الموضوع: إزاي أوصل من بنها للحرفيين (بالتفصيل)

طب جاى دائرى و لا زراعى . حدد المكان علشان اوصفلك نقطة او بداية الانطلاق من القاهرة

زراعي بإذن الله

حلو حا تنزل من الزراعى لحد ما توصل عند ميدان السواح تمام دة عارفة و لا لآ الى عند قصر القبة .
لو وصلت قصر القبة حا تمل و تلاقى كوبرى صغير بيعدى من فوق سور مترو الانفاق دة أسمة كوبرى الطاهرة تعدى من فوق الكوبرى حا تنزل حا تلاقى قصر الطاهرة على أيدك الشمال كمل و عدى ميدان قصر الطاهرة و مستشفى الجنزورى شمالك كمل طوالى حا تلاقى تقاطع بالعرض شارع أسمة جسر السويس معروف جدا جدا انزل شمال فى شارع جسر السويس و طوالى لا شمال و لا يمين بس كتير شويتين حا تعدى منطقة اسمها الالف مسكن انت برضو طوالى و بعدين تفضل طوالى لغاية ما تلاقى كوبرى بالعرض دة مدخل الحرفين لف شمال من تحت الكوبرى و أدخل أول يمين دة مدخل مدينة الحرفين و أدخل يمين برضو حا تلاقى محل التوحيد و النور على أيدك الشمال أخر الشارع أنزل شمال و طوالى لغابة ما تلاقى الورش فية ورشة اسمها حسن دبوس أسأل و أنت هناك حا يقولك محل بسام فين هو ساعتها حا تدخل شمال على فكرة لان الحرفين مفيش حاجة يمينك لغاية حسن دبوس شمال و حا يبقى بسام على أيدك اليمين

يا خبر ابيض هو بصراحة أنا لازم أدعيلك على اللي كاتبه ده
بس ده محتاج معجزة علشان أخد بالي من كل ده
مفيش حاجة من الدائري يعني وأنا جاي من الزراعي أطلع الدائري وأروح هناك إزاي؟
لأني كنت سمعت إن الطريق لها من هناك
أنا مش عايز أدخل جوة القاهرة لأني مليون في المية هتوه هناك لأني معرفش الطرق داخل القاهرة
فعايز حاجة من برة
هو في واحد قالي من طريق المطار من الدائري

(وجزاك الله كل الخير يا غالي)

معلش كنت برة علشان كدة ما ردتش .
بص لو جاى دائرى القصة سهلة جدا جدا
انت نزلت من الدائرى و مكتوب على ايدك اليمين مطار القاهرة كمل طوالى على طول كانك داخل القاهرة من طريق السويس حلو حا تلاقى كوبرى أسمة كوبرى الجيش عند مستشفى الكهرباء و خلى بالك بعد منزل الكوبرى فية مطب
كمل طوالى حا تلاقى كوبرى بالعرض أدخل من تحتة يمين و كمل طوالى لغاية الاخر حا تلاقى فى اخر الطريق بنزينة كالتكس ادخل يمين و اول شارع دة طريق المطار ملكش دعوة بية كمل طوالى غصب عنك حا تلاقى الطريق بيدخل يمين ادخل يمين دة اجبارى مفيش غير كدة دة شارع الى فية ملاهى السندباد حا تبقى على أيدك الشمال أنت كمل طوالى لنهاية الطريق حا تلاقى كوبرى ما تطلعش الكوبرى دة لانة يدخلك على طريق الاسماعيلية من تحت الكوبرى شمال حا تعدى شريط قطار كدة و بعد كدة خليك شمال شوية أول فتحة لف شمال فى أول يمين حا تلاقى مدخل الحرفين و التوحيد و النور على أيدك الشمال أخر الشارع انزل شمال دة مدخل الحرفين و بينك و بين بسام 3 دقائق بالعربية بالظبط

المشاركة الأصلية كتبت بواسطة felix

طب اوصف بطريقة اسهل شوية
من الدائري خليك ماشي عليه لحد ماتوصل لنفق السلام اوعى طبعا تنزل النفق وانزل من جمبه النزلة بتاعت الاتجاه اللي رايح القاهرة
امشي بتاع 2 كيلو كدة هتلاقي كوبري ده كوبري الحرفيين متطلعوش
اهم حاجة هتلاقي فتحة يمين بعد مطلع الكوبري علطول
ادخل يمين وكدة اهلا بيك في مدينة الحرفيين

هو طبعا نزلة السلام أقرب شوية بس أنا وصفتلة من النقطة الى هو عارفها بس بالتفصيل شوية
السلام أقرب طبعا للحرفين بس زحمة شوية

والله أنا مش عارف أشكركم إزاي
جزاكم الله كل الخير
مشكوووووور جدا جدا
بارك الله لكم