حل مشاكل ميكانزم مكن زجاج ال m11 و كسور فبرة الشاسيه بتاعته

**hemaa_82** · 20-05-2011 10:41 PM

جيت ارد الباب علي البارد عند السمكري اللي ردلي الرفرف علي البارد ....
رحت ... يالا يا سيدنا هنرد الباب و نركب الاكصدام علي ابوه ....

فكوا الاكصدام و عدلوا الصاجة التحتانية بتاعت الكارتيرة و ركبوه و فله ...

و الصنايعي التاني شغال في الباب و فك البطانة و عدل الفدغة بايده من جوه و بدأ بيضرب من جوة علشان يعدل الصاج ...
خبطة التانية و هوبا ... الازاز اللي كان مرفوع و مقفول قام نازل علي ايده ....
طب ازاي ؟؟؟؟ ما المكنة مقفولة ... يا عم انت فكيت حاجة ؟؟؟لا يا بيه ....

المهم فكينا مكنة الازاز ..لقيت ان ودن من ال2 اللي بيمسك فيهم السلك في الفبرة اللي بتتحرك علي الشاسية الصاج و ترفع و تنزل الازاز الودن دي اتكسرت .... طب و بعدين في الحوسة دي ؟؟؟؟

المهم قعدنا انا و السمكري نفصل في دعامة صاج للفبرة المكسورة علشان بعد ما نلحمها بأمير متطقش تاني ... و قد كان .. و نجحت الفكرة ...حرك يا عم بايدك الفبرة ... حلاوة طب ركب المكنة ... جرب بالكهربا ... عينك ما تشوف الا النور ... اصوات عجيبة و حاجات بتتحشر و شغلانة ....
بصيت بطرف عيني كده لقيت ان اللي احنا عاملينة كويس ... بس السلك لما فلت ...السوستة ريحت فقام السلك ركب علي بعضه في قلب المكنة علي القرص اللي بيلف حواليه ....

يادي النيلة ... هوا احنا نصلح خرم نلاقي بلاعة .ما الباب كان مخبوط و زي الفل شغال .... طب و بعدين ....قالي طب بص ..في هنا واحد بتاع كوالين كويس ... قلنا يالا بينا بقي مبدهاش ....

رحنا .... اسمه طارق .. ابو يوسف -ربنا يحفظله اولاده- بص كده و قالي كده لازم سلك ... بكام يا سيدي ... 50 جنيه ... طب اشتغل ...و قلت لنفسي انا مش هفضل الف يعني علشان في الاخر اوفر 10 جنيه .. المهم الشغل يكون تمام ....

لما بدأ يشتغل ...لقي طبعا الافتكاسة بتاعة الجبيرة ... فقالي ايه ده؟؟ ....شرحتله
قالي طبعا مينفعش ....
عمل ايه بقي ...... كسر الجزء بتاع الودان خالص .... و فصل زي شاسيه حديد بخرمين علشان الاسلاك ... و في نفس الوقت يركب في الفبرة بمسمار بدل الجزء بتاع الودان ..... جرب ... حلاوة ....
طالع نازل و صوته بقي اقل من الفابريكة اللي الناحية التانية و أأمن لان كده حتي مفيش احتمال الودن تتكسر ولا حاجة لأنها ودان حديد....

طب يا عم كنت هتاخد 50 في السلك ..... عايز كام ؟؟؟؟

كله كله 70 جنيه ....طب والله كويس ......

حتي قلت ما بيني وبين نفسي ان ممكن ان شاء الله من غير ما ودان ال3 مكنات التانيين تنكسر ابقي اخليه يعمل نفس الحركة ... علشان الواحد يريح دماغه خالص .....

اللي عنده مشكلة مع كسور في فبرة المكن و يحب ياخد نمرة الراجل ده او الوصفة يقول و انا ارد عليه .....

و ربنا ما يجيب حاجة وحشة ....

الحمد لله ردينا الباب و ركبنا الاكصدام و مكنة الزجاج بقت احسن من الفابريكة ....

نوافيكم بكل جديد

**egypt0777** · 21-05-2011 01:42 AM

ربنا مايخليش حد ودانه توجعه يا هيما

حمد الله على السلامه و سلامة ودان المكن

شرح جميل

**meedoo69** · 24-05-2011 09:53 PM

السلام عليكم
الموضوع ده حصلى الاسبوع اللى فات بس لصقنا الفبره بماده لاصقه وغيرنا السلك بسبعين جنيه لانه كان يوم احد و الدنيا كلها قافله بس انا عارف نها هتتكسر تانى ياريت النمره و العنوان عشان ابقى مستعد بالمناسبه لازمتها ايه الماده اللى عامله زى الفيبر اللى لاصقه فى الباب لونها ابيض بس ان مش قاصد الكاوتش الاسود اللى بيحمى الباب من التراب وكمان ملحوظه تقفيل الباب من الداخل على مستوى عالى جدا مش موجود فى السيارات الكورى او الايطالى فى نفس الفئه و بارك الله فيك كنت السبب فى شرائى للسياره الحمد لله 30000 كم بدون مشاكل جوهريه

**emad7759** · 25-05-2011 11:22 PM

لله يبارك فيك ياخى الغالى على الموضوع

الاكثر من رائع وهيفيد ناس كتير

لان المكنه الزجاج تمنها 350 جنيه

وبتتغير علاشان ياما الوير ده انقطع او الفبره انكسرت

كده الحمد لله بتجربتك دى الناس تروح تعملها احسن من المكنه اللى با350 جنيه وممكن تخرب تانى

وشكرا ليك على التجربه الجميله