غلط ( مع أنهم معاهم صورة البطاقة بتاعتي ) وعشان يتصلح الاسم يوم كمان وفي الاخر وبعد قرف الراجل راح مصحح الاسم بقلم جاف مع أن الاسم مطبوع بالكمبيوتر بوصوا أي عك في أي عك .
الخلاصة: بالنسبة لتقييمي للمعرض هو ممتاز كشرح وطريقة عرض العربية بس سيء جداً من ناحية الاهتمام بالعملاء بعد الشراء . ثانياً لا توجد عينات ألوان في المعرض تقدر تختار منها لون العربية اللي يعجبك . مفيش غير في برشور العربية بس وبصراحه الصور بتختلف عن الواقع بس على الاقل كانوا جابوا زي قطع صغيرة عليها اللون (زي غطاء تنك البنزين مثلاً ) حاجه تشبة غطاء تنك البنزين في الحجم وعليها اللون بتاع العربية .
بالنسبة للعربية : العربية بسم الله ما شاء الله جميلة جداً وناعمة في السواقة ومريحة وتقفيل العربية من جوه وبره ممتاز وده بيدل على الجودة المصرية في التجميع . العربية فيها الاوبشينز اللي ممكن أي واحد يحتاجه زجاج كهرباء وكاسيت CD يدعم MP3 و WMA بالاضافة إلى وصلة خارجية AUX تقدر تشتري أي وصلة من راديو شاك وتوصل الكاسيت بالموبايل أو mp3 بتاعك ، لوحة العدادات رياضية وجميلة فيها عداد RPM وساعة رقمية بالاضافة إلى العدادات التقليدية ، وسادة هوائية للسائق فقط ، مرايات كهرباء ، زر قفل مركزي للأبواب والشبابيك ، فوجات ، ريموت كنترول وأنذار ، أماكن تخزين كثيرة في مقصورة القيادة . ( اللي عايز المميزات كلها أنا ممكن اكتبها ليه من الكتالوج بتاع العربية )
الخلاصة : العربية مريحة جداً وجميلة بس من الملاحظ التالي : أستهلاك الوقود عندي مرتفع جداً ( العربية أتوماتيك ) ومش عارف اعمل أيه بصراحه والموضوع ده مضايقني أوي .. أرجوا الافادة ، يجب غلق الابواب بقوة نوعاً ما عشان تتقفل صح ( محتاجه ظبط أبواب ) ، لو نسيت وبطلت العربية خالص وشيلت المفتاح وزجاج الشبابيك مفتوح لازم تحط المفتاح تاني وعلى الاقل تشغل كونتاك عشان تقدر تقفل الزجاج ( مع العلم أن في سيارات بتديك 15 ثانية أو أكثر لأغلاق زجاج الشبابيك بعد سحب المفتاح من الكونتاك ) ، مش فاهم ومش قادر أفهم لحد دلوقتي رغم أني قرأت موضوع هنا في المنتديات بخصوص زر Over Drive الموجود بالفتيس الاتوماتيك بس مش قادر أفهم لحد دلوقتي هل موضوع Over Drive ده كويس ولا وحش ؟ وأمتى الواحد يستخدمه ؟ ثانياً بغض النظر عن وضع الزر (OFF | ON) هل لما اللمبة تنور في التبلوه بتاعت O/D off هل ده معناه أن Over Drive غير شغال ولا شغال؟؟
أصل المنطقي أن مدام Over Drive مش شغال يبقه اللمبة تكون مطفية لكن اللمبة لما بتنور بتظهر O/D off أنتا واخدين بالكم أن في كلمة Off فأنا مش فاهم بصراحه بقه أيه اللخبطة دي. ثالثاً هل من الخطأ أن الواحد يعمل تليين ووضع Over Drive يعمل ؟؟ رابعاً هل من الممكن أن وضع Over Drive ده هو السبب في أستهلاك البنزين الزائد اللي بعاني منه؟؟
بالنسبة لموضوع الترخيص : يا خراااااااااااااااااشي على اللي بيحصل في البلد . يا جماعة أحنا عندنا مشكلة بجد في المرور والموظفين لسه كأن الثورة محصلتش وبعدين سيبك من كده مش هعلق على النقطة دي عشان قلت بصراحه والناس بطلوا ياخدوا فلوس شوية . بس اللي لاحظته جايبين موظفين مش فاهمين أي حاجه خالص خالص ومقعدينهم في الشبابيك عشان يرخصوا للناس عربياتهم لا بيعرفوا يستخدموا الكمبيوتر ولا اي حاجه وعقبال ما يكتبوا حرف على الكمبيوتر يا نهاااااااااار يكون الناس زهقت واتخنقت يعني على سبيل المثال أنا العنوان بتاعي (الحمد لله أني لاحظت قبل ما الرخصة تطبع) أن العنوان كله ملزق في بعضه مفيش مسافات بين الكلمات زي مثلاً: مدينةنصرشارععباس العقاد وكلمة صني مكتوبة صاني (دي أطبعت في الرخصة كده :crying1:) ورقم الشاسية مكتوب 16Z0009999999 (الرقم مش حقيقي) معرفش أول مرة أشوف رقم شاسيه فيه 16Z مش عارف ده أيه ده (ده أطبع في الرخصة كده :crying1:)؟ ومن الملاحظ بقه أن لسه في كوسة ولسه في ناس واسطة بتخلص ورقها الاول ولسه في ناس بتقعد تشرب الشاي مع الباشا لحد ما ورقها يخلص وهما مستريحين وفي لسه موظفين بياخدوا أكراميات أو رشوة أو هدية أو عربون محبه سموها زي ما تسموها الواحد اتخنق بجد .
بتروح تشتري ورق الترخيص من الخزينة الاول ثم تخلي المختص ياخد ليك بصمة الماتور والشاسية وبعدين تخلي المهندس المختص في نفس المكان يختم على ورق الفحص ثم تروح تشتري طفاية الحريق وتختم الورقة بتاعتها ثم تتجه إلى أي كشك تأمين وتدفع قيمة التأمين الاجباري على حسب المدة اللي أنتا عايزها ثم تروح لشباك تصوير المستندات تشتري منه دوسيه وإذن استلام ثم تروح للشباك المختص وتديله كل الورق في الملف . هتستلم ورقة تروح تدفع بيها الضريبة في الخزينة وبعدين هترجع للشباك بتاع ترخيص العربيات الجديدة وأول لما الموظف المختص يخلص مراجعة ورقك هيقولك انتظر أستلام الرخصة . تروح تستنى عند شباك استلام الرخصة وبعدين لما تستلمها أن شاء الله بإذن الله راجع بياناتها كلها وأتأكد أن كل حاجه صح في الرخصة ثم روح لشباك استلام اللوحات المعدنية وأستلم لوحاتك وخلي الراجل المختص هو اللي يركبها ليك وألف مبروك وربنا يبارك ليك في عربيتك ويديك خيرها ويكفيك شرها وشر الطريق .
الخلاصة : طفاية الحريق بـ 121 ج وتأمين أجباري 3 سنوات بـ 318 ج وورق ترخيص 3 سنوات بـ 45 ج وضريبة 3 سنوات بـ 813 ج.
شكراً ليكم وبعتذر على التأخر في عمل الموضوع ده وبإذن الله قريب هجيب ليكم صور العربية .