الموضوع: مفاجأة من العيار الثقيل.........وائل غنيم أخوان مسلمين

المشاركة الأصلية كتبت بواسطة cheetos_892005

انا مصدق انها مجرد صدفه معاه ......

واحد زي اي واحد فينا استفزه قضية خالد سعيد

عمل الجروب

الناس اتلمت .......بقى مشهور

صورها في دماغك كده ......لو كان الجروب محدش دخل عليه قول يجي 10 الاف بس مثلا

كان هيبقى مين و ائل غنيم ؟؟؟؟؟؟؟؟؟

صورها برضه في دماغك واحد لاعايش في مصر ولا أتولد في مصر
ومظبط أموره في الأمارات وماسك منصب محترم في شركة زي جوجل أيه ألي يخليه يشغل باله ويبقى أحد محركي الثورة المصرية ويخاطر بمنصبه والكارير بتاعه
وواحد بيزنس مان زيه أكيد حسبها كويس لو الثورة فشلت كان مصيره هايبقى أيه!!!
وبعدين ده محضرش الثورة وشافها فيديو ولا أيه
شواهد كتيرة بتأيد تحليلي

المشاركة الأصلية كتبت بواسطة otefa

!!!!
أنت مصدق أنه ظهر من العدم بدافع وطني شخصي فقط !!

انا عن نفسى مصدق ان ممكن اى شاب فى البلد بدافع حبه ليها يعمل كده وربنا يوفقه

ومصدق ان الشخص ده اتطور من كتاب معروفين زى ابراهيم عيسى ومن حركه كفايه اللى هما اول ناس قالت كفايه وشباب 6 ابريل والجمعيه الوطنيه للتغيير لوائل غنيم

الناس دى مش مخلوقات عجيبه
دى ناس بتحب بلدها وكان نفسها تتغير للاحسن
بس الفرق بيننا وبينهم انهم كانوا اشجع وصوتهم اعلى
زيهم زى الناس اللى نزلت الميدان من اول يوم ونزلت جمعه الغضب وكانت موجوده يوم موقعه الجمل ومخافتش ولا اتهزت
الفرق ان ده استغل امكانياته واسلوبه والتانى استغل قلمه والتالت نزل بنفسه واستغل حماسه وشجاعته

المشاركة الأصلية كتبت بواسطة casperinoo3873465882

صورها برضه في دماغك واحد لاعايش في مصر ولا أتولد في مصر
وائل اتولد في مصر ..وسافر مع ابوه السعوديه ورجع كمل تعليمه في مصر واتخرج من حاسبات جامعة القاهره

ومظبط أموره في الأمارات وماسك منصب محترم في شركة زي جوجل أيه ألي يخليه يشغل باله ويبقى أحد محركي الثورة المصرية ويخاطر بمنصبه والكارير بتاعه
وديه حاجه تحسب ليه وتخلي وائل انسان محترم زيه زي ناس كتيير من اللي نزلوا..مكنش بيفكر غير في البلد ومش فارق معاه نفسه


وبعدين ده محضرش الثورة
غنيم دوره مكنش مقتصر علي انه حدد يوم 25 ...انا مشترك في الجروب ده من ايام لما كانوا اقل من 50 الف .سر استجابة عدد كبير هو احترام الناس للادمن نفسه ..فيه صفحات كتيير كانت معموله كأعجاب بأدمن جروب كلنا خالد سعيد من غير مايعرفه ميين ده ..و الحمله القوميه لترشيح ادمن خالد سعيد رئيسا للجمهوريه :)..ده حتي مصراوي عمل معاه لقاء وقال عليه الشخصيه الاكثر طلبا في مصر ...
وحتي ساعتها طلعت اشاعات انه ابراهيم عيسي ..وشويه يقولوا ده حمدي قنديل..
.ادمن خالد سعيد كان ليه مصدقيه وده اللي خلي حركات زي 6 ابريل وكفايه والوطنيه للتغيير والبرادعي رئيسا تستجيب للدعوه للنزول يوم 25

اما بقي موضوع مخبارات مصريه فده مستحيل طبعا ...

