يعنى ايه اشتغل عشان البلد تمشى ياريت حد من اللى بيقول الجمله دى يفهمنى معناها
اشتغل عشان البلد تمشى
ملكش دعوه بالاخبار والاشاعات وسيب الحكومه تشتغل واشتغل انت كمان
سيب الجيش يشتغل واشتغل انت
طيب عاوز افهم حاجه صغيره هو فيه شغل واحنا اللى مش عاوزين نشتغل مثلا
ولا هى الناس واخده اجازه من اشغالها وقاعده تتفرج على التلفزيون ومتابعه الاخبار
ولا الناس والشباب قاعد على القهاوى ومستنى المليارات اللى حترجع وبيحسب حياخد كام (للعلم بس القهاوى مبقتش شغاله خااااالص وبتشتكى من قله الشغل هيا كمان )
انا مش فاهم بصراحه اللى بيقول كده بيقول ليه ياريت حد فهمنى منا قاعد اهو والحال واقف ومفيش شغل ولا نيله حنجيب الشغل منين يعنى عشان نشتغل عشان حال البلد يمشى
اظن ان عشان البلد تمشى لازم نقف ونشوف ايه اللى موقفها اصلا
ايه السبب ان حال البلد واقف ومفيش شغل واهو ولا فيه مظاهرات فئويه ولا مليونيه ولا زفت
ياريت نفهم مين المستفيد ان حال البلد يقف ويلعنو الثوره ويقولو يوم من ايامك يا مبارك
ياريت نفهم مين اللى متعمد وقف حال الناس وحاله الفوضى وغياب الامن والامان فى البلد عن عمد
ياريت نفهم مين اللى عاوز يقعد الناس فى بيوتهم من بعد العشا
ياريت نفهم مين اللى عمال يصنع ازمات ويحط الشعب فيها عشان يكره ابو اليوم اللى تمرد فيه وقال لا
والله ياريت نفهم زى مكنا فاهمين من فتره وكان هدفنا واحد دلوقتى خلاص نجحو اننا نتفرق
يلا اشتغل بقى عشان البلد تمشى للخلف وتسيبهم هما يخططو
والله وعرفو يضحكو علينا