الموضوع: عااايز راااجل من أوماترا يفهمنى !!!!

أمبارح يا جماعة رحت هيونداى المهندسين عشان أبص على ال Accent RB ...... أستقبلنى salesman ذوق جدآ و لقيت
على الرغم من الأزمة اللى فى البلد اليومين دول ناس كتير بيسألوا على العربيات الهيونداى بكل أشكالها و ال salesmen اللى
فى المعرض واقفين معاهم بيجاوبوا على أسئلتهم .
نيجى بقى لل RB ..... هى شكلها من برة شيك قوى لكن من جوة تحس أنك قاعد فى عربية صينى
وأنا راجع قلت لما أروح أبص على الأيفو .... حبى الأول فدخلت أوماترا الدقى لقيتة فااااااااااااااااااضى مفيهوش ولا
عميل يوحد ربنا و مكانش قاعد فى التوكيل غير salesman واحد بس و تقريبآ كان نايم أول ماشفنى
أستغرب وقال الله ما أجعلة خير .... دة زبون بجد ولا أنا بيتهيألى .
و بصراحة الرجل معايا كان قمة فى قلة الذوق دة حتى ماكلفش خاطرة و وقف وهو بيتكلم معايا
المهم عرفت منة أن البرافو بقت ب 170000 جنية تخيلوا ؟؟؟؟؟؟ طب ما أكمل و أجيب فولكس .......
هو فى أية ؟ فاكرين يا جماعة زمااااان فى التمانينات كاتت العربيات الفيات منتشرة فى بلدنا أزاى ؟ وكان اللى بيشترى عربية
كورى بنضحك علية و نقولة أنت عبيط يابنى فى حد عاقل فى الدنيا يشترى عربية كورى ؟ دلوقتى اللى بيفكر فى الفيات بقى
هو اللى عبيط فى رأى معظم المصريين اللى بيعشقوا كل العربيات الكورى ....... يا خسااااارة

السلام عليكم
يجماعه انا عندي عربيه فيات جراند بونتو ٢٠١٠ وفعلا اتضررت كتير جدا من اوماترا في الاول
انا ليا وجهه نظر في موضوعين اولا غلي ثمن العربيات الفيات
مبدئيا
- انا اتفرجت علي سعر البونتو الايفو مثلا في انجلترا سعرها في حدود ٨٠٠٠ جنيه استرليتي
يعني ٨٠ الف جنيه مصري وطبعا تعالي بص علي الجمارك المصريه هنا اد ايه وهامش ربح الشركه
هتلاقي ان العربيه كانت لازم تغلي خصوصا بعد ماسعر الجنيه المصري نزل ( انا شايف ان ده منطقي جدا)

- معظم الناس لما كانت بتشوف العربيه وتبض علي سعرها تتوهم لانها مقارنه باسعر عربيات كوري كانت رخيصه جد يعني الناس مش جشعه بس مشكلتهم فعلا دلوقتي ان الجنيه المصري نزل مقارنه باليورو

الفكره مش مرتبات العماله هناك ولا كل الكلام ده
العربيه تمنها باليورو و قطع غيارها باليورو فلازم سعرها يتغير مع ارتفاع السعر

والله انا واحد من الناس اللي فعلا كانت مخنوقه من اوماترا بخصوص مشاكل موجوده كتير في الصيانه والمشاكل اللي ممكن تحصل لكن انا حسيت باختلاف تام في الكام شهر اللي فاتوا

الناس بقت مهتمه جدا انها تدي احسن شغل للعميل ، وترضيه وفيه ناس بتكلمهم من هناك كل فتره تشوف لو فيه حاجه تعباك في العربيه وتحددلك ميعاد تروح تصلحها

وفيه ناس هناك متعاونه جدا امثال "الاستاذ احمد سعد " انا بحس اني لما بروح هناك انه ناقص يعملك العربيه بنفسه من كتر ما بيبقي مديك اهتمام


انا لسه واخد عربيتي انبارح كنت عامل حادثه بسيطه (الحمد لله)
ماشاء الله علي الدهان والسمكره كان الحاجات خارجه من المصنع


انا اكتر حاجه كنت بحبها في اوماترا هيا ان كل او معظم قطع الغيار اصلي (يعني تحس ان لما حاجه تبوظ انك ممكن تجيب زيها بالظبط بنفس الكفاءه من غير ماتزعل)


دلوقتي انا اشهد ان اسؤء قسم في التوكيل ( السمكره والدهان ) بقي احسن قسم بناء علي تجربه شخصيه