السلام عليكم و رحمة الله و بركاته علي كل الديهاتسويه

اخيرا لقيت متنفس من الشغل و عرفت اخد اجازة علشان اعمل صيانه للسيريون الغلبانه اللي معايا

انا في العادة علشان الوقت الضيق بعمل صيانه وسطي كل 10000 كم يعني كنت رايح اعمل صيانه ال 30000 و ال 35000 كم وصلت علي الساعه 9 الصبح و كنت عايز اغير علبة الدركسيون بالمرة بس للاسف هضطر اروح مرة تانيه علشان لازم تتحجز المهم دي تفاصيل الاسعار ة عندي استفسير مهم في الاخر

1- صيانه وسطي اتكلفت 560 جنيه
2- تغيير لمبه كشاف امامي شمال ويط اتكلفت 25 جنيه (( copy طبعا )) بس حميله جداااااا و الله و مش فارقه عن الاصليه في حاجة نفس القوة و طبعا تم تنضيف الكشافات كمان
3- تركيب انذار في التوكيل اتكلف 560 جنيه (( غالي بضراحه بس كان نفسي اجيب واحد عليه علامة العربيه ))
4- ترصيص العجل الامامي ب 36 جنيه
5 غسيل الموتور ب 21 جنيه
6- نسخه مفتاح 30 جنيه
7- علامه GL 12 جنيه
انطباعي العام عمل الصيانه الدوريه في التوكيل شيء ضروري جداااااااا لاني حسيت باختلاف جامد جدا في الاداء و السحب و العفشة انا في العادى بربط العفشة في اي بنزينه بس فعلا التربيط بتاعهم مختلف خالص او يمكن احساس

الكشاف حلو جدااااااا دلوقتي و الرؤيه واضحه جداااا و مش فارق عن الاصلي

الانذار حلو اوي بصراحه و بيشتغل لما حد بيحاول يفتح العربيه مش لما حد يلمسها و فيه نظام ال DEAD lOCK يعني لما اخش الغربيه و ادور السنتر يقفل و لما اقف و ابطل العربيه السنتر يفتح و شكله شيك اوي الصراحه (( مش عايز تريقه انا خبرتي ضعيفه ))



نيجي بقي للاستفسار دلوقتي انا عندي نسخه مفتاح ضايعه في الشقه فقلت اعمل نسخه تانيه علشان اي موقف بايح و سالت مهندس الاستقبال اني عايز نسخه مفتاح تانيه و حاطط ايدي علي قلبي مستني الرقم الخرافي اللي هيقوله قاللي 30 حنيه و بعدين قاللي بس هتخرطه برة تنحت و قلتله ازاي يعني هو مش متشفر و حسب كلام الكنالوج ان الفمفتاح بيرسل اشارة كهربيه علشان العربيه تدور قاللي لا المفتاح مش متشفر فسؤالي بقي في ظروف البلد الرائعه بتاعه الايام دي السيريون لو مفتوحه ممكن اي حد يدورها و لا ايه نظام الحمايه اللي فيها

اما مش فاهم اوي و خبرتي في العربيات مش اد كدة فياريت حد يفهمني

اسف علي الاطاله