هوندا أكورد موديلات أواخر ثمانينات - أرجو المساعدة

**Hesham** · 09-05-2011 08:17 PM

السلام عليكم ورحمة الله
أنا يا جماعة كنت محتاج أكبر كم ممكن من المعلومات عن الهوندا أكورد مودلات آخر ثمانينات يعنى من 86 إلى 89 الموديلات الكاملة أوتوماتيك. يا ريت يا جماعة حد يوضح عيوبها ومميزاتها وتوافر قطع الغيار. بالمجمل هل هى اختيار جيد ولا مشاكلها ومشاكل قطع غيارها كتير بالتالى البعد عنها أحسن؟ وبالنسبة للمواتير 2000 سى سى أوتوماتيك يا ترى أخبار استهلاك البنزين إيه؟ كمان يا ريت لو معلومات عن متوسط أسعار الحالات الممتازة منها، الموديلات الكاملة أوتوماتيك طبعا. بالمناسبة أنا بشوف من العربيات دى موديلات بفانوس قلاب وموديلات بفانوس عادى ونفس سنة الصنع تقريبا. هل كان بينزل منها موديلين فعلا وهل بينهم فرق فى الكماليات؟
شاكر لكم حسن تعاونكم وأحييكم على المجهود الممتاز اللى باشوفه فى قسم الهوندا.

**Yones** · 10-05-2011 02:58 AM

هوندا اكورد موديل 86-89 الجيل التالت ونزل بمحركات 1800 سى سى و2000 سى سى فيه منها كربيراتير وفيه منها انجيكشن لل (LXi,SEi)
والفرق مابين الفوانيس العادية والقلابة لموديلات نفس السنة ان الموديل اللى فيه فوانيس عادية دى كانت فى الاصدار الاوروبى واليابانى لكن الموديلات لباقى الدول كانت بفوانيس قلاب
وبالنسبة لكماليات السيارة :
باور ستيرنج-سنتر لوك-زجاج كهربى -تكييف-اوتوماتيك ومانيوال-فتحة سقف فى بعض الموديلات-سخانات كراسى فى بعض الموديلات-مرايات كهربية-ايريال كهربائى ومميزات تانية كتييييييير قوى
العربية محترمة ماشاء الله وان شاء الله تلاقى حالة جيدة لكن السعر بصراحة مش عارف حاليا كام

**Hesham** · 10-05-2011 03:43 AM

أنا شاكر لحضرتك جدا على المعلومات القيمة دى وعلى سرعة الرد. واضح من كلام حضرتك إن العربية محترمة فعلا. حاستأذن حضرتك أو أى حد من السادة الأعضاء يوضح أكتر مسألة توافر قطع الغيار واستهلاك البنزين وطبعا متوسط الأسعار وخصوصا إن العربيات الغير متداولة زى الموديلات دى أسعارها بتختلف بشكل كبير. يعنى يا ريت أهل الخبرة يفيدونى فى موديل 89 مثلا كاملة أوتوماتيك فى أحسن حالاتها ما أدفعش أكتر من كام؟

**SAMEH_FOUAD** · 10-05-2011 07:34 PM

زى طبعا ماقال الاخ يونس كلامة مافيش اختلاف علية

بالنسبة لقطع الغيار قليلة وغالية جدا وخصوصا قطع غيار الاكسسورارت الخارجية زى الفوانيس والكلام دة ولو لقيتها بتبقا غالية عن اى عربية تانية لانها ممكن تيجى بالطلب

استهلاك البنزين داخل البلد بتعمل 160 كم فى الصفيحة وخارج البلد بتعمل 250 سرعة لا تتجاوز ال110 بعد كدة ماتفكرش فى البنزين

سعرها لا يتجاوز بأى حال من الاحوال 48 الف جنية

**No Comment** · 10-05-2011 11:46 PM

طيب لو تسمحلى ارد على السؤال السابق لحد ما سمسم يرد ... انا لما كنت بدور على سيفيك عجبتنى واحدة أكورد جداً لانها كانت بحالة ممتازة وكل كمالياتها شغالة وعدادات ديجتال وشغل عالى مع اساسيات سليمة .
ورغم انها كانت مغرية عن السيفك اللى كنت بدور عليها فى الاساس ... لاكننى لم أخاطر وخفت انى اشتريها لنفس للاسباب اللى ذكرها سمسم فوق .

