*كيا بيكانتو* صيانة ال40000 * Eit

أول ما استلمت العربية كانت عاملة 35000 كم و قررت انها أول ما تتم ال40000 هوديها التوكيل يعمل كل المطلوب ....بس عند ال38000 قلت أروح و خلاص....

كنت قاريت الاعلان في أهرام الجمعة من شهر كده عن التوكيل بتاع محمد نصير EIT اللي في أبو رواش...و قررت ان هو ده اللي هاروحه...و فعلا روحت و كانت اول مرة أروح أبو رواش و تهنا توهة محترمة لأنه في اخر أبو رواش خااالص:o

دخلنا و من حسن حظنا انه كان فاضي تماما مكانش فيه غيرنا واقفين بالعربية....جه مهندس الاستقبال و قلنالوه عايزين نعمل صيانة ال40000 و قلتله علي شوية ملحظات في العربية و كتبها في الجوب...و قال ان صيانة ال40000 هتكلف 750 جنية و بالحاجات اللي انتم طالبنها ممكن توصل ل1000...و هتاخد 3 ساعات شغل...قلنا اشتغل يا باشمهندس...

دخلنا الأول اتفرجنا في صالة العرض و شوفنا البيكانتو الجديدة...الشيئ اللي عجابني قوي فيها هو اللون الاسود عشان كان بيلمع بطريقة غريبة عكس عندي خالص...لأن اللون عندي بقي بهتان و مش منور كده...بس ده الطبيعي في شوارع مصر:)

نزلنل بعد كده علي قاعة الانتظار...واسعة و فيها شاشة كبيرة و فيلم علي روتانا:D....و جميع انواع مجلات السيارات ...قعادنا شوية و شربنا الشاي...و نده علينا المهندس قالنا لاقينا انها محتاجة طنابير و تيل أمامي (التيل أنا عارف انه محتاج تغيير لكن الطنابير كانت كويسة) و محتاجة بطارية كمان (كانت كويسة برده من يوم ما خدت العربية بس شكلها كان يقرف و مملحة)

و بما ان والدي كان معايا(الفلوس يعني:D) قاله غير الطنابير و التيل بس خلي البطارية احنا هانغيرها و قالنا اه بلاش عندنا عشان ب 750:D:D

بعدها بساعة بالظبط نده علينا تاني و قالنا خلاص العربية جاهزة..(و فعلا قعدت 3 ساعات بالظبط زي ما قال)

لاقينا العربية مغسولة و الموتور و العفشة مغسولين و زي الفل مع اني ماطلبتش...و قالي غيرنالك كام حاجة قولتله فعلا انا كنت نسيت أقولك عليهم(لمض و فلتر التكيف).....و بيدوك كل حاجة قديمة اتغيرت في العربية

و جاء وقت الحسااااب...اليكم قائمة باسعار قطع الغيار و الصيانة اللي دفعتها:

عدد 2 طنبورة أمامي 410
تيل أمامي 201
فلتر بنزين 65
فلتر زيت 25
فلتر هواء 25
عدد 4 بوجيهات 60
فلتر تكيف 80
زيت شل هيليكس ألترا 205
زيت فرامل 11
زيت فتيس 35
مبرد رادياتير شل 38
لمبة أمامية 60
لمبة شبورة امامية 29
(الأسعار غير شاملة ضريبة المبيعات)

تكلفة مصنعية صيانة ال40000: 137
حل و تركيب عدد 2طنبورة مع تيل الفرامل: 82
أعمال ميكانيكا: 27

المجموع شامل ضريبة المبيعات: 1652

طبعا الاسعار عالية بس مش في كل حاجة...بس أحنا كنا مقررين ان هنوديها المرة دي بس عشان نبقي متطمنين 100100 من العربية....

بس الناس محترمة جدا و مش مهملين و كنت سايب حاجات غالية في العربية و باينة (موابيل لسة في علبتة و سماعة بلوتوث) و محدش قرب منهم...

و احنا ماشيين جيت ادور ما كانتش عيزة تدور... هيه أصلا عمرها معملت معايا كده...قولت اكيد بوظوا حاجة او المية بوظت حاجة جوة الموتور.....ندهت المهندس و قالي يا فندم البطارية و انا الفار بيلعب في عبي و قعد يحلف و انا مش مقتنع برده...فا قالي طب استني...و راح جاب عامل معاه تونجر و ربطة في البطارية و راحت دايرة:rolleyes:...شكلي كان وحش طبعا بس ارتحت:)

