نقطة تلاقى عمود الكردان مع الكرونة - لغز محتاج حل

السلام عليكم ورحمة الله وبركاته ،
عندى بيجو 505 موديل 1984 فيها المشكلة الآتيه:
بسمع طقة وانا بكبس بنزين أو لما أشيل رجلى من على البنزين فجأة وانا ماشى وبين الغيارات وانا ماشى بعد مادى الغيار
الطقة دى حاسس إنها جايه من نقطة تلاقى عمود الكردان والكرونة
لما بشحم العربية من تحت بتخف شوية الطقة دى بس بترجع تانى بسرعة
مش عايز أروح علطول للميكانيكى علشان ميعمليش فيلم هندى قولت أسأل فى المنتدى علشان يبقى عندى خلفية
ياريت لو حد عندو خلفية عن نقطة تلاقى عمود الكردان مع الكرونة وهل فيها كوتشة معينة ممكن تكون إتاكلت مثلا فمحتاجة تتغير ولا ممكن تبقى إيه المشكلة مع العلم إن العربية تعليق منفصل يعنى الكرونة والكردان ثابتين
وجزاكم الله كل خير

دي اسمها فلنشات او كرسي الوسط
لو مش مربوطه كويس او مبوشه بتعمل صوت الطقطقه دا

هي بتتربط كل فتره كصيانه عاديه زي ربط العفشه كدا

برجاء التوضيح يا بشمهندس سعد ، أصل سألت حد زمان عن الموضوع ده فقالى إن عمود الكردان فيه شرشرة فى نهايته عند دخولو فى علبة الكرونة وقالى أن سبب البوش والخبطة دى أنه محتاج يتقص الجزء ده ويتلحم جزء جديد بشرشرة سليمة
بس بصراحة مش مقتنع بده ، وبيتهيألى موضوع كرسى الوسط ده مرتبط بالعربيات إللى تعليقها الخلفى متصل ،، مش عارف
برجاء التوضيح وياريت لو فى صور توضيحية وجزاك الله كل خير

ممكن يكون المشرر فعلا اتاكل و ممكن صليبة الكردان عايزة تتغير

MMamdouh

ما هي صليبه الكردان هي كرسي الوسط او الفلنشات

لو هتتغير تقريبا الجديده ب 35 جنيه
لكن اعتقد انها تربيط بس

كرسى النص حاجه مختلفه عن الصلايب
الاول عباره عن قاعده بتثبت فى جسم السياره من تحت و عامود الكردان بيمر عبرها و يكون حواليه بليه تحكم الكردان و تساعد على اتزانه
اما الصلايب فدى مهمتها ان تكون نقطه الاتصال بين الطرفين الرأسى و الافقى الى بيكونوا عامود الكردان
و الله اعلم

اقتباس:

---

المشاركة الأصلية كتبت بواسطة aliyehia

كرسى النص حاجه مختلفه عن الصلايب
الاول عباره عن قاعده بتثبت فى جسم السياره من تحت و عامود الكردان بيمر عبرها و يكون حواليه بليه تحكم الكردان و تساعد على اتزانه
اما الصلايب فدى مهمتها ان تكون نقطه الاتصال بين الطرفين الرأسى و الافقى الى بيكونوا عامود الكردان
و الله اعلم

---

+1

MMamdouh

حلك فى تغيير صلايب الكردان وعادة بيكونو اتنين
وعلى فكرة نقطة التقاء الكردان مع الكارونا مش مشرشر ولا حاجة دى فلنشة خارج من الكارونا باويل سيل واربع مسامير والكردان بيجى عليها على طول بوصلة مرفقية
اللى نقطة الالتقاء مشرشر هو الفتيس او بادق شوية متلوتة الفتيس

والله الكردان دا قرفني
جيت غيرت كرسي النص و صليبه بدل ما يتعدل لا باظ زياده

ف فكيته تاني و وديته للخراط و طلع النص الي ورا معووج و مهما عمل فيه ما بيتظبطش
لسه بقى بدور علي نص الكردان عشان اظبط العربيه

لو هتفك الكردان اول حاجه وديه لخراط يبص عليه لان لو فيه عوجه و لو بسيطه بتعمل رعشه طول ما انت ماشي