زمايل حضرتك ......... حد بيدخل عليهم وبيضربهم ؟
هو حد من زمايل حضرتك بينضرب لما بيحصل تقصير او يبان ان هو مقصر وهو مش مقصر ........... ياريت الرد بس ؟
طبعا حضرتك عندك حق فى كل اللى بتقوله
بس فى حالة واحدة بس اننا نكون قطعنا الخدمة الصحية تماما عن المرضى
و ده محصلش و مش ممكن يحصل الاضراب كان جزئى و ليس كلى ولا يشمل الا الحالات الباردة التى من الممكن ان تنتظر دون حدوث اى مشاكل او مضاعفات
اللى حصل ان احنا استخدمنا الاضراب كوسيلة لايصال صوتنا للحكومة و الرأى العام بعدما فشلت كل مساعينا لفترات طويلة و لم نجد وسيلة سوى الاضراب
و الدليل على صحة كلامى ان عمركم مسمعتوا عن الاطباء و مشاكلهم بالقوة دى الا بعد نجاح الاضراب
للملخلص الاضراب وسيلة لا غاية و من رابع المستحيلات بل من اخر المستحيلات ان انا او حد من زمايلى الشرفاء ممكن نضر مريض او اشوف مريض محتاج مساعدة و مقدمهلوش
فى الاول و الاخر ربنا هيحاسبنى لو قصرت فى حق مريض
جميل جدا
يعنى الحديث عن اضراب جزئى
هل يصلح أن تقوم الفئات السابق ذكرها ( مهندسين و عمال محطات المياه و الكهرباء و التليفونات ) بعمل اضراب جزئى
بمعنى تنقطع المياه لمدة 6 أو 8 ساعات يوميا
و الكهرباء و التليفونات و وسائل النقل كذلك
و ذلك حتى يتم تطهير المواقع من الفساد و تغيير القيادات و ضبط الأجور
هل تتحمل مصر ذلك
هل نتحمل نحن المصريون ذلك
الشعب كله لديه مطالب نتيجة سنوات طوال من الظلم و الفساد
لكن هذا الوقت ليس وقت المطالبات
هذا هو وقت العطاء و بلا مقابل فى بعض الأحيان
أمامنا شهور - و لا أقول سنوات - صعبه قادمه
و يجب علينا اذا اردنا ان نجنى ثمار هذه الثوره أن نصبر و نتناسى انفسنا قليلا .... و لا اقول ننسى بل نتناسى
بعدها يكون لكل حادث حديث
اقسم بالله انا كنت بدافع عن البلد . بس بعد ماشتغلت في مستشفيات وزارة الصحه وشفت قد ايه ان فيه ناس في البلد مش عايشه عيشة الحيوانات .. وممكن ابنه يموت قدامه علشان معهوش فلوس يعالجوا او المستشفي مفيهاش علاج ليه.كرهت البلد باللي فيها ..واللهي فيه دكاتره من الغلب اللي باين عليهم ممكن تحط ايديك في جيبك وتديله اللي فيه النصيب
محدش هيحس بالمعاناه اللي في مستشفيات وزارة الصحه غير الاطباء والفقراء...
بص يا سيدى الفاضل مبدئيا مينفعش تقارن الصحة بكل دول لعدة اسباب
اولاان اى حاجة ممكن الناس تصبر عليها الا الصحة
بمعنى ممكن نستحمل الكهربا او المية تقطع يوم ولا اتنين لكن المريض اللى فى حالة طارئة مينفعش يستنى دقيقة و دى اللى مجربها عارفها كويس ....... للاسف الصحة موقعها حساس جدا
زى مقولت قبل كده ان المطالب دى لا تعطل عجلة الانتاج
لو الشعب موافق عل خصخصة الصحة و ان السرقة تفضل ماشية زى مهيا فى وزارة الصحة خلى الوزير قاعد
لو الشعب هيستحمل ان الميزانية بتاعة الصحة تفضل زى ماهية و ان الناس الغلابة تفضل تموت كل يوم- الاعمار بيد الله - بسبب عدم و جود امكانيات للعلاج يبقا خلوا الصحة زى مهيا
لو ترضى ان الدكاترة يتم الاعتداء عليهم و ممكن توصل حالة الانفلات الامنى فى المستشفيات للقتل او اغتصاب طبيبة او ممرضة ..... يبقى خليها تولع - على فكرة غير التهديد بالسلاح و الضرب و الشتايم تم اختطاف طبيب من الاستقبال باحد المستشفيات و الشرطة والجيش لم يتحرك لهم ساكن -
بخصوص الاجور احنا مطلبناش لنفسنا بس احنا قولنا هيكل عادل للاجور
وعلى فكرة انا بشتغل طبيب بالصحة بقالى تلات سنين و مرتبى الاجمالى بعد علاوة ايريل 288 جنيه فى الشهر
لو فيه موظف فى الدولة مؤهل زى وبياخد اقل منى يا ريت تقولى لانى مش لاقى
