تغيير فلتر البنزين للفيرنا
المفروض كنت اغير فلتر البنزين في صيانة ال 20000 كم
المهم انا مغيرتهوش لأن العربية تمام ومفيش منه مشاكل
المهم قريت كام مقالة عن اضرار عدم تغيير فلتر البنزين وبعد ما قريت قلت لا لابد يتغير انا مش هوفر على حساب العربية
ودورت على النت على فيديوهات لكيفية تغير فلتر البنزين للفيرنا واتفرجت عليه
لقيت الفيديو بيغير الفلتر في 3 دقايق بالظبط قلت تبقا الحكاية بسيطة وزي الفل وتمام واعملها انا بدون مشاكل
بدأت شغل الساعة 7
فضيت شنطة العربية طبعا
وقمت داخل جوا الشنطة وقعدت فيها وفكيت الكنبة
وبعدين اتنقلت للخطوة التانية اللي خدت وقت كبير وهو اني افك كلبسات الكنبة من جوا
انا مكونتش عارف بتتفك ازاي بس في النهاية وصلت للطريقة وفكيتها
وصلنا للمرحلة المهمة بقا وهي تغيير الفلتر نفسه
ااولا الفلتر مزنوق في مكانه جدا وبيخرج بصعوبة بس خرجته
جيت اغير الفلتر بقا
الفيديو اللي اتفرجت عليه الفلتر لما اتغير اتغير بسلاسة
انا يا دوب لسة بشيل الكلبس واشيل الخرطوم لقيته بينطر بنزين طبعا قمت كابسه بصباعي وعملت عملية تغيير سريعة
المشكلة اللي بعد كدة كانت في اني ارجعه مكانه لأن فعلا المكان ضيق جدا
المهم الحمد لله ركبته ورجعته مكانه وقفلت عليه
قلت اجرب العربية قبل ماقفل الشغل بقا
دورت العربية اول مرة ما دارتش ودا طبيعي جدا
تاني مرة دارت المهم قعدت اديها شوية بنزين وبتاع عشان اتأكد انها تمام كدة وكان زي الفل
جينا بعد كدة لمرحلة تقفيل الشل واللي كانت أسوأ مرحلة
مبقيتش عارف اعمل الكلبسات من جوا الاول واللا المسامير من جوا الشنطة الاول؟
جربت الكلبسات الاول وبعدين المسامير ماتربطتش
قلت يبقا العكس
وبعد عناء ربطت المسامير ومن ثم عملت الكلبسات الحمد لله وبكدة اكون غيرت فلتر البنزين بنفسي
رغم ان عملية التغيير اللي انا اتفرجت عليها على النت واللي استهلكت 3 دقايق بس واستهلكت معايا ساعتين كاملين من الشغل إلا إني كنت سعيد جدا لما وصلت لفلتر البنزين وغيرته بنفسي
هي مش شغلانتي فعلا ولكن الشعور انك عملت الحاجة بنفسك بمجرد ما شوفتها دا احساس رائع جدا
الوقت كان طويل والعملية كانت متعبة فعلا بس انا فعلا سعيد بالتجربة دي بغض النظر عن الهدوم اللي باظت والتعب اللي شفته بس تجربة ادعو الجميع لتجربتها اننا ممكن نعمل الحجات البسيطة عندنا في البيت يا شباب !
معلش دوشتكم :grin54: