الموضوع: نيو اكسنت و اوبل كورسا سيدان

تغور الأوبل ولو دهب كفاية أنها من منصور

أنا كنت عامل تقرير سريع كده عليها فى موضوع سابق أهه

المشاركة الأصلية كتبت بواسطة kareemz

العربية ممتازه ما شاء الله .. أولا شكل شبابى و الكبود عالى و صاجها تقيل .. أنا كان معايا سوزوكى سويفت كان أى حاجه تريح عليه الصاج يتطبق .. بجد الكورسا فرق شاسع .. كذا مره أتحك أجيب قطنه و ميه وترجع زى الأول .. يعنى الصاج مبيدخلش لجوه.

الموتور : السحب ممتاز جدا و موتورها ناعم و صوته قوى لما تقرص عليه .. و معمر و قطع غيارة كلها متوفرة و سعرها مناسب.

الاستهلاك: عادى بالنسبه لعربيه 1600 سى سى .. يعنى متوسط 200 كم/الصفيحه جوه البلد.

الكماليات: جميع الكماليات .. تكييف .. سنترلوك .. باور ستييرنج .. 4 زجاج كهرباء .. 4 وحدات رفع .. مرايات كهربا .. 2 مفتاح ريموت ايمبوليزر.

مساحات التخزين: ممتازة جدا .. أربع حامل أكواب .. باكيتات فى الابواب .. درج التابلوه واسع جدا و مضاء .. مساحات تحت الكاسيت و فى التابلوة.

الثبات: ممتاز .. جبت بيها 160 بس للأسف . بس واحد صاحبى جاب 210 و بيقولى كانت كويسة.

العفشه: ناشفه الى حد ما .. يمكن عشان يخلوا العربية ثابته .. و يمكن عشان العربيه كنزة شوية .. ويمكن عشان الكاوتش عندى ماكسس (ناشف شوية).

التكييف: ممتاز جدا .. ميفرقش حاجه عن الكورى سواء فى البروده أو فى سرعة الوصول لدرجة البرودة .. و لا يؤثر على سحب العربية.

أسعار قطع الغيار: كلها عاديه .. الفوانيس أسعارها بتدور حوالين 200 جنيه .. سير الكاتينه 60 جنيه .. سير الدينامو 90 جنيه .. بلية الكاتينة 220 جنيه .. الغالى فيها اسطوانة الدبرياج و الديسك ب 900 جنيه .. و البلية ب 850 جنيه تقريبا .. الرادياتير 700 جنية .. وش سلندر 2000 جنية .. طنابير 400 جنية .. تيل فرامل 170 جنية .. فى موضوع عن أسعار قطع الغيار لو تحب تراجعه.

مميزات أخرى: السنتر بيقفل عند سرعة 30 كم .. النور بيطفى بعد نص ساعة لو سيبتة منور .. مرايات فى الشماسات .. زجاج الابواب بيفتح 5 سم لما تفتح الباب .. فتح الشنطة و تنك البنزين كهربا .. التحكم فى ارتفاع كرسى السائق .. لمبات مفاتيح زجاج الابواب مضيئة.

العيوب: بتحتاج تغير اسطوانة و ديسك على فترات أقرب من العربيات التانيه .. يعنى حوالى 50 ألف كيلومتر .. و بيختلف حسب طريقة سواقتك .. أنا عربيتى داخلة على 80 ألف كيلو و لسه متغيرتش .. بس لما بقف واطلع كتير بحس انها بترج معايا شوية .. الكنترول باظت مع واحد صاحبى و جاب واحدة استيراد.

مفيهاش لمبة تحذير لحزام الامان ولا لفتح الابواب أثناء القيادة ولا صوت انذار .. ممكن تشغل كمبروسر التكييف من غير ما تشغل المراوح (ممكن يعمل مشكلة لو سايب الكمبروسر شغال و مش واخد بالك).

البوهيه بتاعتها وحشة جدا لما تتساب فى الشمس .. واحد صاحبى معاه عربية كحلى زى عربيتى و مع انها أحدث الا انها جربانة جدا .. أنا دايما بغطى عربيتى لما أركنها فى الشمس عشان المشكلة دى .. و المشكلة دى موجودة فى معظم الأوبل.

العربيه كتقييم عام .. أنا شايفها أحسن العربيات فى سعرها .. أنا قبل ما أجيبها كنت بفكر فى لانوس أو هيونداى .. انما دلوقتى بجد صعب جدا ان انا انزل منها على حاجه من دول (مع احترامى لهم).

اتمنى اكون افدتك و ربنا يوفقك لما فيه الخير.

بص يا سيدى الاوبل عربية ممتازة لايوجد عيليها اخحتلااااف ثبات وقوة ومتانة يعيبها ارتفاع اسعار قطع غيارها وتوكيلها منصور وسعر اعادة البيع مش مضمون اووى ونادرا لما تلاقى حاجة نضيفة
النيو اكسنت عربية كويسة وقطع غيارها اقل من الاوبل سعر اعادة البيع معقوول وثبات

المشاركة الأصلية كتبت بواسطة waw2x

تقرير جامد بجد انت كدة فتحت نفسي على الكورسا
وشكر ليك جدااا

العفو يا باشا .. نسيت أقول لك كمان ان فيها شاشة فى التابلوة فيها التاريخ و الوقت و درجة الحرارة الخارجية .. و كمان فى خاصية فى السنتر انك لما تدوس على مفتاح القفل مرتين الباب ميتفتحش من المسوجر من جوة (مفيدة جدا للأطفال)ز

المشاركة الأصلية كتبت بواسطة kareemz

. و كمان فى خاصية فى السنتر انك لما تدوس على مفتاح القفل مرتين الباب ميتفتحش من المسوجر من جوة (مفيدة جدا للأطفال)ز

سبحان الله
أشكرك اخي الكريم على هذه الإضافه انا العربيه شاريها من الزيرم معايا من شهر 8 سنة 2006 وماعرفشي الخاصيه دي!