السلام عليكم
استلمت الحتة الجين 2 النبيتى يوم السبت الموافق19-4-2008و هاحكيلكم بقى هى عاملة ايه كل ما يبقى فى جديد و ده للافادة
العربية عاملة 30 كم المهم استلمتها و انا موش راضى عن نظافة الاستلام بس الاستعجال بقى علشان الحق المرور
حطيت بنزين و للاسف كان 92 علشان الـ 95 خلصان مع انى كنت حابب انى اشممها بنزين نظيف اول مرة اركبها بس نصيبها كده

قالولى فى التوكيل العربية متلينة و كله تمام و عيش حياتك بس انا موش حابب انى اضغط عليها فاخدتها واحدة واحدة على المحور و كان زحمة حبتين فكان لازم اشغل التكييف شوية ( ثلاجة بمعنى الكلمة )

العربية من اول ماتحركت بيها حسيت انها ماشاء الله ثابتة على الارض الاداء الرياضى واضح عليها تماما حركتها ثابتة و كنترول العربية جميل جدا تحس ان الصاج المحمل فيها باين اوى و انت بتسوق و العربية طوعك تماما تعمل اللى انت عايزه و الموتور حدث و لا حرج انا طبعا ماقرصتش خالص بس باين عليه انه موش هايرفض اى حاجة تقوله عليها طبعا الفرامل موش هاتكلم ولا نص كلمة ( حكاية تانية )

الصالون جميل اوى و واسع بس طبعا اللى قاعد وراء الله يكون فى عونه موضوع الفرش الغامق ده و لون التابلوه كمان اعتقد انه كده بقى عملى اكتر علشان الاتساخ و الاتربة ( ماتنسوش اننا بلد صحراوى و كله تراب ) العزل للسيارة ممتاز مشغل التكييف و باسمع قران و موش سامع اى صوت بره الا حاجات بسيطة جدا من وجهة نظرى الصالون و عزله ممتاز
طبعا لما سوقتها باليل اضاءة التابلوه ساحرة بمعنى الكلمة و تحسسك انك راكب عربية فخمة و الطابع الرياضى ظاهر فى تصميم التابلوه جدا
الاضاءة الخارجية للعربية سواء المصابيح الخلفية او الامامية حكاية خاصة فوانيش الشبورة

طبعا زيى ماقييمت العربية فى الاول و من قبل ماركبها الخامات المستخدمة فى صناعة السيارة رخيصة و على مستوى متوسط
- الطبة اللى بتركب على الاكصدام الامامى و بتغطى المكان اللى بتتشد منه العربية عقبال مروحت البيت و باحط الغطاء عليها مالقيتهوش
- عصاية الفتيس ( اوتوماتيك ) قشرت من اول يوم نتيجة الاحتكاك باجزاء اخرى فى الفتيس
استهلاك البنزين كتير جدا حتى لو موش مشغل التكييف بس اللى اعرفه انه موش هايتحكم عليها دلوقتى انا تقريبا عامل 117 كم من اول امبارح

تحياتى لكل الاعضاء المحترمين الموجودين فى قسم بروتون