السلام عليكم

غيابي الكتير عن المنتدى خلى موضوع كثره سرقات السيراتو دا مفزع بالنسبالى!
كنت فاكرها حاله ولا أتنين لكن أكتشفت أن فى حالات كتيره
مش هخوض فى السبب لأنى فى الحقيقه معرفوش ومش هفتى
لكن خلينا فى المهم وهو الحل لمشكلتنا
أنا كان سؤالى الوحيد لكل واحد بيعمل موضوع عن أن السيرتو بتعته أتسرقت هو أنت مركب أنذار ولا لأ؟
طبعا ليه التركيز عليها واضح
عربيه منتشره فأكيد هتتقطع بسهوله وتتباع هوا
وكمان مع كثرتها وعدم ندرتها يصعب إيجادها
المهم
لا غنى الان عن تركيب الانذار
أى كان نوعه لكن حاجه تخلى الحرامى يفكر مرتين بدل مره قبل ميسرق العربيه
ايه الازمه فى كلبش للدركسيون بردو يخلى الحرامى يفكر قبل ميسرق العربيه وهياخد وقت ويكون معاه مقص وحوار
هيقول لنفسه بلاها عربيه وفى غيرها 100 واحده!
يبقى من الان...
كل واحد معاه سيراتو ميستخسرش 600 جنيه أنذار محترم شرا وتركيب
ويشترى عربيته الى ب100 ألف وأزيد
أنزل من بكره أشترى الانذار وركبه وخلى لمبه الانذار فى مكان واضح علشان الحرامى يعرف أن العربيه فيها أنذار
كمان بحس فى بعض الناس لا مبالاه فى ركنه عربيتهم
متركنش فى أى حته!
متركنش فى شارع ضلمه ولا لازق فى حيطه علشان الضل!!!
أشترى عربيتك وأركن فى شارع نور و مكان آمن ولو حتى هتتمشى شويه مش خساره فى صحتك
طبعا الله خير حافظا لكن لازم ولابد وحتما نتخذ بالاسباب ونقول "اللهم إني أتخذت بأسبابك وأنى أستودعك سيارتى فأنه لا تضيع ودائعك" وأتخاذ الاسباب الى أنا قلته ده من أنذار لأتخاذ الحيطه فى اماكن الركن
لو المكان غريب عنك متغطيش عربيتك فيه حتى لو هتبات
لأن العربيه المتغطيه أسهل فى السرقه
قلت مليون مره ولازلت برشح أنذار spy 2-way
وهعيط لو حد سألنى دا أيه ولا يتجاب منين
لأنى قلت 200 مره فى مواضيع ومشاركات ورسائل خاصه :)
لكن مش مشكله طالما دا موضوع منفصل
دا من الاخر أنذار جامد أخر 25 حاجه :)
أهم ما فيه
أن الريموت بيزمر مع العربيه
ودا مهم لو راكن العربيه بعيد أو مش ناوى تسمعها وهى بتعيط لأى سبب كان
الريموت يفضل جنبك على طول
حتى وانت نايم لو نومك خفيف هيصحيك من النوم
لما يزمر تجرى على التراس وتبص على عربيتك
عيال بتلعب كوره أو كلب قتم نايم فوقيها
المهم أطمن على عربيتك أنها جنبك نظريا طالما الريموت دا جنبك
تجيبه من "غريب" فى التوفيقيه
أى حد فى التوفيقيه يعرف مين غريب وهيدلك عليه
رجاء حار لكل مالك سيراتو متبخلش على نفسك وهات اى أنذار من فضلك
تخيل نفسك لو كنت مكان أحد زملاتنا الى فقضوا عربيتهم لا قدر الله
بعد أذنك ...ركب أنذار