وليه البلد جاية على الغلابة اللى زينا و مش بتقلل من مرتبات بقيت الجهات .... ولا نظرية التقشف دى علينا احنا بس
اخر حاجة ممكن تقولى ازاى اقدر اعيش ب 288 جنيه فى الشهر لو انت شايف انى اقدر استنى
عفوا
كل الفئات فى مصر حاليا لها مطالب وكللها مشروعه وكللها ثوريه
اذن من حق كل واحد يعمل اضراب وبلاها دوله بئى
معلش انا عندى اعتراض واحد بس على طلبات حضراتكم المشروعه
الى هو طلب رفع ميزانية وزارة الصحه الى 15% من الموازنه العامه القادمه ( الى هى بعد شهر و10 ايام من النهارده )
سؤال واحد بس هى فين الموازنه الى حضراتكم عاوزين نصيبكم منها وبناء على ايه حضراتكم حددتم النسبه دى ؟
ولما وزارة الصحه عاوزه لوحدها 15% فين نصيب وزارة التعليم نصيب البحث العلمى وفين نصيب البنيه الاساسيه واهم حاجه نسبة الدعم الى الحكومه بتتحمله
حد قرا او عرف الموازنه الجايه هتتحط ازاى وبناء على ايه ؟ اتحدى اذا كان حد عمل كده
هشرح لحضرتك
1- ميزانية الصحة دى مبتدخلش جيب الدكاترة فى صورة مرتبات ........ دى بتروح فى اقامة مستشفيات و وحدات صحية و شراء اجهزة للتشخيص و العلاج و شراء مستلزمات طبية و ادوية و ما الى ذلك .
2- احنا قولنا نسبة مش رقم معين ...... بمعنى لو الموازنة فيها ميت مليار الصحة تاخد 15 مليار , لو الموازنة فيها ميت جنيه الصحة تاخد 15 جنيه ...... المحصلة ان ده ماشى مع سياسة التقشف اللى البلد داخلة عليها.
3- احنا مقعدناش مع بعض و ضربنا رفم 15% ده اعتباطا ...... لأ ........ ميزانية الصحة فى الدول الفقيرة جدا زى اثيوبيا و جيبوتى 10% و تصل فى الدول المتقدمة الى 22-25 % ...... يعنى الرقم محطوط كمتوسط...... بينما ميزانية الصحة الحالية 3.5 % و جزء كبير منها مسروق من السيد الوزير المبجل و مستشاريه و مساعديه .
4- مصر موقعة على اتفاقيات دولية سنة 2000 تلزمها بزيادة الانفاق الحكومى على الصحة الى 10-15 %و لم ينفذ فى عهد المخلوع مبارك.
5- الميزانية الحالية مسببة عجز شديد جدا فى الخدمة الصحية ....... بمعنى ان الصحة مفهاش فلوس لعلاج كل المصريين ببلاش و الدليل لو خطفت رجلك لاى مستشفى حكومى ممكن متلاقيش فيها حتى القطن ...... مثال تانى ان لما كنت شغال فى استقبال مستشفى مركزى مكنتش بلاقى جونتى طبى عشان البسه فى ايدى لما اكشف على المريض .... و ده بيؤدى ان يتنقلى عدوى من المرضى و انا نفسى انقل العدوى بين المرضى و بعضها ........ مثال تالت .... مصر فيها 10 مليون مريض كبد فى مصر و السبب الاكبر عدم وجود امكانيات تعقيم جيدة للالات المستخدمة بالعمليات و خلافه بالمستشفيات عشان مفيش فلوس فى الميزانية مما يؤدى الى نقل فيروس كبدى c و b بين المرضى و بعضهم البعض ........ و حاجات تانية كتير مش هتكفى عشرين صفحة لو اعدت اكتب فيها
6- الموازنة تستحمل الزيادة دى ..... فى 1000 موظف فى الدولة مرتبتهم فوق المليون جنيه فى الشهر ده غير موظفين البترول و قطاعات كتيرة مرتباتهم ممكن تعمل ميزانية مصر 5 مرات ...... فلو كل اللى انا قولتهم دول اخدوا مرتبات عادلة و السرقة وقفت المصريين الغلابة هيلاقوا احسن علاج و ببلاش.
7-حضرتك قولت ان الموازنة هتتحط بعد شهر و عشر ايام فهل ده وقت مناسب لطلب الزيادة ..... ارد و اقولك ده انسب و قت لان لو قولنا الكلام ده بعد مالموازنة تتعمل ... هيقولولنا استنوا للسنة الجاية مع الموازنة الجديدة و معدقدتش مرضى مصر الغلابة ممكن يستنوا سنة عشان يلاقوا علاج
على فكرة مش هيحس باللى بقوله ده غير طبيب فى وزارة الصحة او شخص راح بمريض سواء والده او غيره و المريض مات نتيجة لعدم وجود امكانيات فى المستشفى