شراء بولو

**ibraam** · 09-05-2011 04:23 PM

تحياتى لكل أعضاء المنتدى الكرام،،،
من فضلكم أنا عايز أشترى عربية على قدى كده و كنت بفكر فى بولو 2001 ممكن تفيدونى برائيكم ويا ترى ايه اللى فى نفس السعر كويس برده ولا أشترى جديد أحسن
بصراحة انا محتار قوى فى الجديد ولا القديم بس طبعاً الجديد مش هيكون بولو انا عاوز حاجة فى رينج 90 او 100 مش اكتر.

شكراً لكم

**أبو_حمزة** · 11-05-2011 11:45 AM

انت قلت امكانياتك بس ما وضحتش احتاجاتك
يعنى ايه اكتر حاجات تهمك فى العربية و نوع سواقتك و هل بتشغل التكييف على طول
مفيش حد ها يختلف ان بولو عربية ممتازة لو حالتها نضيفة لكن عشان الناس تنصحك بالانسب لازم تقول لنا انت عايز ايه من العربية و كنت راكب ايه فبلها و كانت ايه ملاحظاتك عليها لان كل عربية مهما كانت ممتازة ليها مميزات و عيوب

**Ahmed_Rahem** · 11-05-2011 12:29 PM

استفسار، يوجد موديل 2005، الشكل الفوانيس العيون، 1000 سى سى،
الموتور دة يكون ضعيف ولا كويس على العربية، انا مشاويرى كلها او اغلبها على الدائرى والمحور

ولكم الشكر

**أبو_حمزة** · 11-05-2011 10:37 PM

بص انا أول عربية جبتها فى حياتى كانت لادا فعارف كويس انت بتقول ايه
الfrv ما اقدرش افتى فيها لانى ما ركبتهاش خالص بس انا لا اثق فى اى شئ صينى و لا الصينيين نفسهم
و عن نفسى بالسعر افضل اشترى مستعمل له اصل و لا اشترى صينى
بولو بالمقارنة بلادا ها تبقى جنة
الصالون مش ضيق و الدركسيون قمة فى السلاسة و مستوى التكييف مناسب
غير ان العربية قوية و صاجها يستحمل و ربنا يبعد عنها الحوادث
الحاجة الوحيدة اللى ها تتفوق فيها الادا هى مساحة الشنطة و لو متعود تشيل حاجات كتير ها تضايقك
و بما انى مجرب لانسر 99 العربية الاصيلة فمعلش بعد اذن اخوانى هنا ها انصحك بيها
سعرها مقارب لبولو مع صالون اوسع و شنطة كبيرة وموتور انعم و سحبه افضل وقطع غيار اكثر انتشارا والاتوماتيك لو متصان ملوش مشاكل غير ان خا مات الصالون افضل من بولو
بس المهم تلاقيها حالة كويسة
و تحت امرك فى اى سؤال

**ibraam** · 17-05-2011 02:01 PM

متشكر جداً

**Mahmode** · 17-05-2011 02:30 PM

أنا معايا بولو 2000. وهي عربية زي الفل. سلسه وحلوة في الغرز والركن واستهلاك البنزين وشكلها شيك برا وجوه وعضمها قوي وآمنة. العيوب: شنطة ضيقه. تسارع في الضياع بالذات لو في مطلع (بس طبعا ده التسارع مش السرعة. يعني لما تيجي تطلع من حد وانت ماشي وراه بسرعته بتطلع ببطىء أو لو إنت ماشي ورا حد بيسوق بسرعة برضو حتتدايق. بس بالنسبة للسرعة أنا بامشي عالدائري على 120 وثابتة وزي الفل. لكن أكتر من 120 أظن كتير عليها. أنا أعلى سرعة جبتها بيها 140 وهي كانت مش معترضة بس بالنسبة لوزن وحجم العربية أظن أقصى سرعة مريحة عليها 120) وطبعا زائد عيوب المستعمل بصفة عامة. كل شوية حاجة تبوظ.

**ibraam** · 17-05-2011 06:52 PM

شكراً mhdside على ردك بس كنت عاوز اسألك قطع غيارها اسعارها عاملة ايه عموماً (غالية يعنى ولا فى المعقول) ومتوفرة ولا لأ.

**graffittiii** · 18-05-2011 12:35 AM

أعتقد يباشا بما ان حضرتك كنت بتتعامل مع لادا ف اي عربية تانية هتلاقيها انعم واخف وهتحس بفرق كبير(( مع احترامي للادا عربية راجل مش مان ))
حاول تقرب بالموديل علي قد ماتقدر لو مش هتجيب زيرو .. بولو 2001 بعيدة شوية وهتنزل كتير لو فكرت تبيعها بعد سنتين

**M.Mostafa80** · 18-05-2011 01:30 AM

ال 90 او 100 دول يجيبولك بولو 2009 2010 الشيب القديم
وهى موتور 1400 فتيس اوتو 4 سرعات اماميه وواحده خلفيه
صالونها واسع شكلها الخارجى جميل وايضا من الداخل