الموضوع: بس يا احمد السيراتو دي كوري و انا ماركبش كوري

والدتي معاها فيات سيينا 2001.. دايما الناس الكبار ليهم منطق في ركوب العربيات و التسلسل الطبيعي للحاجة الساقعة ههههه (ألماني - امريكي - فرنسي - ايطالي - ياباني - كوري)

و لله الحمد دايما ارائهم ان السيراتو دي عربية خفيفة و لو زودت عن 100 حاتقلب بيا.. و عشان كده هي في اخر "اللستة"

جه طبعا الكلام عن تغيير عربيتها.. لان العربية ابتدت فعلا تتعب .. معدية العشر سنين و لو انها عاملة 60000 بس! و جت طبعا المقارنات و مراجعة الموديلات و الاسعار و الذي منه..

طبعا ستظل البي ام الفئة الثالثة متربعة علي عرش قلبي و قلبها و قلب كل واحد فيكو

و بالتأكيد الباسات و الجيتا و الفيكترا (لسه متخيلة ان في جديد منها ) و كمان السيفيك.. بس طبعا منين و محدش ضامن الزمن ده و اديك شايف..... الخ الخ.. كلام الاهالي ده

نسيت اقولكوا ان زمان قبل ماجيب السيراتو كان كلامها دايما في المعرض كل مانشوفها ان دي عربية كوري و بيئة هههههه و اللون الاحمر مش شيك و خطوطها مش حلوة... و اتغير الحال نسبيا لما جبتها ..اول ما تركب معايا .. شغل قرآن و سمي بالله و ماتركبش صحابك عشان العين و حافظ عليها..

الي اني اتصدمت لما قالتلي من يومين انا بافكر في السيراتو... و قعدت تمدح فيها و انتشارها دليل علي نجاحها و ألوانها التحفة - بالذات النبيتي - و ارتفاعها و شكلها الانسيابي و ماعرفش ايه.. :)))

انا بقي "Yessssssssss.. Yahooooo" :D

ماتقولش حاتجيبهالي انا.. والله و لا انتصار حرب اكتوبر او تنحي المخلوع ...

اي نعم جه كلام في النص حرقلي دمي.. زي انا لسه محتارة بينها و بين الانسر الشكل القديم!! "نفس منطق الفيكترا "... و يا احمد اللوجان برضه حلوة و اوروبي و انا ماركبش كوري... و صدمة اقوي لما قالتلي الـ Brilliance حلوة برضه و لو انها كوري (صيني يا ماما ).. و قالتلي بكل فخر دي بـ 120000 و اكتشفت انها بـ 72000 و اتكلمت عن الفلوانس و قارنتها بالسيراتو و انا قلتلها الفلوانس مش حلوة من جوا .. واسعة اه بس ماتشدنيش.. و اتهمتني بالحقد

كلام كلام.. و انتهي الحال ان احنا حانشوف في الوكيل السيراتو.. بس فئة مش عالية عشان هي مش محتاجة الجنوط و فتحة السقف و اشارات المرايات ههه

و اتصدمت برضه لما قالتلي نجيبها مانيوال ..و انا اللي يادوب كان بقالي 3-4 سنين باسوق مانيوال كنت زهقت منه و من سنينه.. بس في الاخر طمنتها لو علي الفلوس انا حادفعلها فرق الاوتوماتك

انا قلت اعرفكوا بالقصة دي.. عشان ما محبة الا ما بعد عداوة.. و ان شاء الله اسرة السيراتو تزيد فرد :)

عايز اعرف منكو ايه موديلات الوكيل و اسعارهم بعد اذنكو..

باشا أنا من رأيي إنها تجيب الفلوينس ... مش عشان حاجة ... السيراتو عربية ممتازة فعلا ... لكن هي أكيد ركبت معاك عربيتك كتير فلو جابت سيراتو برضه (مع العلم ان بتاعتك أحسن عشان كوبيه) هتزهق عشان مش هتحس بتغيير و هتحس إنها أقل من بتاعتك ده غير إن لو زي منتا بتقول هي مش عايزة فئة عالية يعني من غير إيموبلايزر يعني إحتمال السرقة وارد

ده رأيي الشخصي و ألف مبروك مقدما و في الحالتين هو إختيار موفق إن شاء الله عشان العربيتين أحلى من بعض و لو جبت الفلوينس متنسناش في التقييم ;)