**Yones** · 11-05-2011 12:19 AM

للاسف فعلا زى ماقال سمسم قطع الغيار غالية وعدم انتشار الموديلات دى اسباب بتخللى العربية مش مطلوبة جامد فى السوق رغم انها ممتازة لكن ده مش عيب فى العربية العيب عيب السوق عندنا فى مصر انه مش بيوفر قطع الغيار بالسعر المناسب يعنى قطع غيارها برة اكيد ارخص بكتير من هنا
كان فيه موضوع قريته فى النت عن قطع غيار الاكورد الجيل التالت :

مساعدين أمامي أو خلفي جداد ياباني 500 - 550 ج (ودول اغلي حاجة في العفشة)
فانوس اكورد خلفي كامل (جديد ) 165 ج
فانوس اكورد 85 - 89 امامي تايواني 65 ج
تيل فرامل امامي (الياباني 120 - 130 ج و الفيتنامي 70 - 80 ج
طقم اويل سيلات و جوانات للموتور كاملة ( 130 - 150 ج للطقم ) صناعة تايواني و الياباني في حدود (200 - 250 ج)
بلي عجل ( 230 - 240 ج للطقم الامامي او الخلفي)
ماسورة مياه تيواني جديدة ( 60 - 70 ج ) و بتاعت الهيونداي اكسيل بـ 110 ج
طقم بوجيهات بوش أو ان جي كي ياباني ( 50 - 60 ج )
طقم صباب موتور (200 ج)
طقم الشنبر ( 150 ج )
طلمبة مياه جديدة ياباني ( 115 ج ) زي بتاعت الـ 127
مراية باب استيراد (كهرباء) 150 ج
كبوت استيراد (400 - 500 ج )
تابلوه استيراد بالعدادات و الضفيرة (600 ج ) " بتاع الاونو 1000 ج "
العدادات العادية لوحدها كمجموعة ( 300 - 350 ج)

**SAMEH_FOUAD** · 11-05-2011 03:07 AM

المشاركة الأصلية كتبت بواسطة hesham

سمسم باشا أنا شاكر لحضرتك جدا وحاتقل علي حضرتك فى كامسؤال كمان. يا ترى فى ظل ندرة قطع الغيار هل تنصح بشكل مباشر بالابتعاد عن الموديلات دى لأن مشاكلها حاتكون لا حصر لها وممكن العربية تقف فترة طويلة بسبب عدم توافر قطعة غيار ولا لازلت ممكن تحبذها وتشجع على شرائها؟ السؤال الثانى، يا ترى السيفيك موديلات 89 و 90 فيها نفس المشاكل دى ولا افضل حالا؟ ولو بتختار بين الأكورد 89 والسيفيك 89 تختار إيه؟

ان شاء الله مافيش ركنة للعربية او حاجة والا كانت الناس اللى معاها العربيات دية باعتها من زمان

المشكلة كلها ان قطع الغيار قليلة وممكن تحلها بتسقيط مكنة تانية خالص قطع غيارها موجودة وبوفرة

بالنسبة للعفشة فالمشكلة كلها انها مش موجودة جديد غير قليل وبتبقى غالية

بالنسبة للاكسسورات الخارجية دية بردة قليلة جدا ولما بتلاقيها استيراد ممكن تاخد معاها اجزاء انت مش محتاجها بس التاجر بيفرض عليك دة وطبعا االسعر بيزيد اضعاف وانت مضطر تشترى

ماتقارنش العربية دية بالسيفيك 89 خالص لان دية ركوبة ودية ركوبة وطبيعى الاكورد احسن من السيفيك سواء فى التقفيل او الرحابة والراحة

بالنسبة لسيفيك 89 , 90 , 91 فطبعا حاجاتها متوافرة عنها بكتير وكمان جميع اجزاء ماتورها موجودة بس المشكلة بقى السيفيك الموديل دة انك بتبقى فية قطع غيار لية قليلة سواء جديد او استيراد ولو لقيتها بتبقى تمنها تقرييا نفس تمن السيفيك الجيل الخامس والسادس

وبالنسبة للاكورد طبعا افضلها مع شرط الحالة لازم تكون نظيفة جدا وخلى بالك استهلاك البنزين عالى عن السيفيك ودة طبعا عشان ماتورها 2000 سى سى كربراتير

ولو بختار بينهم يبقى الاكورد طبعا واغير الماتور واركب واحد f20a وعلى فكرة يستحسن انك تجيب الشكل بتاع الجيل الرابع مش الجيل الثالث اللى الفوانيس الامامية بتاعتة متحركة لان دية لو باظت هتكلفك كتير