بالنسبة للعربية بعد الصيانة اكتشفت ان مكنتش المفروض ابقي مبسوط بيها قبل الصيانة:D...رغم انها كانت زي الفل و مابشتكيش من اي حاجة...بس السحب و صوت العفشة اختلفوا تماما و التكيف اكتر حاجة بسطاني...بقي رهييييييب علي 1 و ببقي هاتلج و اول ما أطلع علطول مابيخدش وقت يسقع

روحت بعد كده علي بتاع البطاريات بتاعنا و شافها قالي دي جايبة ربع...قلتله ارمي و هات جديد قالي الجافة AC Delco ب 330 ...و السائلة ب 270 و القديمة بيخدها ب30 جنيه...هات الDelco يا عم....و ركب و دارت زي الفل :).....و علي فكرة اسعار البطاريات نزلت تاني و بقت شبه طبيعية

ديه تقريبا كل حاجةعملتها اليوم ده...اينعم صرفت كتير بس كده العربية امنة تماما و يتسافر بيها مستريح من غير مشاكل ان شاء الله..
____

اللي عنده أي استفسار انا جاهز

يارب اكون افدتكم و وضحت حاجات كانت مبهمة

ممتااااااز
جدا

ده معناه ان كيا فعلا أصبحت في يد أمينة
الف مبروك على الصيانة

بس أنا زعلت ان البطاريات رخصت (لسة شاري واحدة من أسبوع AC Delco ب 500 بندق)

هايل يا استاذ نادر...بص انا لسه من يومين جايب عربية نسخة من اللى معاك بس 2004 عامله33 الف كم ...ياريت تقولى ايه المطلوب اعمله كصيانة..هى الحاجه الوحيدة اللى قالولى ساعه الكشف انها حتتعمل اويسيل الكرنك و ده كان مسرب ووقف تسريب بس لازم يتغير..لكن غير كده مش عارف اعمل ايه...ليا سؤال..هو الباور ستيرنج بتاع العربية دى فعلا خفيف اوى اوى كده ولا انا اللى عندى مشكلة معلش انا كنت راكب 3 عربيات باور قبل كده ملقتش حاجه بالمنظر ده

أول ما تتم ال 35 روح اعمل صيانة ال 35000 و ديه عبارة عن الكشف علي جميع أجزاء العربية و تربيط و تغيير ما يلزم و هايقولك محتاجة ايه و هيعملو الاويل سيل ده كمان....

الباور فعلا خفيف جدا...أنا عندي رغم ان فيه جنوط عريضة الا انه خفيف جدا في المناورات...و بيثيت علي السرعات...مبيلعبش خالص...و أي استفسار انا تحت أمرك

شكرا على ردك..انا حروح ان شاء الله و عالله ميطلعش فى حاجه تانية مستخبية..وكويس ان موضوع الباور ده بيثبت على السرعات لانه كان حيبقى مشكلة.

مبروك الصيانة يا نادر وعقبال صيانة ال 400 الف
انت هاتقولي على نصير
ناس زي الفل وفاهمين شغلهم جدا
الاسعار مش غالية
بس لكل حاجة لوحدها وانت تعرف
بس المشكلة انت عملت صيانة ال 40
ومعروف ان صيانة ال 40 و 80 بيبقي فيهم تغيير حاجات كتير
وكمان طنابير
واضح ان اللي قبلك سواقتة وحشة
ربنا يباركلك فيها
ورح للتوكيل كل 10 او 20 الف

اقتباس:

---

المشاركة الأصلية كتبت بواسطة karim_monir

مبروك الصيانة يا نادر وعقبال صيانة ال 400 الف
انت هاتقولي على نصير
ناس زي الفل وفاهمين شغلهم جدا
الاسعار مش غالية
بس لكل حاجة لوحدها وانت تعرف
بس المشكلة انت عملت صيانة ال 40
ومعروف ان صيانة ال 40 و 80 بيبقي فيهم تغيير حاجات كتير
وكمان طنابير
واضح ان اللي قبلك سواقتة وحشة
ربنا يباركلك فيها
ورح للتوكيل كل 10 او 20 الف

---

الله يبارك فيك يا كريم:)

علي فكرة الطنابير أما بصيت عليه كانت كويسة جدا ...لو اتخرطت هترجع زي الفل لأن مكانش متاكل منها غير حوالي نص ميللي...و لاقيت حتة جواها متعضعضة غالبا كان فيه زلطة بين التيل و الطنبورة و داس عليها فرامل...بس الواحد كده ارتاح و ريح باله

مبروووك علييييك البيكانتو العروسة بعد ما اتظبتت :)


