قدر الله و ما شاء فعل... الحمد لله (كنت و سأظل احترم السيراتو)
الحمد لله رب العالمين على كل شئ... و قدر الله و ما شاء فعل
اختي عملت حادثه بالسيراتو (2005), و الحمد لله هي بخير بخلاف بعض
الكدمات في الذراع و الكتف الشمال و الفك... الحمد لله
الحادث كان في شارع الهرم, قصاد رويال سنتر في حدود الساعه 9:30 مساء تقريباً
كانت ماشيه في الحاره اللي في النص, و قصادها اتوبيس سياحي كبير, و حسب
كلام الناس ان الاتوبيس اضطر يفرمل فجأه لان الميكروباص اللي قدامه وقف فجأه بردو
و في نص الشارع, و هي كانت ماشيه وراه بمسافه و لما وقف فجأه حاولت تفرمل
و تفاديه في الحاره الشمال, لكن العربيه زحفت منها و معرفتش تفاديه و نزلت تحت
الاتوبيس من ورا... و طبعاً الخسائر في العربيه كبيره, و هو ماعندوش غير كسر
بسيط في الاكصدام الخلفي من تحت ناحية الشمال بسبب نزول العربيه تحت الاكصدام...
العربيه زحفت و الفرامل ما اسعفتهاش لان والدي للأسف غير التيل بدون ما يقوللي
و جاب تيل غريب من شخص اغرب على انه اصلي, و التيل كان مش اصلي
و انا قلتله لما سمعت صوت التيل مع الطنابير انه مش اصلي, و كان التيل بيصفر
بعد التركيب و لحد ما حصلت الحادثه, يعني اكتر من شهر و نص, و انا اكتشفت
الموضوع ده بالصدفه من 3 اسابيع لاني مش بركب العربيه دي خالص... الحمد لله
ليه انا بقول كنت و مازلت و سأظل احترم السيراتو... لان لو عربيه تانيه اقسم بالله
كانت جابت نص امامي كاااااااااااامل بالقوايم و التابلوه و الموتور و كل حاجه, ده غير
الاضرار و الاصابات اللي كانت ممكن تحصل للسائق او الراكب الامامي من اثر الحادث...
الغريب بقى... ان الاير باج ما فتحتش خالص..!!! مع ان ده كان من كرم ربنا علينا,
لان الايرباج لو فتحت, كان زمان العربيه دخلت في مواااال كبير جداااا احنا في غنى عنه...
يعني انا عاتب على ان الايرباج مافتحتش, بس بحمد ربنا انها مافتحتش بردو... سبحان الله
الخســائر... كابوت, اكصدام (سليم نسبياً), و رفرف يمين, و الصدر بالريدياتير,
طلمبة المياه و الزيت, فانوس يمين, شبكه, الفوج لايت اليمين, قواعد الموتور,
و بنشوف حالة الموتور ايه لانه اتكسر من فوق بشكل غريب شويه و يقلق...
في النهاية بقول و مع كل اللي حصل في العربيه الحمد لله و اني هفضل بحترم
السيراتو و كيا لانهم فعلاً يستحقوا الاحترام و حتى لو ربنا كرمني في يوم و امتلكت
عربيه الماني او اوروبي عموماً, عمر احترامي للعربيه دي ما هيقل اطلاقاًَ...
اسيبكم مع الصور...
http://i586.photobucket.com/albums/s...1052011209.jpg
http://i586.photobucket.com/albums/s...1052011210.jpg
http://i586.photobucket.com/albums/s...1052011211.jpg