لأن بعد يوم 28 واختفاء وائل غنيم .
بداء الشباب اللي نسق مع وائل يعلنوا ان وائل غنيم هو ادمن خالد سعيد..
وشادي الغزالي حرب اعلن ده في جريدة الدستور..
وانتشر الموضوع جدا بين الناس في الميدان..
.حتي عندما طلب ان حد يتكلم بأسم شباب الثوره ..اختاروا وائل غنيم للاجبار علي اخراجه
يعني لو انت شاكك ان وائل مش ادمن خالد سعيد ..لأ وائل هو الادمن وده اكييد...
انسان عادي جدا ..بس عاطفي شويه وبيحب بلده جدا ..
وممكن تتأكد من ده من حسابه علي تويتر ..من التويتات اللي كتابها قبل 25 يناير بشهور ..بس هتتعب شويه لحد ماتوصلها ..بس ده لو انت عايز تعرف الحقيقه بدل سوء الظن

+11111111111

ومش شايف حاجه غريبه ان واحد يكون شغال فى مجال كويس او له كاريير يخاف عليه ينسى بلده ويكرهها
على كده الفئه المطحونه من الشعب تعمل ايه

وبعدين موضوع انه حضر الثوره لاء كان موجود وهو نفس اسلوبه من اول يوم وهو اللى دعا الناس لجمعه الغضب وكان قايل ان فيه ادمن تانى هيكمل طول ما هو فى الشارع وده ظهر واضح بعد ما تقبض عليه كان فيه صوره غريبه اتحطت على الجروب لحد دلوقتى مش فاهمها كانت صوره واحده بتشاور من شباك وتحتها مكتوب صباح الثوره ادمن 2
تقريبا دى كانت اشاره لانه متغيب
وهو مش البطل اللى نزل حارب بسلاحه هو مجرد انه نقلنا من مرحله السكوت لمرحله التفاعل زى الناس اللى نزلت فى الوقفه الصامته الاولى على الكورنيش الناس دى كانت جاهزه بس محتاجه الفكره والتشجيع

ونفس اللى حصل فى يوم الغضب الاول لما الناس نزلت الشارع تخبط بغطيان حلل علشان تقول انها مش راضيه

وقبل 25 يناير كان فيه اكتر من الف واحد مش بس قالوا انهم هينزلوا لاء دول كمان بعتوا صورهم وهما ماسكين ورق بيقول انهم هينزلوا يعنى ناس مش خايفه او وصلت لمرحله اللاعوده

ومش هنرجع تانى نقول مين اللى حضر ومين اللى لاء نفس فكره البرادعى وفى الاخر كلنا شفنا صوره وهو بيترش ميه فى الشارع

ونفس فكره اننا نشكك فى كل واحد منزلش حتى لو كان عايش فى الخارج يبقى من حقنا نطالب بحرمانه من مكاسب الثوره ونخليه عايش فى الفساد طالما كان راضى وساكت

وبالنسبه للمخابرات انا فاكر تقريبا ان كان رئيسها عمر سليمان ورئيسه حسنى مبارك يعنى الناس دى كانت هبله وبتخرب بيوتها بايديها


ولباقى الاجابات انظر التوقيع لانى حاسس ان فيه ناس زى ما تكون غيرانه او مش مصدقه ان فيه انسان بيحب بلده حتى لو غنى او فى منصب كويس ومشربش من المجارى
او مش قادره تقتنع ان فيه حد ممكن يحاول ويقدر فعلا يغير بتوفيق ربنا له

((وبالنسبه للمخابرات انا فاكر تقريبا ان كان رئيسها عمر سليمان ورئيسه حسنى مبارك يعنى الناس دى كانت هبله وبتخرب بيوتها بايديها))
أنا مش عارف بصراحة أنتم مقتنعين بالكلام ده ألي هو أن المخابرات العسكرية والجيش من الممكن فصلهم عن بعض .............ال2 مكملين لبعض يارجالة وضيف عليهم جهاز الأمن القومي حد عنده شك في النقطة دي؟
حد عنده شك أن الجيش شريك وأساسي في الثورة وحمايتها على أقل تقدير؟