الموضوع: تركيب تكييف للبولو ٩٦ ١٣٠٠ من الالف للياء

المشاركة الأصلية كتبت بواسطة yahiatnt

شكرا جزيلا استاذ احمد "معلومات من الآخر" بس عندى شوية استفسارات كده؛
١- اشمعنا تلاجة يابانى ؟ مينفعش بتاعت البولو استيراد؟
٢- مين ركبلك الحاجات دى كلها؟ مهندس خالد؟
٣- مين بتاع الاستيراد الى جبت منه القطع الاستيراد؟ و العنوان لو امكن.
٤- ايه التظبيطات الى المفروض اعملها فى العربية قبل تركيب التكييف؟ اظبط الايدل بس و لا فى حاجات تانية؟

لاشكر علي واجب
اولا ليه تلاجه ياباني
عشان تبريدها ممتاز والاكسبينشن راكب فيها و حجمها مناسب جدا وبتقبل تتعدل وده يخليها تركب بسهوله في المكان الضيق بتاع البولو
انما لوسمعت ثمن تلاجه البولو هتغير رايك في التكييف اساسا وهيقلك دي سخن وبارد وخدالتكييف كامل بالشئ الفلاني
ثانيا مين اللي ركب الحاجات دي
واحد في المنصوره فني تكييف وعنده كهربائي سيارات شاطر لكن اهم شئ ان الحاجات اللي انت هتجيبها هتكون سلسه جدا في التركيب لان كل اماكنها موجوده في العربيه واهم شئ لازم تركب الريداتير الكبير لانه هيخلي العربيه عمرها ماتسخن وانت مشغل التكييف و هيخلي التكييف تمام
وعلي فكره اي فني تكييف هيعرف انك فاهم هيعملك حساب ومش هيلخبط
وهقلك علي حاجه انا اول حاجه عملتها ركبت الرداتير الكبير والمروحه والكومبروسر والقاعده والسربتينه بعد اختبارها بضغط الهواء للتاكد من عدم وجود تسريب
ثالثا جبت الحاجات منين
جمعتها من اكثر من مكان من عند بتوع الاستيراد في المنصوره وغالبا هتلاقيها في الحرفيين في انصاص البولو عند بتوع الاستيراد او في بورسعيد
رابعا ايه التظبيطات عشان التكييف يركب
اولا تكون المكنه تمام عشان تريحك وتكون الكهرباء مظبوطه ويا ريت تجيب انظف سلوك واحسن كتاوت للوصلات الخاصه بالتكييف كمان هات انظف الاساتيك الخاصه بالخراطيم واشتري بنفسك الفريون وزيت التكييف
الفريون يكون الماني وهومعبا في مصر في عبوات 1كيلو134وده يكفي لشحن التكييف بالكامل و الزيت انجليزى134 برده 1كيلو هيتبقي منه نصفه تقريبا وهاتهم من عند اخوان رزق
انما الترموستات هاتها استيراد احسن عشان الجديد تعبان جدا موجوده عند بتوع الاستيراد
وربنا يوفقك