نااادر نااااااااادر

شفت السيراتوووووووو ؟؟؟؟؟؟؟؟؟؟؟ ايه رأيك فيها ؟؟؟

مبروك يا نادر صيانة ال 40 و عقبال ال 400 ان شاء الله
والاسعار انا مش شايفها فارقة كتير عن برة
بس ماتسبش العربية كتير كدة من غير رعاية عشان متوهش منك
وكل حاجة مهما كانت صغيرة بتفرق كتير و خصوصاً لما بتكون حساس لأداء العربية
و ربنا يباركلك فيها

معلش انا مش شايف تمن الطنابير غاللي
ولما بتخرط بتنزل نص مللي عن المقاس الاصلي
وبيفرق في اداء العربية عشان مشوار زيت الباكم وحساس لمة الفرامل لما الكنترول يوني يديها اشارة لما التيل يتاكل
كدة افضل بكتير
العربية برضه لسه ماكملتش 5 سنين

اقتباس:

---

المشاركة الأصلية كتبت بواسطة NaderNabil

روحت بعد كده علي بتاع البطاريات بتاعنا و شافها قالي دي جايبة ربع...قلتله ارمي و هات جديد قالي الجافة AC Delco ب 330 ...و السائلة ب 270 و القديمة بيخدها ب30 جنيه...هات الDelco يا عم....و ركب و دارت زي الفل :).....و علي فكرة اسعار البطاريات نزلت تاني و بقت شبه طبيعية

---

ألف مبروك يا نادر وعقبال الـ 400 ألف
بس قوللي صحيح
هي البطاريات رخصت؟؟
انا كنت سامع أرقام بعد الـ 500 بكتير

الف مبروووووك يا نادر و عقبال صيانة ال 200 الف كم لما تخلصها نبقى ندعيلك لل 400 الف :p:p:p:p:p:p:p:p:p:p:p:p:p

ألف شكر يا جماعة....ربنا يبارك فيكم:)

اقتباس:

---

المشاركة الأصلية كتبت بواسطة karim_monir

معلش انا مش شايف تمن الطنابير غاللي
ولما بتخرط بتنزل نص مللي عن المقاس الاصلي
وبيفرق في اداء العربية عشان مشوار زيت الباكم وحساس لمة الفرامل لما الكنترول يوني يديها اشارة لما التيل يتاكل
كدة افضل بكتير
العربية برضه لسه ماكملتش 5 سنين

---

علي فكرة...اللمبة كانت بتنور أصلا لما ادوس فرامل جامد:D...و بعد ما غيرنا اكتشفت ان الفرامل اللي كانت في الأول شبة ال127:D

اقتباس:

---

ألف مبروك يا نادر وعقبال الـ 400 ألف
بس قوللي صحيح
هي البطاريات رخصت؟؟
انا كنت سامع أرقام بعد الـ 500 بكتير

---

ربنا يبارك فيك:)
أنا بتاعتي 40 امبير الصغيرة ب 300 جنيه!

و قاللي اللي انا أخدتها منه لل127 من 3 شهور اللي كانت ب 450 باقت ب 360 دلوقتي...و بيقوللي انه خسران حوالي 8000 جنيه في البطاريات المستعملة عشان كانوا بياخدوها غالية و سعرها نزل في يوم و ليلة

الف مبروك نادر باشا علي صيانة ال 40الف
وربنا يباركلك فيها

اقتباس:

---

المشاركة الأصلية كتبت بواسطة onna

مبروووك علييييك البيكانتو العروسة بعد ما اتظبتت :)


نااادر نااااااااادر

شفت السيراتوووووووو ؟؟؟؟؟؟؟؟؟؟؟ ايه رأيك فيها ؟؟؟

---

الله يبارك فيكي يا نهي:)

و طبعا شفت التحفة السيراتو....و عجبتني جدااااا...و الريو كمان داخلة دماغي قوي...ممكن أفكر فيها كمان 4 سنين ولا حاجة:D

الحمد لله على الصيانة يا نادر, ربنا يبارك لك فيها

المركز ده كان مركز معتمد لفولكس زمان و عارف مكانه, كنت اسأل يا عم بدل اما تتوه

الف مبروك يا نادر :)
عقبال ال 4 مليون كده

الف مبروك يا نادر
و عقبال ما تعمل صيانه الs-class

عفارم عليك يا باشاااااا

عملت اللي أنا مكسل أعمله من زمان :(

بس اللي إنت دفعته ده هايل هايل هايل ومش غالي بتاتا. ده غير إنك متطمن تماما إن اللي بيشتغل في عربيتك التوكيل ذات نفسه. وبامانه أنا كان نفسي تاخد منهم البطاريه برده أو على الأقل تسأل على سعرها

