الموضوع: استفسارات عن الشارك

المشاركة الأصلية كتبت بواسطة pirlo2000

السلام عليكموووو....

انا بقالي فترة بفاضل و اقارن بين كذا عربية و بصراحة داخلة دماغي الشارك .....

بس عندي استفسارات الحقيقة و اتمني الافادة...

اول حاجة هل ليها توكيل في مصر دلوقتي و لا بيقفل خلاص؟؟ يعني لما احب اعمل صيانة هلاقي مكان اعمل فيه صيانة و كده و لا هالبس؟؟ و هلاقي فيه قطع الغيار و لا مش هيبقي فيه و عليك بخير بأه بالتوكيل الجديد اما يفتح انشالله..... يعني الناس اللي معاها متسوبيشي شارك دلوقتي بيعرفوا يصاينوا عربياتهم تمام و لا لأ؟ و المعاملة كويسة و لا مستبيعين علي اساس انهم كده كده هيقفلوا؟

قطع غيارها متوفرة برة التوكيل و لا لأ ؟ اصلي و تقليد يعني؟

في مراكز خدمة معتمدة غير التوكيل زي هيونداي كده و لا لأ ؟ و لو فيه كويسين و لا اي كلام ؟

متوسط استهلاك البنزين؟

اخر سؤال جانبي بأه ززز فيها AUXilllary في الكاسيت؟

معلش انا سألت كتير بس فعلا محتاج مساعدة الخبراء و خصوصا ان مش كل يوم هجيب عربية .....

السلام عليكم

استاذ pirlo2000 ,,

بالنسبة لنقطة التوكيل,,التوكيل حيفضل فاتح ان شاء الله و لما التوكيل الجديد يبدأ حيتنقل الضمان للتوكيل الجديد و النقطة دي الاستاذ / طارق زويل كاتبها في موضوع التصفية و برده لما اشتريت العربية قالولي كده
و الصيانة حتتعمل عادي في التوكيل القديم ان شاء الله لحد ما التوكيل الجديد يفتح باذن الله

بالنسبة لقطع الغيار موجودة في التوكيل و بره التوكيل فيه الاصلي و فيه التايواني
و التوكيل الجديد حيبدأ ان شاء الله في اول مايو و حينزل العربية الشارك عشان تطمن اكتر انو اكيد حينزل معاها قطع غيارها

بالنسبة للناس اللي معاهم الشارك,,بالنسبالي انا لسه جديد و اول صيانة هي ال1000 كيلو و حيتم تغيير فيها الزيت بس و الصيانة اللي بعد ال1000 كيلو حتبقى ال10الف كيلو و هكذا الصيانة حتمشي كل 10الف كيلو
و فيه ناس هنا عملت الصيانات بتاعتها عادي و مفيش اي مشكلة خالص

بالنسبة للمعاملة كويسة او لا,,انا معرفش الصراحة لاني لسه ما روحتش,,الاعضاء الكرام ممكن يردوا عليك فيها
و بالنسبة لمراكز الخدمة المعتمدة من التوكيل,,يوجد مراكز خدمة معتمدة,بس برده حكاية كويسين او لا,,الاعضاء حيردوا على حضرتك فيها

بالنسبة لاستهلاك البنزين,,,الصراحة انا لسه ما اتحركتش بالعربية كتير
بس الاعضاء الكرام المالكين ليها هنا بيشكروا في استهلاكها للبنزين و بيقولوا ان الاستهلاك اقتصادي جداا

بالنسبة لنقطة الكاسيت دي,,انا بش فاهمها من حضرتك اوي او معناها ايه؟؟
بس اقدر اقول لحضرتك ان الكاسيت تحفة ما شاء الله
فيه وصلة AUX و كمان فيه خاصية كل ما تزود السرعة صوت الكاسيت يعلى و المعلومة دي عرفتها عن طريق العضو المحترم خوليو

بس العربية بجد محترمة
يا رب اكون قدرت افيدك و لو بحاجة صغيرة
و ان شاء الله الاعضاء الكرام المالكين للعربية هنا حيفيدوك اكتر

و تقبل مروري

المشاركة الأصلية كتبت بواسطة ma7oo

الله بنور عليييييك ياباسم بجد كل كلامك صح ازود عليه انك تعمل صيانتك فى المصرية اللى فى قليوب عند المهندس طارق زويل كوبسين اوى

ده بنورك يا ماحو,,و بعدين انت الاصل
و فعلا نسيت اقول مركز الصيانة اللي في قليوب كويس,,ده كفاية انه فيه المهندس المحترم طارق زويل
بجد شخصية محترمة و ذوق