ارجو المساعدة فى شراء سيارة

**Marwa_2011** · 19-05-2011 10:39 PM

السلام عليكم

الموضوع باختصار انا جديدة جدا فى عالم السيارات لسة حاليا بتعلم السواقة فى مركز وباذن الله اول ما اخلص الكورس هروح اطلع رخصة وربنا يسهل وتطلع على طول .

المشكلة بقى انى محتارة اجيب ايه كنت هجيب زيرو بالقسط بس ناس كتير اوى نصحتنى اجيب مستعمل لمدة سنة او اكتر لحد ما اتعلم كويس اوى السواقة وبعدين اجيب عربية زيرو .

ميزانيتى الحالية بحد اقصى 13 الى 15 الف

اجيب 128 تمانينات ولا 131 ولا دايهاتسو شاريد ولا لادا سمارا ولا ايه .. ؟؟
دى الحاجات اللى لاقيتها فى كونتاكت كارز تناسب المبلغ دة

وبالمرة ياريت نصيحة لما اجى اشترى لو اكتفيت بتجربة العربية واشوف مرتاحة فيها فى السواقة ولا ايه وكشفت عليها فى محطة بنزين يبقى كدة تمام ومش هيتضحك عليا ولا فى اجراءات تانية ؟؟

ياريت تتابعوا معايا الموضوع لحد باذن الله ما اطلع رخصة واشترى عربية انا متابعة المنتدى هنا من فترة كبيرة واستفدت منه جدا كزائرة وانهاردة قررت اعمل عضوية واستفيد اكتر لحد باذن الله ما اشترى
وشكرا للجميع مقدما ..

**EZABY** · 20-05-2011 02:16 AM

اولا اهلا بيكي
انا برضو مع اللي بيقولوا انك تجيبي حاجه مستعمله الأول قبل الزيرو تقعد معاكي كام شهر كده ولا سنه تكوني اتعودتي على الزحمه والسواقه بصفه عامه
الـ128 من وجهة نظري احسن حاجه في العربيات اللي قدامك دي وبرشحلك الـ127 برضو بس في الحالتين لازم وانتي بتشتري يكون معاكي حد فاهم في العربيات وميكانيكي كويس عشان متشتريش حاجه تتعبك وتصرفي عليها
المهم دلوقتي انك تتعلمي عشان تتعلمي مش عشان تطلعي الرخصه