أنا عملت أربع صيانات قبل كده وفاضيلي 1000 كم وهاعمل صيانة ال 25000 . أصل انا بحب أروح هناك أتطمن واعمل الصيانه بتاعة العربيه كل 5000 كيلو. وهحاول بقدر الإمكان إن أحكي تاريخ الخمس صيانات في موضوع واحد ( مش زي نهى مواضيع :D:D:p:p)

بأمانه من ساعة لما كريم كان بيحكي على التوكيل ده واللي كان بيتعمله في عربيته وانا كنت حاطط ده من أولوياتي في إختياري للعربيه لأنك في الأول وفي الأخر بتتعامل مع توكيل مش مع عربيه لأنك ببساطه ممكن تكون شاري BMW والتوكيل مطلع عينيك للدرجه اللي يخليك تكره العربيه.

أنا لما قلت إن التوكيل محترم كنت بقولها عن تجربه فعليه وهو بامانه محترم إلى أقصى درجه ممكنه

ده انا لما كنت بتعامل مع التامين ويقولي هانعملك الشغل المطلوب في مكان غير التوكيل كنت برفض بتاتا وبصمم ان العربيه تروح التوكيل اللي في أبو رواش.

أنا لما شفت الأعلان الكبير اللي نزلوه في ملحق السيارات إمبارح فرحت جدا جدا إن ربنا فك زنقتهم وخلصوا من القضيه الشؤم ده. إصبر بس عليهم وإتفرج هما هايعملوا إيه بعد كده

بأمانه وده عن تجربه. ماتخليش حد يتعامل مع عربيتك غير التوكيل وخليك متابع الصيانات الدوريه معاهم. ده أأمنلك وأريحلك بكتيرر

وربنا يوفقك يا باشا

ألف شكر يا محمد بيه:)

علي فكرة البطارية عندهم سعرها 750 جنيه بالضريبة و التركيب...يعني قلة ادب...بس المهندس بنفسة قالنا هاتوها من برة عشان هنا سعرها اوفر قوي

و فعلا بعد كلامكم...اقتنعت ان التوكيل أحسن مكان...و لما بصيت علي الاسعار و قارنتها بعربيات تانية لاقيتها كويسة جدا الحمدلله....هو يمكن بس عشان أنا كنت رايح و عامل حسابي علي 400-500 جنيه بالكتير:)

اقتباس:

---

المشاركة الأصلية كتبت بواسطة NaderNabil

ألف شكر يا محمد بيه:)

علي فكرة البطارية عندهم سعرها 750 جنيه بالضريبة و التركيب...يعني قلة ادب...بس المهندس بنفسة قالنا هاتوها من برة عشان هنا سعرها اوفر قوي

و فعلا بعد كلامكم...اقتنعت ان التوكيل أحسن مكان...و لما بصيت علي الاسعار و قارنتها بعربيات تانية لاقيتها كويسة جدا الحمدلله....هو يمكن بس عشان أنا كنت رايح و عامل حسابي علي 400-500 جنيه بالكتير:)

---

ينهار أبيض .. إنت كده معاك حق في موضوع البطاريه ده .. بس تفتكر إن البطاريه اللي في التوكيل هي ال original بتاع العربيه ( اللي جايه من كوريا ) ولا لأ...

400 أو 500 دول في الصيانات الأولى ذي ال 10000 وال 20000 بس بعد كده لازم تبقى زياده شويتين وخالي بالك برده إنك واخدها used وغيرت الطنابير فشئ طبيعي تدفع المبلغ ده بس صدقني المبلغ ده حلو جدا ومش غالي خالص وكفايه قوي إنك بتدفعه وإنت عارف إن التوكيل ذات نفسه هو اللي بيشتغل في عربيتك مش حد تاني

إحنا بعد كده عايزين نظبط العربيه ده مع بعض .. يعني اللي يلاقي حاجه كويسه يقولها للتاني ونكتبها هنا :)

استاذ نادر ...انا استفدت معلومات كويسة جدا من كلامك عن صيانة ال40000 ، وخصوصا اسعار قطع الغيار ، وده لأن المنتدى هنا سألنا فيه اكثر من مرة عن اسعار قطع الغيار لكن لم نجد معلومات .
ياريت لو عندك معلومات اكثر عن اسعار قطع الغيار للبيكانتو ان تفيدنا بها .
وسؤال كمان : هل البيكانتو معروفة للميكانيكية إللى خارج التوكيل ؟ لزوم الطوارىء والإصلاحات السريعة .
مع خالص الشكر.

شكرا يا أخ نادر
فعلا انا بفكر فى البيكانتو الاتوماتيك ؟ايه رأيك؟
شكرا مرة اخرى:auto:

تشكر يا باشا على الموضوع و الاسعار.