السلام عليكم ورحمه الله وبركاته ..
على الرغم من ان فيات سيينا موجوده فى الشارع زى الرز .. وعلى الرغم من ان كتير مننا موجودين فى المنتدى ... انما انا لاحظت ان تواجدنا مش بالقدر الكافى .. فأنا حبيبت افتح الموضوع ده يكون مرجع لينا كلنا سواء فى مميزات او عيوب العربيه ... أسعار قطع الغيار ... احسن اماكن نشترى منها قطع الغيار .. واى حاجه ممكن نتشارك فيها هنا .

انا عربيتى فيات سيينا Hlx 1600 موديل 2000 سماوى ... 67000 كم

اشترتها عامله 59000 كم .. واستعمالها كان راقى جدا الى اقصى درجه وانا بحافظ عليها جدا الحمد لله ..

أول ما جبتها عملت صيانه ال 40000 كامله احتياطى

حاليا عندى عيبين فى العربيه اولا : الساعه نورها طفى .. ومش عايز اصلحه عشان ميجيش حد يخربش فى التبلوه ويعيب العربيه فسايبها كده مع انه مدايقنى جدا

العيب الثانى انه المرايه بتاعه السواق الرقبه الحديد اللى جوه المرايه اللى بتخلينى اعرف اقفلها وافتحها مكسوره .. مع ان المرايه كلها سليمه من جوه ومن بره .. دا غير انها كهربا فطبعا مش هغيرها عشان كده فلزقتها وأمرى لله

بالمناسبه ... العربيتين بتوعى اللى قبل دى كانوا فيات سيينا برضه (أصلى بعزها قوى) الاولى كانت 1400 فضى موديل 2003 من الزيرو وحتى 165000 كم و التانيه كانت 1600 Hl فضى برضه ودى كنت شاريها مستعمله وقعدت معايا شهر واحد بس لانى اول ما شفت عربيتى الحاليه فى الشارع مكتوب عليها للبيع كبرت فى دماغى اشتريها

مميزات العربيه : موتور 1600cc 104 Hp 2 كامه .. أكثر من رائع بالنسبه للسحب .. معمر خصوصا لو حافظت عليه .. كعاده المواتير ال 2 كامه هيحصلك حاله انبهار لو بصيت على عداد السرعه وانت بتشد بيها فى السرعات العاليه ... عيبه انه صعب شويه فى الصيانه (الصيانه الغير اعتياديه) لانه بيحتاج فك وتركيب كتير

الفتيس 5 سرعات ... ممتاز جدا ماعدا عيب واحد وهو ان النقله الاولى قصيره جدا ... فده بيكون نتيجته انك بتضطر تنقل الغيار كتير جدا فى السرعات البطيئه

طبعا فى حاجات كتير تتحكى عن العربيه دى لكن انا هحاول اتفادى النقط اللى اخواتى فى المنتدى اتكلموا عليها قبل كده ..

الموتور ال 1600 طالع عليه اشاعه انه مبيسحملش وان الحساسات بتبوظ وحاجات كده وانا فى الموضوع ده احب اوضح الاتى:
- محدش ان شاء الله هيواجه مشاكل فى الحساسات خصوصا حساس الهواء طالما بتاخد بالك من تغيير فلتر الهواء بانتظام .. حاول تتابع وصله الهواء اللى مابين عمه الهواء والحساسات .. لو فيها او فى عمه الهواء نفسها اى قطع غيرها فورا لان ده ممكن يتسبب فى تلف حساس الهواء

ان شاء الله نكمل كلنا على الموضوع ده عشان يبقى مرجع لينا كلنا

و أقوم اتغدى انا بقى عشان لسه جاى من الشغل